?Bambae Yu Stretem Rao Mo Mekem Pis i Stap?

JEHOVA GOD i wantem se ol man blong hem oli gat pis. Taem wan i gat problem wetem narawan, hem i wantem se tufala i mekem pis. Olsem nao, bambae i gat pis long ful kongregesen. Pis ya i save pulum plante man oli kam long kongregesen.

Traem tingbaot wan kleva long Madagaska. Hem i luk we ol man blong Jehova oli gat pis, nao hem i tingting se, sipos wan dei hem i wantem joen long wan skul, bambae i joen wetem ol Witnes. Biaen, hem i lego wosip blong ol rabis spirit, i stretem mared blong hem, mo i wosipim God ya blong pis, Jehova.

Evri yia, plante taosen man oli joen long Kristin kongregesen, mo faenem pis we man ya i faenem. Baebol i talem se, sipos samfala long kongregesen oli ‘stap jalus mo oli wantem rao,’ oli save kam badfren mo mekem trabol i kamaot. (Jemes 3:14-16) Be Baebol i givim gudfala advaes, olsem wanem blong blokem ol trabol ya mo mekem pis wetem ol brata mo sista. Bambae yumi tokbaot samfala we advaes ya i givhan long olgeta.

PROBLEM MO ROD BLONG STRETEM

KRIS i talem se: “Oltaem mi stap rao long wan brata we i wok wetem mi. Wan dei, mitufala i stap singaot strong long mitufala, nao tu man i kam insaed, mo tufala i luk bigfala rao ya.”

JANET i talem se: “Oltaem mi stap prij wetem sem sista. Be wan dei, hem i jenisim plan ya. Biaen, hem i no moa toktok long mi. Mi no kasem save from wanem hem i mekem olsem.”

MAEKEL i talem se: “Mi stap toktok long tu man long mobaelfon, we tufala i stap long tu defren ples. Ale, wan i talem tata, mo mi ting se i ofem fon blong hem. Nao mi talem sam nogud tok long saed blong hem, long man we i stap long narafala fon. Afta, mi faenemaot se faswan i no ofem fon blong hem.”

GARI i talem se: “I gat tu paenia long kongregesen we tufala i no joen gud. Oltaem, wan i tok long narawan blong stretem hem. Ol raorao blong tufala i mekem ol narafala oli harem nogud.”

Maet yu ting se ol problem ya oli no bigwan. Nating se i olsem, olgeta we oli rao oli save harem nogud longtaem, mo oli save spolem pis long kongregesen. Yumi glad se ol brata mo sista ya oli folem advaes blong Baebol blong mekem pis bakegen. ?Wanem advaes?

“Bambae yufala i no raorao long yufala.” (Jenesis 45:24) Josef i talem ol tok ya long ol brata blong hem, taem oli stap gobak long papa blong olgeta. Taem wan man i kros kwik mo i no bos long filing blong hem, rao i save kam bigwan moa. Hem i save mekem sam narafala oli kam kros tu. Kris i luksave se i had blong hem i mekem tingting blong hem i stap daon mo i obei. Hem i wantem jenisim fasin blong hem, ale, hem i go talem sore long brata we hem i rao wetem. Afta, hem i traehad blong winim fasin ya blong kam kros kwik. Taem narafala brata ya i luk se Kris i stap traehad, hem tu i traehad. Naoia, tufala i joen gud long wok blong Jehova.

“Olgeta plan blong man oli save foldaon sipos oli no toktok gud tugeta.” (Ol Proveb 15:22, NW) Taem Janet i luk se fren blong hem i no moa toktok long hem, hem i folem vas ya long Baebol nao i go luk sista ya. Janet i askem long hem sipos i bin mekem wan samting we sista i kros from. Fastaem tufala i sem smol. Be tufala i gohed blong toktok gud tugeta, nao sista i luksave se hem i gat rong tingting long wan samting we i hapen bifo finis. Hem i talem sore long Janet, nao tufala i fren gud bakegen, mo tufala i gohed blong mekem wok blong Jehova tugeta.

