Ol Man Oli No Moa Trastem Ol Lida Blong Politik—?Baebol i Talem Wanem?

Long 2024 bambae i gat plante moa eleksen raon long wol i bitim olgeta yia we i pas. Be plante man oli no moa trastem ol lida blong politik.

• Wan ripot i soemaot se bighaf blong ol man long Amerika oli talem se “plante lida blong politik oli tingbaot olgeta nomo” i bitim we oli givhan long ol man.a—Ripot we i kamaot long Pew Research Center, 19 Septemba 2023.

Plante yangfala tu oli no moa trastem ol lida blong politik.

• “Plante yangfala oli wantem faenem ol rod blong stretem ol bigfala problem long wol, be ol ripot oli soemaot se oli no trastem ol lida blong politik blong stretem ol problem ya.”—Ripot we i kamaot long The New York Times, 29 Jenuware 2024.

• “Wan ripot i soemaot se ol yangfala oli trastem moa ol man we oli stap postem ol video long sosol media, i bitim we oli trastem ol lida blong politik.”—Ripot we i kamaot long The Korea Times, 22 Jenuware 2024.

?I stret blong trastem ol lida blong politik? ?Hu nao we yumi save trastem?

Yu no kwik blong trastem wan man

I stret nomo we ol man oli no hariap blong trastem narafala. Baebol i talem se “man we i no save samting, i bilif long evri toktok, be man we i tingting gud, hem i skelem gud wanwan step blong hem.”—Ol Proveb 14:15.

• Blong kasem ol advaes we i save givhan long yu blong jekem sipos ol infomesen we yu kasem oli tru o nogat, ridim atikol ya “Blokem Ol Rong Infomesen.”

Mo tu, nating se sam lida blong politik oli gat gudfala tingting, be oli no naf blong mekem olgeta samting we oli wantem blong mekem. Taswe Baebol i talem se:

• “Yufala i no mas trastem ol lida blong wol ya. Olgeta oli no save sevem yufala.”—Ol Sam 146:3, Baebol Long Bislama.

Wan lida we yu save trastem

Baebol i talem se God i putumap wan lida we i gat bigfala paoa mo yumi save trastem hem fulwan, hemia Jisas Kraes. (Luk 1:32, 33) Jisas i King blong Kingdom blong God, hemia wan gavman we i stap long heven.—Matiu 6:10.

• Blong faenemaot from wanem yu save trastem Jisas mo samting we bambae hem i mekem blong stretem ol problem long wol, ridim tufala atikol ya “?Hu i King Blong Kingdom Ya?” mo “?Kingdom Blong God Bambae i Mekem Wanem?”