Wan Mesej We Baebol i Givim Long Yu—!Hop Blong Ol Refuji!

Evri yia plante milian man oli mas ronwe long ples blong olgeta blong stap sef. ?Yu tu yu stap fesem wan trabol olsem? Sipos yes, tingbaot se yu save gat help blong winim. God i givim hop ya se bambae yu save gat wan gudfala laef. Bambae yu kasem save moa long hop ya sipos yu lukluk long Baebol.

Christos Stylianides we i wok wetem European Union,a i talem se: “Ol refuji mo ol narafala we oli mas aot long ples blong olgeta,b oli nidim help blong yumi naoia, mo tu . . . oli nidim hop blong fiuja.” Taem man i gat hop, hem i naf blong holem gudfala tingting long saed blong fiuja. Antap long hop ya, ol refuji oli nidim ol gudfala toktok blong mekem filing mo tingting blong olgeta i kam gud.

“Taem mi mas ronwe long kantri blong mi mo ol famle blong mi, hat blong mi i brok mo mi harem nogud bitim mak. Mi fraet we mi fraet, mi krae, mo mi wari tumas.”—Emmanuel, Haiti.

?Yu tu yu harem olsem? Sipos yu bin ronwe long ples blong yu, yu nidim ol gudfala toktok blong leftemap tingting mo givim hop. ?Olsem wanem Baebol i save halpem yu?

Baebol i Leftemap Tingting

Baebol i talem se: “Jehovac . . . i lavem ol man blong narafala kantri we oli stap wetem yufala.”—Dutronome 10:17, 18.

Baebol i talem se: “Jehova i stap klosap long olgeta we oli stap singaot i go long hem.”—Ol Sam 145:18.

Baebol i talem se: “Neva tru God i gat tingting blong mekem samting we i nogud . . . God Ya We i Gat Olgeta Paoa i no save gowe long jastis.”—Job 34:10, 12.

Hemia i min se i no God we i mekem yu yu safa. Hem i no stap panisim yu, mo i no stap putum ol trabol long yu blong traem yu.

Baebol i Givim Hop

Baebol i eksplenem samting we God bambae i mekem long fiuja. Luk olsem wanem hop ya i stap givhan long plante man we oli mas ronwe long ples blong olgeta.

Baebol i talem se: “[God] bambae i ravemaot wota blong ae blong olgeta, mo bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem.”—Revelesen 21:4.

Hemia i min se bambae yumi no moa safa. God i promes se, bambae hem i finisim olgeta trabol we i mekem yu yu harem se i no gat hop.

“I no longtaem, God bambae i finisim ol nogud fasin we narafala i mekem long yumi, mo ol rabis samting we i stap hapen raonabaot long yumi. Hop ya i givhan long mi blong putum tingting blong mi long taem ya we bambae mi no moa safa.”—Karla, El Salvado.

Baebol i talem se: “Ol man bambae oli no moa tingbaot ol samting blong bifo, mo bambae oli no kam nating long hat blong olgeta.”—Aesea 65:17.

Hemia i min se bambae yumi no moa tingbaot ol nogud samting we i bin hapen long yumi. God bambae i meksua se tingting blong yu i no moa trabol from ol nogud samting we i hapen bifo.

“Baebol i promes se ol trabol we i mekem yumi harem nogud from ol fren mo famle we yumi lusum, bambae i no moa kam long tingting blong yumi nating. Hop ya i givhan long mi blong gotru long hadtaem ya, from we mi save se i no longtaem ol samting ya bambae oli jenis.”—Natalia, Ukren.

Baebol i talem se: “God blong heven bambae i stanemap wan kingdom we . . . i smasem mo i finisim olgeta kingdom ya.”—Daniel 2:44.

Hemia i min se wan gavman we i stret gud olgeta bambae i rulum wol. I no longtaem, God bambae i mekem se gavman blong hem we i stap long heven i tekem ples blong ol gavman blong man long wol. Gavman blong hem bambae i putum tru pis mo stret fasin long wol, nao ol man bambae oli stap sef gud mo oli gat evri samting we oli nidim.—Maeka 4:3, 4.

“Mi kasem paoa blong gohed taem mi tingbaot se i no longtaem, Kingdom blong Jehova bambae i finisim ol problem, olsem, mekem i strong long narafala, mekem i defren long samfala, no trastem narafala, mo agensem samfala from kala o kantri blong olgeta.”—Mustafa, Medel Is.

