Fren Gud Wetem Narafala Blong Winim Filing Ya Se Yu Stap Yu Wan—Baebol i Save Givhan

Long 2023, ol man we oli wok long saed blong helt oli luksave se filing ya we man i harem se hem i stap hem wan, i wan bigfala problem we oli mas traehad blong winim. ?Olsem wanem? ?I gat rod blong winim problem ya?

• Dokta Vivek Murthy we i hed blong ol dokta long Yunaeted Stet, i talem se: “Taem yumi no joen wetem ol narafala mo yumi harem se yumi stap yumi wan, hemia i save spolem helt blong yumi mo i mekem se yumi no moa glad.” Be hem i eksplenem se yumi save winim filing ya. ?Yumi save winim olsem wanem? Hem i se: “Yumi save mekem sam smosmol samting evri dei blong fren gud wetem ol narafala.”a

Samfala oli harem se oli stap olgeta wan from we oli no joen wetem ol narafala. Sam narafala oli gat filing ya tu nating se oli stap wetem ol narafala. Be ol advaes blong Baebol oli save givhan long yumi blong winim filing ya. Ol advaes ya oli save halpem yumi blong fren gud wetem ol narafala mo no moa harem se yumi stap yumi wan.

Ol advaes blong Baebol we i save givhan

Storian gud tugeta. Hemia i minim se yu mas talemaot ol filing blong yu mo yu lesin gud long narafala. Taem yu soemaot se yu kea long narafala, hemia bambae i mekem se yutufala i fren gud moa.

• Advaes blong Baebol: “Yufala i no mas tingbaot yufala nomo, be yufala i mas tingbaot ol narafala man tu.”—Filipae 2:4.

Faenem sam moa fren. Traehad blong kam fren blong olgeta we oli olfala moa o yang moa long yu, o we kalja o kantri blong olgeta i defren.

• Advaes blong Baebol: “Yufala i mas openem hat blong yufala moa.”—2 Korin 6:13.

Blong lanem olsem wanem blong fren gud wetem narafala, ridim atikol ya “Satisfying Our Hunger for Friendship.”