Givhan Long Ol Wokman Long Hospital We Oli Stap Stres
Brin, we i stap long North Carolina, Amerika, i wok long Komiti Blong Toktok Wetem Dokta, hemia wan komiti we i wok wetem ol hospital blong lukaot long nid blong ol Witnes blong Jehova we oli sik.
From sik ya COVID-19, plante hospital oli no letem ol visita oli kam insaed. Brin i ring i go long daerekta we i givhan long ol sikman mo famle blong olgeta blong oli kasem help blong jos, long wan hospital long ples blong hem. Hem i wantem faenemaot olsem wanem hem i save givhan long ol Witnes we oli slip long hospital ya.
Brin i no gat janis blong toktok wetem daerekta stret, be hem i toktok wetem namba tu daerekta. From we oli no letem ol visita oli kam long hospital, Brin i askem sipos hem i save pasem fon namba blong hem long ol Witnes long hospital, blong hem i save toktok long olgeta. Man ya i talem se yes bambae hem i mekem olsem.
Brin i tingbaot olgeta we oli wok long hospital tu. Hem i talem tangkiu long man ya from wok we olgeta long hospital oli stap mekem, mo hem i hop se evriwan oli helti. Mo hem i talem se hem i bin ridim sam ripot long saed blong samfala mo speseli olgeta we oli stap wok long hospital, se oli stap stres bigwan long taem blong pandemik ya.
Man ya i agri se COVID-19 i mekem olgeta long hospital oli stres bigwan.
Brin i talem se: “Websaet blong mifala i gat ol save blong givhan long ol man we oli stap traehad blong winim stres. Sipos yu go long jw.org mo yu taepem ‘stres’ long ples we i talem Lukaotem, bambae yu faenem sam gudfala atikol blong givhan long olgeta we oli wok long hospital.”
Taem tufala i stap toktok, man ya i go long websaet ya, mo i taepem “stres” long ples we i talem Lukaotem, nao hem i luk plante atikol long saed blong stres. Hem i talem se: “!Man i gud we! Bae mi soem long daerekta. Hemia bae i givhan long olgeta we oli wok long ples ya mo ol narafala tu. Bae mi printim ol kopi mo seremaot.”
Sam wik biaen, Brin i toktok wetem daerekta, mo hem i talem se oli bin printim sam kopi blong ol atikol ya long stres mo sam narafala samting olsem. Oli seremaot ol atikol ya long ol nes mo ol narafala we oli wok long hospital.
Brin i talem se: “Daerekta i talem tangkiu long mi from wok blong yumi, mo ol gudfala save long ol atikol ya. Oli givhan bigwan long olgeta.”