Waes We i Stap Long Baebol

Ol waestok we i wok gud long laef blong yumi, i save halpem yu, nao sloslo yu save harem gud bakegen. Waestok ya i save halpem yu blong lan long ol jenis long laef blong yu, we i minim tu olting we yu lusum. Makem gud olsem wanem ol waestok ya i save givhan long ol refuji:

Baebol i talem se: “Man i save gat fulap samting, be ol samting ya oli no save givim laef long hem.”—Luk 12:15.

?Olsem wanem ol waestok ya i save givhan long yu?: Ating yu sek nogud long samting we i hapen long yu mo yu harem nogud bitim mak blong lusum evri samting blong yu. Be sipos yu tekem smoltaem blong tingbaot olsem wanem laef blong yu i sas moa, maet yu no harem nogud tumas long olting we yu lusum.

“Laef i moa impoten i bitim ol sas samting. Sam samtaem long laef blong yumi, olting mo mane oli no save givhan long yumi.”—Natalia, Ukren.

Baebol i talem se: “Yu no mas talem se: ‘?From wanem ol dei we oli pas finis, oli gud moa long hemia?’”—Prija 7:10.

?Olsem wanem ol waestok ya i save givhan long yu?: Maet laef blong yu i had naoia, be i moa gud yu no skelem wetem laef blong yu bifo. Hemia i save halpem yu blong harem gud smol.

“Taem mi traehad blong glad long laef blong mi naoia, mi save holem wan tingting we i moa gud long saed blong fiuja.”—Eli, Rwanda.

Baebol i talem se: “Sipos yumi gat kakae blong yumi mo klos blong yumi, hemia i naf, yumi save harem gud.”—1 Timoti 6:8.

?Olsem wanem ol waestok ya i save givhan long yu?: Traehad blong glad se yu gat ol samting we yu nidim. Sipos yu harem gud olsem, bambae yu no wari tumas, mo ol filing blong yu bambae oli no olbaot.

“Baebol i stap givhan long mi blong jenisim tingting blong mi, nao mi no moa tingting tumas long ol samting we mi lusum. Mi mo waef blong mi, mitufala i glad nomo blong stap laef mo blong stap long wan sefples.”—Ivan, Ukren.

Baebol i talem se: “Olgeta samting we yufala i wantem blong ol man oli mekem long yufala, yufala tu i mas mekem long olgeta.”—Matiu 7:12.

?Olsem wanem ol waestok ya i save givhan long yu?: Ating bambae yu joen gud wetem ol narafala sipos yu traehad blong gat longfala tingting mo kaen long olgeta. Hemia i save mekem se oli no agensem yu, mo i save halpem ol man we yu stap wetem olgeta blong oli akseptem yu olsem wan long olgeta.

“Bighaf blong ol man oli glad taem yu soemaot respek mo lav, mo yu kaen long olgeta. Hemia i mekem se yu save fren gud wetem ol man long kantri we yu go stap long hem.”—Angelo, Sri Lanka.

Baebol i talem se: “Yufala i mas askem olgeta samting we yufala i wantem long God . . . [nao] pis ya blong God . . . bambae i lukaot gud long hat mo tingting blong yufala.”—Filipae 4:6, 7.

?Olsem wanem ol waestok ya i save givhan long yu?: Prea long God mo tokbaot ol filing, ol nid, ol fraet, mo ol wari blong yu. Ol prea olsem oli save daonem wari nao yu no harem nogud tumas long laef blong yu.

“Mi prea long God taem mi gat problem, mo hem i ansa long mi. Samting we mi lanem long Baebol i putum bigfala pis long tingting blong mi.”—Yol, Saot Sudan.

“Gudfala advaes blong Baebol i halpem mi blong gat pis long hat blong mi, we mi nidim blong winim hadtaem ya long laef blong mi.”—Valentina, Ukren.

“Taem mi tingbaot promes blong Jehova God blong givim wan gudfala laef long yumi long fiuja, mi kasem paoa blong stanap strong.”—Emmanuel, Haiti

?Yu wantem save moa long ol promes blong Baebol we oli leftemap tingting mo givim hop long yumi, mo from wanem yu save trastem olgeta? Askem sipos wan Witnes blong Jehova i save kam visitim yu. Bambae oli glad blong halpem yu.