OL YANGFALA OLI ASKEM
?Olsem Wanem Mi Save Lego Fasin Blong Gat Tu Fes?
Samtaem, sam man blong God oli harem se oli westem taem mo paoa blong olgeta blong folem ol rul blong Baebol. (Ol Sam 73:2, 3) Maet oli stat blong mekem ol samting we i agensem loa blong Jehova, mo oli traem haedem long ol narafala.
Atikol ya i blong halpem olgeta we maet oli stat blong mekem olsem mo oli wantem stop.
Long pej ya
?I minim wanem blong gat tu fes?
Gat tu fes i min se taem yu stap wetem ol fren blong yu we oli no obei long Jehova, yu mekem ol samting we yu save se i rong. Be taem yu stap wetem ol brata mo sista, yu mekem olsem se yu wantem obei long Jehova. Hemia i olsem se yu gat dabol laef, mo yu stap haedem samting long narafala.
“Taem yu gat tu fes, yu stap haedem samting long evriwan, ol fren blong yu mo ol brata mo sista tu, nao i no gat man i save gud yu. Blong talem stret, yu stap giaman long evriwan.”—Erin.
?Yu yu save? Gat tu fes i save minim tu se man i mekem samting we Jehova i no laekem taem hem i stap hem wan.
“Taem mi gat 14 yia, mi stat blong lukluk ol rabis pija long Intenet. Long fored blong ol narafala, mi stap mekem olsem se mi no laekem nating ponografi, be long hat blong mi, mi laekem nomo.”—Nolan.
Advaes blong Baebol: “I no gat man we i save kam slef blong tu masta wantaem, from we bambae hem i agensem wan mo i laekem narawan, o bambae hem i fren gud long wan be i stap tok nogud long narawan.”—Matiu 6:24.
Sipos mi gat tu fes, ?hemia i min se mi mi wan rabis man?
Maet i no olsem. I tru, samfala oli mekem desisen blong no folem ol rul blong Baebol long laef blong olgeta. ?Yu yu rili olsem? ?O i gat wan narafala risen from wanem yu gat tu fes? Olsem:
Yu yu fraet blong stap defren long ol fren blong yu.
Yu harem se yu joen gud moa wetem ol fren blong yu long skul i bitim olgeta long kongregesen.
Yu harem se yu no naf blong folem olgeta komanmen blong God.
“Mi ting se sam yangfala we oli gat tu fes, oli harem gud blong stap wetem olgeta we oli no gat sem bilif, from se oli wantem tumas blong joen long wan grup, nomata se i weswan.”—David.
I tru, ol samting we yumi tokbaot i no ol gudfala risen blong gat tu fes. Be, i givhan blong kasemsave from wanem ol gudfala man tu oli mekem mastik ya. Sipos i hapen long yu, ?yu save mekem wanem?
?Olsem wanem mi save lego fasin blong gat tu fes?
1. Skelem laef blong yu naoia. Tingbaot ol kwestin ya: ‘?Mi mi rili wantem gohed olsem? Sipos mi gohed, ?wanem bambae i kamaot from?’
Advaes blong Baebol: “Man we i tingting gud, i luksave we trabol i stap kam . . . , be man we i no gat ekspiriens, hem i gohed nomo, i no wantem save, mo biaen i safa from.”—Ol Proveb 27:12.
2. Tok tru. Toktok wetem papa mo mama blong yu o wan fren we i bigman long ol Kristin fasin mo i respektem ol loa blong Jehova. Bambae oli glad se yu askem help long olgeta. Mo, !bambae oli praod blong luk se yu wantem mekem samting we i stret!
Sipos yu stap foldaon long trap ya blong gat tu fes, askem help
“Mi harem se i had blong talemaot mastik blong mi long narafala, be taem mi mekem, mi harem gud.”—Nolan.
Advaes blong Baebol: “Man we i stap haedem ol sin blong hem, bambae hem i no win, be man we i talemaot ol sin blong hem, mo i lego olgeta, bambae ol narafala oli sore long hem.”—Ol Proveb 28:13.
3. Akseptem nogud frut we i kamaot from. Tingbaot se, from we yu haedem wan samting long papa mo mama blong yu mo long olgeta long kongregesen, bambae i had blong oli trastem yu. Nao blong smoltaem, maet papa mo mama blong yu wetem ol elda long kongregesen oli no letem yu blong mekem sam samting. Yu mas akseptem samting ya, mo gat strong tingting blong “mekem i stret nomo long olgeta samting,” stat naoia i go.—Hibru 13:18.
Advaes blong Baebol: “Yu mas lesin long advaes, mo yu akseptem we man i stretem yu, olsem nao, long fiuja bambae yu kam waes.”—Ol Proveb 19:20.
4. Bildim wan strong bilif se God i lavem yu. From we Jehova i lavem yu, hem i save gud evri samting we yu stap mekem. Taswe, taem yu gat tu fes, hem i save, mo hemia i mekem hem i harem nogud. Be, “from we hem i kea long [yu],” hem i wantem tumas blong halpem yu blong folem stret rod.—1 Pita 5:7.
Advaes blong Baebol: “Ae blong Jehova i stap lukluk raon long olgeta ples long wol, blong hem i save soemaot paoa blong hem blong givhan long olgeta we hat blong olgeta i stap fulwan long hem.”—2 Kronikel 16:9.