Mekem Stadi Blong Yu Long Baebol i Laef Mo i Kamgud Moa

Josua i ridim Loa; wol blong Jeriko i foldaon mo haos blong Rehab i stanap strong; Josua i leftemap han blong hem i go antap long heven taem hem i prea

JOSUA i gat wok ya blong lidim ol man Isrel i go long Promes Lan. Hemia wan wok we i had. Be Jehova i leftemap tingting blong Josua mo i talem long hem se: “Tingting blong yu i mas strong, mo yu no mas fraet.” Hem i talem se sipos Josua i ridim ol Loa mo i obei long olgeta, bambae Josua i mekem ol waes desisen mo ol wok blong hem bambae oli go gud. —Josua 1:7, 8.

Yumi stap long wan taem we laef i kam “strong tumas mo bambae i had blong winim ol trabol.” (2 Timoti 3:1) Sipos yumi wantem se laef blong yumi i go gud olsem Josua, yumi mas folem advaes we Jehova i givim long Josua. Yumi mas ridim Baebol evridei mo yusum ol save we yumi kasem blong mekem ol gudfala desisen.

Be maet sam long yumi oli no save olsem wanem blong stadi, o kasem glad long stadi. Nating se i olsem, i impoten we yumi mekem prapa stadi blong yumi wan. Long bokis ya “Traem Mekem Olsem,” bambae yu luk ol rod we oli save givhan long yu blong mekem prapa stadi blong yu mo glad long stadi blong yu.

Man blong raetem sam i singsing se: “Plis yu givhan long mi blong oltaem mi stap obei long ol tok we yu yu putum, from we oli stap mekem mi mi glad.” (Ol Sam 119:35) Taswe yu tu yu save glad taem yu stadi long Tok blong God. Bambae yu lanem plante gudfala samting taem yu gohed blong stadi long Baebol.

Nating se yu no lidim wan neson olsem we Josua i mekem, be yet i gat sam samting we i mekem laef blong yu i had. Taswe, olsem Josua, i gud yu stadi mo obei long Tok blong God. Sipos yu mekem olsem, bambae yu mekem ol waes desisen mo laef blong yu bambae i go gud.

TRAEM MEKEM OLSEM

Prea bifo we yu stadi. Baebol i tokbaot ol tingting blong Jehova, mo oli raetemdaon ol tingting ya blong givhan long yu. Nao taem yu ridim Baebol, i gud yu askem Jehova blong i halpem yu blong kasemsave ol tok we yu ridim, tingbaot olgeta, mo yusum olgeta blong mekem ol desisen long laef blong yu. —Esra 7:10.
Askem kwestin long yu wan taem yu ridim Baebol o wan buk o magasin we i stanap long Baebol. Eksampol: ‘?Haf ya i tijim wanem long saed blong Jehova? ?Olsem wanem save ya i joen wetem stamba mesej blong Baebol? ?Olsem wanem mi save yusum save ya blong tijim narafala?’
Tingting dip long samting we yu stadi long hem. Yu stop smol, mo yu tingting gud bakegen long samting we yu jes ridim. Yu askem se: ‘?Wanem filing blong mi long samting ya? ?From wanem mi gat filing olsem? ?Olsem wanem i joen wetem samting we i bin hapen finis long mi, samting we i hapen long mi naoia, mo samting we bambae i hapen long mi long fiuja? ?Olsem wanem mi save folem ol rul blong Baebol o ol advaes ya long laef blong mi?’ (Job 23:5; Ol Sam 49:3) Taem yu tingting dip, traem luksave from wanem Jehova i talem long ol man blong hem blong oli no mekem sam samting. O traem tingbaot frut we bambae i kamaot, sipos man we yu jes ridim stori blong hem, i no obei long God. —Dutronome 32:28, 29.
Pijarem samting we yu ridim. Eksampol, yu traem pijarem samting we i hapen long Josef, taem ol brata blong hem oli salem hem i go long ol laen blong Ismael. (Jenesis 37:18-28) ?Yu yu luk wanem? ?Yu harem wanem? ?Yu smelem wanem? Traem putum yu wan long ples blong ol man ya. ?Wanem tingting blong olgeta mo filing blong olgeta? Taem yu pijarem ol samting ya, bambae stadi blong yu i kam klia moa.
Yusum ol tul blong stadi we ogenaesesen i givim. Hemia i save mekem se stadi blong yu i laef. Lanem blong yusum ol tul we i gat long lanwis blong yu, we oli printim o we i stap long Intenet. Yu no mas fraet blong askem ol narafala blong oli givhan long yu blong yusumgud ol tul ya. Eksampol, ol tul olsem Watch Tower Publications Index o Buk Blong Mekem Risej. Tul ya i save givhan long yu blong faenem ol save long saed blong wan topik, mo i eksplenem plante vas blong Baebol. Yusum apendiks blong New World Translation of the Holy Scriptures sipos i gat long lanwis we yu kasemsave. Hem i givim ol gudfala infomesen long saed blong ol ples, ol samting we oli bin hapen bifo, wet mo mesamen blong ol samting, mo ol narafala samting bakegen.
Tingbaot ol impoten poen we yu lanem. Hemia bambae i givhan long yu blong rimemba ol samting we yu jes stadi long hem. Mo tu yu save tokbaot long ol narafala. Maet yu save yusum ol impoten poen ya long wok blong prij. Sipos yu mekem olsem, bambae yu tingbaot ol poen ya, mo stadi we yu mekem bambae i givhan long ol narafala tu.