?Ol Gavman Oli Save Wok Tugeta Mo Blokem Bigfala Disasta Long Weta? ?Baebol i Talem Wanem?

Long Sande 20 Novemba 2022, konfrens blong COP27 United Nations Climate Change i finis. Ol lida mo ol man blong stadi we oli joen long konfrens ya, oli agri blong givim mane long ol pua kantri blong givhan long olgeta, blong fesem ol trabol we i kamaot from weta i jenis. Be plante oli luksave se samting ya bambae i no stretem stamba blong trabol ya.

• Long 19 Novemba 2022, António Guterres we i sekretari-jenerol blong Yunaeted Nesen, i talem se: “Mi mi glad se yumi mekem desisen blong givim mane blong sapotem olgeta we oli stap kasem trabol from weta i jenis. Be yumi save se hemia bambae i no naf . . . Planet blong yumi i sik mo yumi mas mekem wan samting kwiktaem.”

• “I no longtaem, maet yumi luk wan bigfala disasta long weta blong wol, we bambae i spolem yumi evriwan.”—Mary Robinson, presiden blong Aealan bifo mo UN Hae Komisna Long Raet Blong Ol Man bifo, 20 Novemba 2022.

Ol yangfala oli wari moa long saed blong fiuja blong planet. ?Olsem wanem? ?Ol gavman oli save wok tugeta mo holemtaet promes we oli mekem blong stretem ol problem blong weta? ?Baebol i talem wanem?

?Ol gavman bambae oli joen mo winim trabol ya?

Baebol i talem se ol gavman bambae oli no naf blong stretem evri trabol long saed blong envaeronmen, nating se oli traehad bigwan. Makem tufala risen ya:

• “Samting we i kruked, man i no save stretem.”—Prija 1:15.

  Mining: Ol gavman oli no save mekem evri samting we oli wantem, from we man i no naf blong rulum narafala man bakegen. (Jeremaea 10:23) Nating sipos ol gavman oli joen blong wok tugeta, mo oli traem bes blong olgeta blong stretem ol trabol long wol, be bambae oli no naf blong mekem.

• “Bambae ol man oli tingbaot olgeta nomo, oli laekem mane tumas, . . . oli no save agri long wan tingting.”—2 Timoti 3:2, 3.

  Mining: Baebol i talemaot finis se plante man long taem blong yumi bambae oli tingbaot olgeta nomo, mo oli no wantem wok wetem narafala blong mekem laef blong ol man i kam gud moa.

Wan risen blong gat hop

Fiuja blong wol i no dipen long promes blong ol gavman. God i putumap wan man we i naf blong rul, hemia Jisas Kraes. Baebol i tokbaot hem se:

• “Rul blong gavman bambae i stap long solda blong hem. Bambae oli singaot hem long ol nem ya, Nambawan Advaesa, God We i Gat Paoa, Papa We i Stap Olwe, mo Prins Blong Pis.”—Aesea 9:6, futnot.

Jisas i King blong Kingdom blong God, we i wan gavman long heven. (Matiu 6:10) Jisas i gat paoa, i waes, mo i wantem tumas blong lukaot gud long wol mo olgeta man we oli laef long hem. (Ol Sam 72:12, 16) Aninit long rul blong hem, gavman ya we i stap long heven bambae i spolem ol man ya we oli stap “spolem wol,” mo i mekem planet mo envaeronmen i kam gud bakegen.—Revelesen 11:18; Aesea 35:1, 7.

Blong faenemaot wanem bambae i rili stretem ol trabol blong envaeronmen, ridim atikol ya “Weta i Jenis—Fiuja Blong Yumi Mo Samting We Baebol i Talem.”