Oltaem “Jaj Blong Olgeta Man” i Mekem i Stret

1. ?Ebraham i soemaot olsem wanem se hem i trastem Jehova blong i jajem man long stret fasin? (Yu luk pija long stat blong stadi.)

EBRAHAM i talem long Jehova se: “Yu yu man blong jajem olgeta man blong wol. !Yu yu stap jajem man long stret fasin nomo!” (Jenesis 18:25) Long ol tok ya, Ebraham i soemaot se hem i trastem Jehova, blong i jajem tufala taon ya, Sodom mo Gomora, long stret fasin. Hem i gat strong tingting se, “i no fasin” blong Jehova blong spolem stret man wetem rabis man wantaem. Biaen, Jehova i tokbaot hem wan, i se: “Hae God i strong we i strong, . . . hem i stret olwe . . . mo hem i tru. Oltaem, tingting blong hem bambae i stap strong long olgeta. Oltaem hem i stap mekem ol samting we i stret, mo i stap mekem sem mak nomo long olgeta man.”—Dutronome 31:19; 32:4.

2. ?From wanem Jehova i no save jajem man long fasin we i no stret?

² ?From wanem Ebraham i gat strong tingting se bambae Jehova i jajem man long stret fasin? From we Jehova i mekem i stret oltaem. Hem i nambawan eksampol blong stret fasin. Taswe hem i no save jajem man long fasin we i no stret. Baebol i talem se: “Hae God i laekem ol fasin we i stret.”—Ol Sam 33:5.

3. Talem wan eksampol blong fasin we i no stret long wol tede.

³ Yumi harem gud blong save se oltaem Jehova i jajem man long stret fasin. Be i no olsem long wol tede. Yu traem tingbaot ol man we oli go long kalabus from samting we oli no mekem. Plante taem, kot i jekem DNA long blad blong man, blong faenemaot se oli rong no nogat. Maet oli faenemaot se wan man we i stap plante yia finis long kalabus i no rong. Taem kot i jajem wan man long fasin we i no stret, man ya i harem nogud tumas mo i save kam kros tu. Be i gat wan narafala fasin we i had moa blong winim. ?Wanem fasin ya?

FASIN WE I NO STRET I SAVE KAMAOT LONG KONGREGESEN

4. ?Wanem i save traem bilif blong yumi?

⁴ Ol Kristin oli save se ol man afsaed long kongregesen oli save mekem i no stret long olgeta. Be samting we i save traem bilif blong yumi, hemia taem yumi luk wan samting we i no stret insaed long kongregesen. Sipos samting olsem i hapen, ?bambae yu yu mekem wanem? ?Bambae yu lego Jehova?

5. ?From wanem yumi no sapraes taem wan samting we i no stret i hapen long kongregesen?

⁵ Yumi evriwan i sinman, taswe yumi save mestem. Maet narafala long kongregesen i mekem i no stret long yumi, no maet yumi mekem i no stret long narafala. (1 Jon 1:8) Samting ya i hapen wanwan taem nomo. Be long taem olsem, ol tru Kristin oli no sapraes mo oli no lego Jehova. Jehova i givim ol gudfala advaes long Baebol, blong yumi save stanap strong taem wan brata no sista i mekem i no stret long yumi.—Ol Sam 55:12-14.

6, 7. ?Wanem samting we i no stret i hapen long wan brata? ?Wanem i givhan long hem?

⁶ Yu traem tingbaot samting we i hapen long Brata Wili Diel. Long 1931, hem i stat blong wok long Betel, long taon ya Bern long Swiselan. Long 1946, hem i joen long namba eit klas blong Gilead Skul long New York. Afta long skul ya, oli sanem hem i go long Swiselan blong mekem wok blong eria elda. Taem Brata Diel i raetem stori blong laef blong hem, hem i talem se long Mei 1949, hem i talemaot long branj ofis long Swiselan se bambae hem i mared. Nao branj ofis i ansa se bambae oli tekemaot olgeta wok blong hem. Be hem i save mekem wok blong paenia nomo. Brata Diel i talem se: “Mi no moa save mekem ol tok tu. Mo plante brata mo sista oli no moa talem halo long mitufala, oli mekem olsem se kongregesen i putumaot mitufala.”

⁷ ?Brata Diel i mekem wanem? Hem i talem se: “Mitufala i save se Baebol i no agensem mared, ale mitufala i prea oltaem mo trastem Jehova.” Sam brata oli no kasem save long tingting blong Jehova long saed blong mared. Be sloslo, oli stretem tingting blong olgeta, nao Brata Diel i kasem wok blong hem bakegen. Hem i kasem blesing from we hem i no lego Jehova.a I gud yumi wanwan i tingbaot se: ‘Sipos oli mekem i no stret long mi olsem, ?bambae mi wet long Jehova, no bambae mi folem prapa tingting blong mi blong traem stretem trabol ya?’—Ol Proveb 11:2; ridim Maeka 7:7.

