Ol Olfala—Yufala i Givhan Bigwan Long Kongregesen
“Mi sapraes taem mi tingbaot ol samting we mi naf blong mekem taem mi yang. Naoia mi kam olfala, mo mi no moa naf blong mekem plante samting.”—Connie, wan sista we i gat 83 yia.
Maet samtaem yu tu yu harem se yu no moa naf blong mekem plante samting from we yu olfala. Nating se yu holemstrong long Jehova blong plante yia, be maet yu harem nogud taem yu luk se naoia yu no moa naf blong mekem plante samting olsem bifo. Sipos i olsem, ?yu save mekem wanem blong yu save gohed blong stap glad?
SAMTING WE JEHOVA I ASKEM YU BLONG MEKEM
Traem askem kwestin ya se: ‘?Wanem samting we Jehova i askem mi blong mekem?’ Dutronome 6:5 i givim ansa long kwestin ya mo i save mekem yu harem gud. Vas ya i se: “Yu mas lavem Jehova we i God blong yu, long olgeta hat blong yu, mo long olgeta sol blong yu, mo long olgeta paoa blong yu.”
Vas ya i soemaot se Jehova i askem yu blong mekem wok blong hem long olgeta hat, sol, mo paoa blong yu. Taem yu tingbaot samting ya, bambae yu no skelem wok blong yu wetem wok blong narafala, mo samting we yu mekem naoia wetem samting we yu mekem bifo.
Traem tingbaot: Taem yu yang, ?yu givim wanem long Jehova? Ating yu givim bes blong yu long hem. Hemia i min se long taem ya, yu mekem evri samting we yu naf blong mekem long wok blong hem. ?Be naoia yu stap givim wanem long Jehova? Ating yu stap givim bes blong yu yet long Jehova, yu stap mekem evri samting we yu naf blong mekem naoia. Sipos yu tingbaot samting ya, bambae yu luk se samting we yu stap givim long Jehova naoia, i sem mak nomo long samting we yu givim long hem bifo. Yes, yu givim bes blong yu long Jehova.
Yu stap givim bes blong yu long Jehova naoia we yu olfala, sem mak olsem we yu bin mekem taem yu yangfala
YU SAVE GIVHAN BIGWAN LONG OL NARAFALA
Hemia wan narafala samting blong tingbaot: Taem yu kam olfala, yu gat janis blong mekem sam samting we yu no save mekem taem yu yangfala. ?Wanem ol samting ya? Traem tingbaot sam long olgeta:
Yu save serem ol ekspiriens blong yu wetem ol narafala. Traem tingbaot ol tok ya we oli raetem i stap long Baebol:
King Deved: “Bifo mi mi wan yangfala mo naoia mi mi olfala, be mi neva luk wan stret man we God i lego hem, no ol pikinini blong hem oli stap lukaotem kakae.”—Sam 37:25.
Josua: “!Yufala i luk! Bambae i no longtaem mi mi ded. Mo yufala i save gud long olgeta hat blong yufala mo olgeta sol blong yufala, se olgeta gudfala promes we Jehova God blong yufala i talem, oli kamtru evriwan we i no mestem wan tok blong hem nating. Hem i mekem olgeta promes ya oli kamtru long yufala. I no gat wan tok blong ol promes ya we i no kamtru.”—Jos. 23:14.
Maet yu tu yu bin talem ol sem kaen tok olsem. Deved mo Josua i stap tokbaot prapa ekspiriens blong tufala. Tufala i holemstrong long Jehova blong plante yia, taswe tufala i save tokbaot samting we tufala i luk mo harem long olgeta yia ya. Mo hemia i mekem se ol narafala oli trastem moa ol tok blong tufala.
Sipos yu mekem wok blong Jehova blong plante yia finis, yu tu yu save tokbaot olsem wanem hem i blesem yu. ?Yu tingbaot wan taem we yu luk se Jehova i givhan long ol man blong hem long wan spesel rod? !I gud yu tokbaot long ol narafala! Bambae yu harem gud taem yu tokbaot ol ekspiriens we yu gat long wok blong Jehova, mo hemia i save leftemap tingting blong ol narafala tu.—Rom 1:11, 12.