‘Sipos yu kam long olta blong givim presen i go long God, mo yu tingbaot se brata blong yu i stap kros long yu from wan samting, yu mas mekem pis fastaem, biaen yu kambak, yu givim presen blong yu.’ (Matiu 5:23, 24) Jisas i givim advaes ya taem hem i tijim ol man antap long hil. Afta we Maekel i talem ol nogud toktok long saed blong narafala brata ya, hem i harem nogud tumas. Hem i gat strong tingting blong mekem evri samting we hem i mas mekem, blong fren bakegen wetem brata ya. Ale, hem i go luk hem mo i talem sore long hem. Maekel i glad tumas se brata blong hem i rere blong fogivim hem. Naoia, tufala i fren gud bakegen.

“Yufala i no mas hareap blong kros long yufala, mo yufala i mas glad blong fofogivim yufala nating sipos wan long yufala i gat poen agens long narawan.” (Kolosi 3:12-14) ?Yu tingbaot tu paenia ya we tufala i stap raorao long wok blong prij? Long kaen fasin, wan elda i givhan long tufala blong luksave se, tufala i stap spolem tingting blong ol narafala. Hem i mekem tufala i tingbaot se tufala i mas gat longfala tingting mo holem pis long kongregesen. Tufala i lesin, mo tufala i folem advaes ya. Naoia, tufala i joen gud blong mekem wok ya blong talemaot gud nius.

Advaes ya long Kolosi 3:12-14, i save givhan long yu tu. Taem narafala i mekem yu yu harem nogud, i gud yu mekem tingting blong yu i stap daon, yu fogivim hem, mo yu no moa tingbaot bakegen. ?Be olsem wanem sipos yu traehad finis blong fogivim hem, be i hadwok? Ol advaes long Matiu 18:15 i save givhan long yu. Long ples ya, Jisas i stap tokbaot ol bigfala sin, be yu save folem sem rod taem yu rao smol wetem wan brata no sista. Yu mekem tingting blong yu i stap daon, nao yu go luk hem, mo yu toktok long kaen fasin blong stretem problem ya.

I gat plante gudfala advaes long Baebol. Be taem yumi folem ol advaes ya, yumi nidim tabu spirit, we i “save mekem se man i gat ol gudfala fasin” olsem “lav, glad, pis, tingting we i longfala, kaen, gud fasin, bilif, kwaet fasin, mo bos long tingting.” (Galesia 5:22, 23) Traem tingbaot: Wan masin i ron gud taem yumi putum oel long ol pat blong hem. I sem mak taem yumi gat ol gudfala fasin ya we oli kamaot long Jehova. Bambae i isi moa blong fren gud wetem ol narafala.

DEFDEFREN FASIN BLONG YUMI I MEKEM KONGREGESEN I GLAD MOA

Yumi wanwan i gat defdefren fasin. Sam tingting blong yumi mo fasin blong toktok blong yumi, oli defdefren. Samting ya i save mekem se yumi intres moa long narafala, mo yumi fren gud, no i save mekem se yumi gat rong tingting long narafala mo yumi raorao. Wan brata we i elda longtaem, i talem olsem wanem samting ya i save hapen, i se: “Maet i had blong wan man we i kwaet mo i sem, i joen gud wetem wan man we i no fraet mo i toktok plante. Maet yumi ting se hemia i no wan samting, be i save mekem bigfala trabol i kamaot.” ?Yu ting se ol man we fasin blong olgeta i defdefren oli neva save joen gud? Traem tingbaot tufala aposol ya Pita mo Jon. Maet yumi tingbaot Pita olsem wan man we i no fraet blong toktok. Be yumi tingbaot Jon olsem wan brata we i gat bigfala lav, mo i tingting gud bifo we hem i toktok mo i mekem samting. I tru, Pita mo Jon i gat defdefren fasin. Be tufala i joen gud blong mekem wok blong Jehova. (Ol Wok 8:14; Galesia 2:9) Sem mak long yumi tede. Nating se yumi gat defdefren fasin, be yumi save joen gud blong mekem wok blong Jehova.

