?Wanem Fasin Blong Wan Kristin?—?Baebol i Talem Wanem?

Tede plante man long ol defren ples long wol oli praod blong talem se oli Kristin. Be ol semfala man ya oli mekem ol samting we i spolem ol narafala. Sam oli tingbaot olgeta nomo, oli giaman mo stil, mo oli no kaen. Sam narafala oli no stap tru long hasban o waef blong olgeta. Plante man we oli luk ol fasin blong olgeta oli askem se: ‘?Wanem nao fasin blong wan trufala Kristin?’

Fasin blong wan trufala Kristin

I isi blong man i talem se hem i wan Kristin. Be hemia i no naf. Folem ol tok blong Baebol, wan Kristin hem i wan disaepol blong Jisas Kraes. (Ol Wok 11:26) Jisas i talem se: “Sipos yufala i obei oltaem long ol tok blong mi, yufala i prapa disaepol blong mi.” (Jon 8:31) I tru, i no gat wan man we i save obei long fasin we i stret gud olgeta. Be wan Kristin i traehad blong folem ol tijing blong Jisas long laef blong hem evri dei. Hemia sam long olgeta.

Wan Kristin i tingbaot narafala fastaem mo soemaot lav

Samting we Jisas i talem: “Mi mi givim wan niufala komanmen long yufala, se yufala i mas lavlavem yufala. Olsem we mi lavem yufala, ale long sem fasin, yufala tu i mas lavlavem yufala. Sipos yufala i lavlavem yufala, bambae olgeta man oli save se yufala i disaepol blong mi.”—Jon 13:34, 35.

Samting we Jisas i mekem: Jisas i tingbaot ol narafala fastaem mo i soemaot lav long olgeta, nomata se oli haeman o man nating, oli rij o oli pua, o oli kamaot long defdefren laen. Hem i mekem ol sikman oli kam gud, i givim kakae long olgeta we oli hanggri, mo hem i givim laef blong hem tu blong sevem ol narafala.—Matiu 14:14-21; 20:28.

Samting we Kristin i mekem: Wan Kristin i tingbaot ol narafala fastaem mo i soemaot lav long olgeta. Hem i mekem olsem taem hem i gat gladhat blong givim presen, i mekem i sem mak long olgeta man, mo i fogivim narafala. Hem i givhan long ol man we oli trabol, mo i rere blong lego samting we i impoten long hem wan blong i givhan long narafala.—1 Jon 3:16.

Wan Kristin i no giaman mo i no stil

Samting we Jisas i talem: “Mi nao trutok ya.”—Jon 14:6.

Samting we Jisas i mekem: Jisas i tok tru oltaem mo i no mekem ol giaman fasin. Hem i no traem trikim narafala blong mekem samting we Jisas i wantem, o blong bilivim samting we i no tru. Ol man oli save se Jisas i no giaman mo i no stil, nating se samfala oli agensem hem from.—Matiu 22:16; 26:63-67.

Samting we Kristin i mekem: Wan Kristin i no giaman. Hem i pem takis, i no stil, mo i wok had blong kasem pei from wok blong hem. (Rom 13:5-7; Efesas 4:28) Hem i no trikim narafala blong kasem samting blong hem wan nomo, i no stilim ansa blong narafala long ol eksam, mo i no giaman taem i fulumap pepa blong kasem wok o narafala impoten pepa olsem.—Hibru 13:18.

Wan Kristin i kaen long ol narafala

Samting we Jisas i talem: “Yufala evriwan we i stap hadwok tumas mo yufala i stap karem ol hevi samting, yufala i kam long mi, mo bambae mi mi mekem we yufala i kasembak paoa. Yufala i mas putum yok blong mi long solda blong yufala, blong yufala i wok wetem mi, mo yufala i lan long mi, from we mi mi wan kwaet man mo tingting blong mi i stap daon, nao bambae yufala i save harem gud long laef blong yufala. From we yok blong mi i isi nomo blong man i karem, mo ol samting we mi askem long yufala blong yufala i karem, oli no hevi.”—Matiu 11:28-30.

Samting we Jisas i mekem: Jisas i kaen mo ol man oli no fraet blong kam storian wetem hem. Hem i glad blong joen wetem ol pikinini, i leftemap tingting blong ol man we oli harem nogud, mo i soemaot respek long ol narafala.—Mak 10:13-15; Luk 9:11.

Samting we Kristin i mekem: Wan Kristin i toktok kaen long ol narafala, i no spolem olgeta o tok nogud long olgeta. (Efesas 4:29, 31, 32) Hem i intres long ol narafala, mo taem i gat janis hem i givhan long olgeta.—Galesia 6:10.

Wan Kristin i stap tru long hasban o waef blong hem

Samting we Jisas i talem: “Samting we God i joenem, man i no mas seraotem.”—Mak 10:9.

Samting we Jisas i mekem: Jisas i no mared, be hem i talem long ol narafala se oli mas stap tru long hasban o waef blong olgeta. (Matiu 19:9) Hem i givim woning long saed blong ol samting we i save spolem mared.—Matiu 5:28.

Samting we Kristin i mekem: Wan Kristin i ona long hasban o waef blong hem, mo i no mekem samting blong spolem fasin ya. (Hibru 13:4) Hasban mo waef tufala i lavlavem tufala mo soemaot respek long tufala.—Efesas 5:28, 33.