?Yu Yu Rimemba?

?Yu bin ridimgud ol Wajtaoa blong yia ya? Traem luk sipos yu save ansarem ol kwestin ya:

?From wanem yumi givim glori long Jehova?

Yumi givim glori long Jehova from yumi respektem hem mo yumi lavem hem tumas. Mo tu, yumi givim glori long hem from yumi wantem se ol narafala oli save hem.—w25.01, pej 3-4.

Sipos wan man i mekem yumi harem nogud, ?yumi save mekem wanem blong fogivim hem?

Yumi no mas ting nating long ol filing blong yumi. Taem yumi lego kros, kros i no save gat paoa long fasin blong yumi blong tritim ol narafala.—w25.02, pej 15-16.

?From wanem disaepol Mak i wan gudfala eksampol blong ol yangfala brata?

Mak i glad nomo blong mekem wok blong Jehova long wan narafala ples. Mo nating se hem i harem nogud from sam samting, be hem i no stop blong givhan long ol brata mo sista. Hem i gohed blong fren gud wetem Pol mo ol narafala we oli bigman long Kristin fasin.—w25.04, pej 27.

?Jisas i minim wanem taem i prea se: “Mi mi mekem olgeta oli save nem blong yu”? (Jon 17:26)

Ol disaepol oli save finis nem blong God. Taswe, Jisas i givhan long olgeta blong oli save gud ol tingting we Jehova i gat long wol ya mo ol man, ol samting we Hem i mekem, mo ol fasin blong Hem.—w25.05, pej 20-21.

Sipos yumi gat tingting daon, ?bambae yumi luksave wanem?

Yumi luksave se i gat sam samting we yumi no save. Eksampol, yumi no save wetaem en bambae i kam o samting we Jehova bambae i mekem blong halpem yumi long taem ya. Yumi no save samting we bambae i hapen tumoro o olsem wanem Jehova i save gud yumi.—w25.06, pej 15-18.

?Yumi save mekem wanem blong wan atikol o pablik tok i givhan long yumi?

Yumi save askem yumi wan se: ‘?Wanem save long haf ya i pruvum trutok ya? ?I gat wan pijatok long haf ya we mi save yusum taem mi tij? ?Hu bambae i intres long topik ya?’—w25.07, pej 19.

?Samting we Jehova i mekem long Deved, i tijim yumi wanem long fasin blong Hem blong fogif?

Deved i mekem sam bigfala sin, be taem hem i tanem tingting blong hem, Jehova i fogivim hem. (1 King 9:​4, 5) Taem God i fogivim yumi, hem i no moa tingbaot ol sin ya bakegen blong i save panisim yumi from o tokbaot bakegen long fiuja.—w25.08, pej 17.

Sipos wan Baebol stadi i no kasemsave long wan poen, ?yu save mekem wanem?

Sipos i had blong wan Baebol stadi i kasemsave long wan poen we yu tokbaot, i gud yutufala i gohed long narafala haf blong stadi, mo biaen yutufala i kambak long poen ya.—w25.09, pej 24.

Baebol i talem se sin i gat “paoa blong trikim man.” (Hib. 3:13) ?Hemia i minim wanem?

Sin i save pulum yumi blong mekem samting we i no stret. Mo tu, sin i save mekem yumi no sua se Jehova i lavem yumi o nogat.—w25.10, pej 16.

?Wanem trifala samting we yumi save mekem blong kam gud moa long ol prea blong yumi?

(1) Tingting dip long ol gudfala fasin blong Jehova. (2) Tingbaot samting we yumi stap fesem mo olsem wanem blong talem long Jehova, olsem maet yumi nidim blong fogivim wan man. (3) Tekem taem blong prea. Sipos yumi mekem ol samting ya, bambae yumi naf blong talemaot ol tingting we i stap long hat blong yumi.—w25.10, pej 19-20.

?Olsem wanem yumi save givhan long ol olfala?

Yumi save visitim o ring long ol olfala. Mo tu, yumi save folem olgeta taem oli go luk wan dokta. Mo yumi save askem olgeta tu blong oli joen wetem yumi long ol defren rod blong prij.—w25.11, pej 6-7.

?Olsem wanem blong gat wan mared we i givim ona long Jehova?

Folem ol loa we gavman i putum. Meksua se ol samting we yu mekem long dei blong mared i soemaot se yu gat ol fasin we oli haf blong frut blong tabu spirit. Meksua se klos blong yu i stret mo i soemaot respek, mo yu mas sakemaot ol kastom we oli no laenap wetem Baebol. Yufala i mas toktok gud tugeta taem yufala i stap mekem ol plan blong mared.—w25.12, pej 21-24.