?Ol Witnes Blong Jehova Oli Agensem Vaksin?

Nogat. Ol Witnes blong Jehova oli no agensem vaksin. Mifala i ting se hemia desisen blong wanwan Kristin blong mekem. Plante Witnes oli jusum blong tekem vaksin.

Mifala i stap go luk ol dokta mo kasem tritmen long hospital, mo mifala i glad long ol niufala save we ol saentis oli faenemaot blong blokem ol strong sik. Mifala i talem tangkiu long ol dokta, ol nes, mo ol narafala we oli wok had long saed blong helt, speseli long taem we i gat wan bigfala sik i kamaot.

Ol Witnes oli obei long ol rul we ol bigman long saed blong helt oli mekem. Stat taem COVID-19 pandemik i kamaot, ol Witnes blong Jehova oli gohed blong rimaenem ol man long websaet ya we i stap long plante handred lanwis, se oli mas obei long ol rul long ples blong olgeta blong stap sef. Sam long ol rul ya, hemia: oli no mas go klosap tumas long ol narafala man, no mas joen long ol bigfala grup, oli mas kwarantin, wasem han, werem mask, mo sam narafala advaes we ol man we oli gat save long bisnes ya oli talem.—Rom 13:1, 2.

Plante yia finis, ol buk blong ol Witnes blong Jehova oli makemgud se:

• Wanwan man i mas mekem prapa desisen blong hem long saed blong helt.—Galesia 6:5.

  “[Magasin ya] i no talemaot wanem kaen meresin o tritmen we man i mas tekem, mo i no givim advaes long saed blong meresin, be i givim save nomo, nao man we i ridim i save skelem mo mekem prapa desisen blong hem.”—Wekap! (Inglis), 8 Februari 1987.

  “I stap long yu nomo blong mekem desisen se yu mo ol pikinini blong yu, bambae yufala i tekem vaksin o nogat.”—Wekap! (Inglis), 22 Ogis 1965.

• Mifala i tekem ol meresin mo kasem tritmen, from we mifala i luksave se laef i sas.—Wok 17:28.

  “Ol Witnes oli go luk ol gudfala dokta blong kasem help taem oli sik. Oli harem gud long laef, mo oli wantem mekem evri samting we oli save mekem mo we i laenap wetem Baebol, blong stap laef longtaem.”—Wajtaoa (Inglis), 1 Julae 1975.

  “Ol Witnes blong Jehova oli glad blong karem meresin mo tritmen we ol dokta oli givim. Ol Witnes oli wantem gat gud helt mo longfala laef. Sam Witnes blong Jehova oli dokta, olsem Kristin man ya Luk long taem bifo. . . . Ol Witnes blong Jehova oli talem tangkiu from hadwok blong ol dokta mo strong tingting blong olgeta blong wantem halpem ol man. Mo tu, ol Witnes oli harem gud taem ol dokta oli save givim tritmen we i halpem sik blong olgeta.”—Wajtaoa, 1 Februari 2011.