8. ?From wanem yu save rong, taem yu ting se i gat wan samting we i no stret long kongregesen?

⁸ Sipos yu ting se i gat wan samting we i no stret long kongregesen, i gud yu tingbaot se maet yu nao yu rong. Yumi evriwan i sinman, mo maet yu no save gud long samting we i hapen. Mo tu, maet yu no save evri samting long saed blong bisnes ya. Nating se i olsem wanem, i gud yu tokbaot long prea blong yu, yu trastem Jehova, mo yu holemstrong long hem. Sipos yu mekem olsem, yu no save kam kros long Jehova.—Ridim Ol Proveb 19:3.

9. ?Bambae yumi tokbaot wanem long stadi ya mo long nekis stadi?

⁹ I gud yumi tokbaot tri eksampol long Baebol we yumi save lanem samting from. Long stadi ya, bambae yumi tokbaot Josef we i laen blong Ebraham, mo samting we ol brata blong hem oli mekem. Long nekis stadi, bambae yumi tokbaot fasin we Jehova i mekem long King Ehab, mo samting we i hapen taem Aposol Pita i go long Antiok long Siria. Taem yumi luk ol eksampol ya, yu traem lukaot ol rod blong holem stret tingting mo fren gud oltaem wetem Jehova, antap moa, taem yu ting se narafala i mekem i no stret long yu.

OL SAMTING WE I HAPEN LONG JOSEF

10, 11. (1) ?Wanem ol samting we i spolem Josef? (2) Long kalabus, ?Josef i tekem janis blong mekem wanem?

¹⁰ Josef i wan gudfala man blong Jehova. Hem i harem nogud taem ol strenja oli mekem i no stret long hem, be hem i harem nogud moa taem ol brata blong hem oli spolem hem. Taem Josef i gat 17 yia, ol brata blong hem oli salem hem blong i kam wan slef long Ijip. (Jenesis 37:23-28; 42:21) Long Ijip, Josef i go kalabus from wan giaman toktok se hem i repem wan woman. Oli no givim janis blong hem i toktok. (Jenesis 39:17-20) Josef i harem nogud blong 13 yia, olsem wan slef mo wan presina. ?Olsem wanem stori blong Josef i save givhan long yumi taem wan brata no sista i spolem yumi?

¹¹ Man we i lukaot long waen blong king i stap long kalabus wetem Josef. Wan naet, man ya i drim, mo Jehova i givhan long Josef blong i talemaot mining blong drim ya. Josef i talem se, man ya bambae i kam fri mo bambae i wok blong Fero bakegen. Mo Josef i tekem janis blong eksplenem long man ya samting we i hapen long hem. Ol tok we Josef i talem mo ol tok we hem i no talem tu, i save givhan long yumi taem wan brata no wan sista i spolem yumi.—Jenesis 40:5-13.

12, 13. (1) ?Olsem wanem yumi save se Josef i no sidaon mo wet nomo? (2) ?Josef i no talem wanem long man blong lukaot long waen blong king?

¹² Ridim Jenesis 40:14, 15. Josef i talem long man ya we i lukaot long waen blong king, se ol man we oli tekemaot hem long ples blong hem, oli mekem long fasin stil nomo. Mo tu, Josef i talem se hem i no repem woman ya we oli putum hem long kalabus from. Nao hem i askem long man ya blong i tokbaot hem long king. ?From wanem hem i mekem olsem? Hem wan i talem se: “Blong givhan long mi blong mi aot long kalabus ya.”

¹³ ?Olsem wanem? ?Josef i jes sidaon mo wet nomo, we i no traem faenem rod blong kamaot long trabol ya? Hem i no mekem olsem. Josef i save se ol man oli mekem i no stret long hem. Hem i tokbaot trabol ya wetem man ya blong lukaot long waen blong king, from we man ya i save givhan long hem. Be folem stori long Baebol, Josef i no talem se ol brata blong hem nao oli salem hem, mo hem i no talem samting ya long Fero tu. Taswe taem ol brata blong hem oli kam long Ijip mo mekem pis wetem hem, Fero i welkamem olgeta, mo i talem se oli save stap long Ijip mo harem gud long “ol nambawan samting blong kantri ya.”—Jenesis 45:16-20.

14. ?Wanem bambae i mekem se yu no tokbaot brata no sista we i spolem yu?