?Olsem wanem sipos wan brata long kongregesen i talem no i mekem wan samting we yu no glad long hem? I gud yu tingbaot se Jisas i ded blong sevem hem olsem we i ded blong sevem yu. Mo tu, yu mas lavem brata ya. (Jon 13:34, 35; Rom 5:6- 8) Taswe, yu no gat raet blong talem se yu no wantem fren wetem hem, nao yu no moa toktok long hem. I gud yu askem se: ‘?Hem i mekem samting we i agensem loa blong Jehova? ?Hem i minim nomo blong spolem mi, no mitufala i gat defdefren fasin nomo? ?Hem i gat sam gudfala fasin we mi sud traehad blong wokem?’

Sipos brata ya i laekem blong toktok be yu yu laekem blong stap kwaet, i gud yutufala i prij tugeta mo yu traem lanem wan samting taem yu lesin long hem. Maet hem i laekem blong givim presen, be yu yu no olsem. Traem tingbaot glad we man i kasem taem hem i givim samting long wan olfala, wan sikman, no wan we i sot long sam samting. ?Yu ting se yu save lanem samting taem yu joen wetem brata no sista ya we i gat gladhat blong givim presen? Nating se yutufala i defdefren, be yu save makem ol gudfala fasin blong hem. Maet yutufala i no kam besfren, be bambae yutufala i kam klosap moa long yutufala. Nao yu yu gat pis, mo i gat pis long kongregesen.

Long taem blong ol aposol, i gat tu sista we nem blong tufala, Yuodia mo Sintike. I luk olsem se fasin blong tufala i defdefren, be aposol Pol i talem se tufala i mas ‘gat wan tingting nomo from we tufala i joen long Masta.’ (Filipae 4:2) Yumi tu, yumi mas joen gud blong wosipim Jehova mo holem pis long kongregesen.

STRETEM TRABOL KWIKTAEM

?From wanem yumi mas kwik blong sakemaot ol nogud tingting we yumi gat long narafala? Ol nogud tingting ya oli olsem ol rabis gras we oli gru long medel blong ol naesfala flaoa. Sipos yumi no pulumaot ol rabis gras ya, bambae oli save kavremap ol flaoa. Long sem fasin, sipos ol nogud tingting blong yumi oli kam strong, yumi save mekem ful kongregesen i harem nogud. Be sipos yumi lavem Jehova mo ol brata blong yumi, bambae yumi traehad oltaem blong holem pis long kongregesen.

Taem yu traehad blong mekem pis wetem narafala, maet yu sapraes long gudfala frut we i kamaot. Wan sista i talem se: “Mi no laekem fasin we wan sista i stap mekem long mi. Hem i stap toktok long mi olsem we mi wan pikinini nomo. Mi kam kros mo mi tok strong long hem. Tingting blong mi se, hem i no gat respek long mi, taswe ?from wanem mi mas gat respek long hem?”

Sista ya i tekem taem blong tingting gud long fasin blong hem, nao hem i talem se: “Mi luksave se mi mi gat plante slak fasin, nao mi harem nogud. Mi save se mi mas jenisim tingting blong mi. Ale mi prea long Jehova, nao mi pem wan smol presen mo mi raetem wan kad, blong talem sore long sista ya from nogud fasin blong mi. Mitufala i holholem mitufala, mo mitufala i fogetem problem ya. Naoia mitufala i joen gud.”

Yumi evriwan i glad blong stap long pis. Be taem yumi harem se narafala i no lavem yumi, no taem yumi gat flas tingting, i isi nomo blong rao wetem hem. Ol man blong wol oli gat fasin ya, be Jehova i wantem se ol man blong hem oli defren. Ol Witnes blong hem oli mas joen gud mo stap long pis. Jehova i pulum Pol blong i raetem se: “Fasin blong yufala i mas laenap wetem fasin ya we God i singaot yufala.” Mo hem i talem tu se: “Tingting blong yufala i mas stap daon, yufala i mas kwaet man, tingting blong yufala i mas longfala, mo yufala i mas lavlavem yufala blong yufala i no raorao long yufala. Tabu spirit i mekem se yufala i gat pis nao yufala i kam wan, taswe oltaem yufala i mas traehad blong holemtaet fasin ya.” (Efesas 4:1-3) Pis ya we i mekem ol man blong Jehova oli “kam wan,” i gud we i gud tumas. Taswe yumi mas wok had blong stretem enikaen problem we yumi gat wetem ol brata mo sista, mo mekem pis ya i kam bigwan moa.