God i Kea Long Olgeta We Sora Blong Olgeta i Fas

Raon long wol, i gat samwe 70 milian man we sora blong olgeta i fas, mo i gat bitim 200 defren saen lanwis we oli stap yusum. Be sore tumas, plante man oli stap tritim nogud olgeta we sora blong olgeta i fas. Hemia sam samting we ol ripot oli soemaot:

• “Raon long wol, plante man oli ting nating long ol loa we i protektem raet blong olgeta we sora blong olgeta i fas.”—National Association of the Deaf (Yunaeted Stet).

• “Long ol pua kantri, ol man we oli pua moa long ol narafala, hemia olgeta we sora blong olgeta i fas. Plante taem i had blong oli kasem gudfala edukesen, wok, mo ol impoten save.”—World Federation of the Deaf.

?God i gat wanem tingting long olgeta we sora blong olgeta i fas? ?Baebol i talem wanem long saed blong olgeta? ?Mo ol Witnes blong Jehova oli stap mekem wanem blong givhan long olgeta?

Tingting We God i Gat Long Olgeta We Sora Blong Olgeta i Fas

Baebol i soemaot se Jehovaa God i kea long olgeta we sora blong olgeta i fas. Hem i wantem se ol man oli tritim gud olgeta, mo blong oli kasem save long ol tijing blong hem.

Vas: “Yufala i no mas singaot trabol i kam long wan man we sora blong hem i fas.”—Levitikas 19:14.

Vas: “God i stap mekem i sem mak nomo long olgeta man.”—Ol Wok 10:34.

Vas: “Jisas i stap wokbaot, . . . i stap talemaot gud nius blong Kingdom.”—Matiu 9:35.

Vas: Jisas “i mekem man we sora blong hem i fas, i harem, mo man we i no save toktok, i toktok.”—Mak 7:37.

Vas: “Olgeta we sora blong olgeta i fas, bambae i no moa fas.”—Aesea 35:5.

Mining: Jehova i talem se long fiuja, olgeta we sora blong olgeta i fas bambae oli save harem.—Aesea 29:18.

Ol Witnes Blong Jehova Oli Stap Halpem Olgeta We Sora Blong Olgeta i Fas

Raon long wol, ol Witnes blong Jehova oli stap talemaot mesej ya blong hop, long olgeta tu we sora blong olgeta i fas. ?Mifala i stap mekem wok ya olsem wanem? Mifala i wokem Baebol mo ol narafala video blong stadi long Baebol long bitim 100 saen lanwis. Mo mifala i yusum saen lanwis blong tijim ol man long Baebol mo mifala i yusum tu long ol miting blong mifala. Ol samting ya oli fri nomo long eni man we i wantem blong save God. ?From wanem? From we Jisas i talem se: “Yufala i kasem fri nomo, mo yufala i mas givim fri nomo.”—Matiu 10:8.

Yu save go long tufala ples ya we i stap daon, blong luk ol samting ya long saen lanwis long intenet, o daonlodem i go long fon o tablet blong yu:

JW.ORG. Insaed long websaet ya, yu save klik long smol bokis blong lanwis we i stap antap, blong jusum saen lanwis we yu stap lukaotem.

JW Library Sign Language app. App ya i fri nomo mo yu save daonlodem i go long fon blong yu, blong yu save wajem o daonlodem ol video long saen lanwis.

?Wanem Sam Samting We Mifala i Wokem Long Saen Lanwis?

Baebol. Faswan Baebol long wol we oli transletem fulwan i go long saen lanwis, hemia Baebol ya Niu Wol Translesen long Saen Lanwis Blong Amerika. Naoia ful Baebol ya Niu Wol Translesen o sam haf blong hem i kamaot long ol defdefren saen lanwis, mo evri yia mifala i stap ademap sam moa lanwis. (Blong luk lis blong ol defdefren saen lanwis o blong wajem Baebol long saen lanwis, yu luk bokis ya “Baebol ya Niu Wol Translesen long Saen Lanwis.”)

• Wajem video ya The Complete New World Translation Is Available in ASL blong luk bigfala wok we oli mekem blong transletem Baebol i go long saen lanwis.

• Sipos yu wantem glad moa long Baebol riding blong yu, daonlodem app ya JW Library Sign Language. App ya i mekem se i isi blong go stret long vas we yu wantem wajem long saen lanwis.

• Dmytro mo Vita, sora blong tufala i fas, be ol pikinini blong tufala oli save harem. Famle blong olgeta i stap wajem Baebol long saen lanwis evri dei. Traem luk olsem wanem hemia i givhan long olgeta.

Ol video blong stadi long Baebol. Ol Witnes blong Jehova oli wokem ol video long saen lanwis blong halpem ol man blong kasem save long Baebol, mo blong folem ol advaes blong hem we i save givhan long . . .

• Olgeta we oli mared mo ol famle

• Ol yangfala

• Ol smol pikinini

Baebol kos wetem ol man wanwan. Sipos yu wantem kasem save long Baebol, wan man we i save saen lanwis i save givhan long yu. Askem wan Witnes blong i soem long yu olsem wanem oli stap mekem Baebol kos ya.

Jeson Senajonon i laef long Filipin. Traem luk olsem wanem Baebol kos ya i givhan long hem blong i kam klosap long God.

Bifo, Mario Antúnez i pasta blong wan jos long Honduras. Traem luk olsem wanem hem i faenem ansa blong ol kwestin we hem i gat long saed blong Baebol. Ridim stori blong hem we i stap long atikol ya, “Mi Gat Moa Kwestin i Bitim Ol Ansa.”

Ol miting mo ol program. Raon long wol, mifala i gat ol kongregesen mo ol grup we oli yusum saen lanwis, blong olgeta we sora blong olgeta i fas oli save kam wanples evri wik blong wosip mo lanem samting. Mo tu, evri yia mifala i oganaesem ol bigfala program long saen lanwis blong tijim ol man long Baebol. Long ol miting mo ol bigfala program olsem, mifala i save givhan tu long olgeta we sora blong olgeta i fas mo long semtaem oli blaen, blong oli kasemsave samting. Mo mifala i wokem ol buk long braille tu blong givhan long ol blaen man. Ol buk ya oli fri nomo.

• Faenem wan kongregesen klosap long yu.

• Lanem moa long saed blong ol asembli blong mifala.

• Kam long Memoriol blong tingbaot ded blong Jisas, hemia wan long ol impoten lafet we mifala i stap mekem evri yia.

José Luis Ayala i laef long Meksiko. Taem hem i bon, sora blong hem i fas mo biaen hem i blaen. Faenemaot olsem wanem hem i kam wan gudfala tija blong Baebol.