¹⁴ Sipos yu ting se wan brata no sista long kongregesen i mekem i no stret long yu, yu no mas toktok olbaot long saed ya. I tru se, sipos hem i mekem wan bigfala sin, yu mas talemaot long ol elda. (Levitikas 5:1) Be sipos i no wan bigfala sin, plante taem i no nid blong yu talemaot long wan man, mo long ol elda tu. Yu nomo yu save mekem pis wetem brata no sista ya. (Ridim Matiu 5:23, 24; 18:15.) Yu mas strong blong folem ol advaes blong Baebol. Samtaem, maet yu luksave se yu nao yu rong, from we yu no kasem save long evri samting. Long taem olsem, bambae yu glad se yu no bin tokbaot brata no sista blong yu long ol narafala, mo mekem trabol ya i kam bigwan moa. Yu mas tingbaot se, nating we yu raet no yu rong, be taem yu talem samting we i spolem narafala, yu mekem trabol i kam mowas. Be sipos yu holemstrong long Jehova mo long ol brata mo sista, bambae yu no mekem mastik ya. Wan man blong raetem Ol Sam i talem se “man we i stap obei long [God] long evri samting, . . . i no save giaman long ol narafala man. Hem i no save mekem ol samting nogud long ol fren blong hem.”—Ol Sam 15:2, 3; Jemes 3:5.

TINGBAOT BESFREN BLONG YU

15. ?From we Josef i fren gud wetem Jehova, samting ya i givhan long hem olsem wanem?

¹⁵ Stori blong Josef i tijim yumi long wan narafala samting bakegen. Long ol 13 yia we ol narafala oli mekem i no stret long Josef, hem i soemaot se hem i gat tingting blong Jehova. (Jenesis 45:5-8) Hem i neva blemem Jehova. I tru, Josef i no fogetem ol rong we ol man oli mekem long hem, be hem i no letem ol samting ya oli spolem tingting blong hem. Samting we i moa impoten, hem i no lego Jehova. Josef i holemstrong long Jehova, mo from samting ya, hem i luk we Jehova i stretem ol trabol blong hem, mo i blesem hem mo famle blong hem.

16. Taem wan long kongregesen i mekem i no stret long yumi, ?from wanem yumi mas kam klosap moa long Jehova?

¹⁶ Long sem fasin, yumi mas glad blong fren gud wetem Jehova, mo yumi lukaot gud oltaem se yumi gohed blong fren gud wetem hem. Yumi no mas letem ol mastik blong ol brata mo sista, oli seraotem yumi long God ya we yumi lavem hem mo wosipim hem. (Rom 8:38, 39) Sipos wan long kongregesen i mekem i no stret long yu, i gud yu folem fasin blong Josef. Yu mas kam klosap moa long Jehova, mo yu traehad blong gat sem tingting olsem hem. Afta we yu folem ol advaes blong Baebol blong traem stretem trabol ya, yu mas lego i stap long han blong Jehova. Yu save sua se bambae hem i stretem, long taem we i stret mo long fasin we hem i wantem.

TRASTEM “JAJ BLONG OLGETA MAN”

17. ?Olsem wanem yu save soemaot se yu trastem “Jaj blong olgeta man”?

¹⁷ Go kasem taem we rabis wol ya i finis, bambae i gat sam man we oli save mekem i no stret long yu. Sam samtaem, maet yu luk wan samting long kongregesen we yu ting se i no stret. Be yu no mas letem samting ya i mekem yu yu lego Jehova. (Ol Sam 119:165) Yu mas holemstrong long God, prea blong hem i givhan long yu, mo trastem hem. Yu mas tingbaot se from we yu tu yu sinman, maet yu no kasem save gud long samting we i hapen, mo ating yu no save evri samting long saed ya. Yu mas folem eksampol blong Josef, yu no talem ol nogud tok we i save mekem problem i kam bigwan moa. Mo tu, yu no mas folem prapa tingting blong yu, be yu mas gat strong tingting blong wet long Jehova blong i stretem. Nao bambae Jehova i glad long yu mo i blesem yu, olsem hem i mekem long Josef. Yu save bilif strong se Jehova, “Jaj blong olgeta man,” bambae i mekem i stret oltaem, from we “hem i stret olwe nomo.”—Jenesis 18:25, NW; Dutronome 32:4.

18. Long nekis stadi, ?bambae yumi tokbaot wanem?

¹⁸ Long nekis stadi, bambae yumi tokbaot tu narafala stori blong Baebol. Long tufala stori ya, fasin we i no stret i kamaot long medel blong ol man blong Jehova. Bambae yumi luk se yumi nidim tingting we i stap daon mo yumi mas rere blong fogivim narafala, blong yumi save folem fasin blong Jehova blong mekem i stret oltaem.