Wan narafala rod we yu save leftemap tingting blong ol brata mo sista, hemia taem yu go long ol miting long Haos Kingdom sipos yu naf. Hemia bambae i givhan long ol narafala, mo long yu tu. Connie, we yumi tokbaot hem finis, i talem se: “Taem mi go long ol miting, hemia i halpem mi blong mi no harem nogud tumas. Long Haos Kingdom, ol brata mo sista oli soemaot se oli lavem mi tumas, mo hemia i leftemap tingting blong mi. Mi stap givim ol smol presen long ol narafala blong soemaot se mi tu mi lavem olgeta. Mo mi traehad blong tekpat long ol miting mo joen long wok blong prij, olsem ol narafala brata mo sista.”
JEHOVA I TINGHAE LONG WOK BLONG YU
I gat plante eksampol blong ol man long Baebol we Jehova i lavem olgeta, nating se oli no naf blong mekem plante samting olsem we oli wantem. Traem tingbaot Simeon, wan olfala man Isrel we i laef long taem we Jisas i bon. Taem Simeon i stap go long tempol, ating hem i luk ol man we oli yang moa long hem oli stap mekem plante wok long ples ya. Maet Simeon i harem se from we hem i olfala mo i no moa naf blong mekem plante wok olsem, hem i no moa sas long ae blong Jehova. Be Jehova i no gat tingting olsem. Hem i luk se Simeon i “wan stret man we i stap ona long God” mo i givim bigfala blesing ya long hem blong luk bebi Jisas. Be i no hemia nomo, Jehova i yusum Simeon blong i talemaot wan profet tok tu, hemia se Jisas bambae i kam Mesaea. (Luk 2:25-35) Nating se Simeon i no naf blong mekem sam samting, be Jehova i tingbaot moa strong bilif blong hem, mo “tabu spirit i stap long hem.”
Jehova i givim blesing ya long Simeon blong i luk bebi Jisas, mo blong i talemaot profet tok ya se Jisas bambae i kam Mesaea
Yu tu yu save sua se Jehova i tinghae long ol wok we yu naf blong mekem. Long lukluk blong hem, sipos man i givim samting “folem samting we hem i gat be i no samting we hem i no gat, presen ya i gud moa.”—2 Kor. 8:12.
Taswe, i gud yu tingbaot nomo ol samting we yu naf blong mekem. Eksampol, ?yu tingbaot sam rod we yu save joen yet long wok blong prij nating se i blong smoltaem nomo? ?Yu naf blong ringim o raetem wan smol kad blong leftemap tingting blong ol brata mo sista? Taem wan man we i holemstrong long Jehova blong plante yia, i mekem wan smol samting olsem blong soemaot se hem i lavem ol brata mo sista, hemia i rili save tajem hat blong olgeta.
?Olsem wanem sipos yu no moa naf blong mekem sam samting? Traem luk wan ekspiriens blong wan sista long Is Afrika, we i stap long bokis ya “Hemia i Sevem Laef Blong Hem.”
Tingbaot se fasin blong yu blong holemstrong long Jehova blong plante yia i save leftemap tingting blong ol narafala. Taem yu stanap strong longtaem, hemia i wan gudfala eksampol long ol narafala, mo yu save sua se: “Oltaem God i stap mekem i stret nomo. Hem i no save fogetem ol wok ya we yufala i mekem. Hem bambae i stap tingbaot we yufala i lavem nem blong hem, taem yufala i mekem minista wok mo yufala i stap gohed yet blong givhan long ol tabu man.”—Hib. 6:10.
GOHED BLONG STAP BISI
Ol man blong stadi oli faenemaot se ol olfala we oli bisi oltaem blong givhan long ol narafala, helt blong olgeta i gud moa, tingting blong olgeta i klia moa, mo oli save laef longtaem moa.
I tru, nating se yu mekem ol gudfala wok, be hemia i no save blokem yu blong kasem ol problem blong ol olfala. Kingdom blong God nomo bambae i mekem se ol man oli no moa kam olfala mo ded.—Rom 5:12.
Be naoia, taem yu mekem ol samting we Jehova i askem, olsem blong givhan long ol man blong oli save hem, bilif blong yu long ol promes blong fiuja bambae i kam strong mo hemia i save givhan tu long helt blong yu. Ol olfala, plis tingbaot se Jehova i tinghae long ol wok we yu mekem blong hem, mo se kongregesen tu i tinghae long eksampol blong yu blong gat strong bilif.