?Olsem Wanem Ol Witnes Blong Jehova Oli Kasem Trening Blong Mekem Wok Blong God?

Oltaem ol Witnes blong Jehova oli stap kasem trening long olgeta haf blong Kristin laef blong olgeta, hemia i minim wok blong prij tu we Jisas i talem long ol man blong hem blong mekem. Oli mas prij mo tijim ol man long gud nius blong Kingdom blong God. (Matiu 24:14; 28:19, 20) Oli kasem trening ya long ol miting blong olgeta evri wik, mo long ol asembli evri yia. Ol Witnes blong Jehova we oli gat wok insaed long kongregesen o oganaesesen, oli kasem moa trening long ol spesel Baebol skul.

Long atikol ya

?Ol Witnes blong Jehova oli kasem wanem trening?

Ol miting blong kongregesen. Evri wik, mifala i joen long tu miting long haos wosip blong mifala, we mifala i kolem Haos Kingdom. Wan miting i stap long medel wik, mo narawan long wiken. Eni man i save kam long tufala miting ya, mo i no gat kleksin.

Miting long medel wik. Mifala i lanem blong rid gud, storian gud wetem ol man, toktok long fored blong ol man, prij, mo tijim ol man. Mifala i kasem ol trening ya tru long ol tok, ol kwestin mo ansa, ol pleplei mo ol video. Trening ya i givhan long mifala blong kam gud moa blong serem ol save blong Baebol wetem ol narafala, mo stadi Baebol wetem ol wanwan man we oli wantem save moa. Trening ya i stap givhan long evriwan we oli kam long ol miting ya. Antap moa, ol miting oli mekem bilif blong mifala long God i kam strong, mo mifala i lavem moa God mo ol Kristin brata mo sista blong mifala.
Miting long wiken. Fas haf blong miting ya i wan Baebol tok we i blong ol man we oli no ol Witnes. Seken haf blong miting ya i kwestin mo ansa long wan haf blong Wajtaoa we i blong stadi.a Ol haf ya oli tokbaot ol topik blong Baebol mo ol advaes we i givhan long mifala long wok blong prij mo long prapa laef blong mifala.

Ol asembli. Evri yia, plante kongregesen oli joen wanples long tri defren asembli. Evriwan oli harem gud blong joen long ol asembli ya we stamba tok blong olgeta i kamaot long Baebol, oli lesin long ol tok, oli wajem ol pleplei, mo intaviu, mo ol video. Olsem ol miting, ol asembli tu oli halpem mifala blong kasem save moa long Baebol mo kam gud moa blong talemaot gud nius. Bakegen, eni man i save kam long ol asembli ya, mo i no gat kleksin.

Ol Baebol skul blong ol Witnes blong Jehova

Sam Witnes blong Jehova oli kasem invetesen blong joen long wan Baebol skul, blong kasem moa trening. ?Ol skul ya oli olsem wanem? ?Oli givhan olsem wanem long ol Witnes, mo oli blong hamas dei o wik? ?Hu i save joen long ol skul ya?

Skul Blong Ol Paenia

I givhan olsem wanem: I trenem olgeta we oli prij fultaem, hemia ol paenia,b blong oli kam gud moa blong prij mo tijim ol narafala. Long kos ya, i gat ol kwestin mo ansa long klasrum, ol pleplei, ol tok, mo sam woksap.
I gohed blong: Sikis dei.
Hu i save joen: Olgeta we oli mekem wok blong fultaem paenia blong wan yia finis, oli kasem invetesen. Olgeta we oli paenia longtaem finis be oli no joen long wan skul long faef yia we i pas, oli save kasem invetesen tu.

Tu studen blong Skul Blong Paenia i mekem wan pleplei mo ol narafala studen oli stap lesin gud.

Skul Blong Kingdom Ivanjelis

I givhan olsem wanem: I givim spesel trening long olgeta we oli mekem wok blong God fultaem blong plante yia, blong oli kam gud moa long wok blong prij mo tijim ol man, mo tu, oli spenem taem blong stadi dip long ol topik blong Baebol. Plante we oli joen long skul ya oli kasem invetesen blong go long ol ples we i nidim moa man blong prij.
I gohed blong: Tu manis.
Hu i save joen: Ol paenia oli save fulumap pepa blong askem blong joen long skul ya sipos oli kasem mak we oli naf, mo sipos oli save go wok long eni ples we i gat nid.

Skul Blong Ol Elda

I givhan olsem wanem: I givhan long ol eldac blong oli lukaot gud long ol wok blong olgeta long kongregesen, olsem wok blong tij mo blong leftemap tingting blong ol brata mo sista, mo i halpem olgeta blong oli lavem moa God mo ol Kristin brata mo sista.—1 Pita 5:2, 3.
I gohed blong: Faef dei.
Hu i save joen: Ol niufala elda mo olgeta we oli elda longtaem finis be oli no joen long skul ya long faef yia we i pas.

Skul Blong Ol Eria Elda Mo Waef Blong Olgeta

I givhan olsem wanem: I trenem olgeta we oli goraon blong visitim ol kongregesen, hemia ol eria elda,d blong oli kam gud moa long wok blong olgeta. (1 Timoti 5:17) Kos ya i givhan tu long ol elda ya mo waef blong olgeta blong oli kasem save moa long Baebol.
I gohed blong: Wan manis.
Hu i save joen: Ol niufala eria elda mo waef blong olgeta oli kasem invetesen afta we oli stap wan yia long wok blong eria elda. Afta long hemia, oli kasem invetesen evri faef yia.

Kingdom Ministri Skul

I givhan olsem wanem: I givhan long ol elda mo ol man blong givhane blong oli lukaot gud long wok blong olgeta long kongregesen long taem ya we ol samting i stap jenis long wol, mo i gat ol defren fasin i stap pulum yumi, mo evriwan oli gat ol defdefren nid. (2 Timoti 3:1) Oli mekem skul ya bakegen afta we sam yia i pas.
I gohed blong: Plante taem i blong wan dei, be i save jenis.
Hu i save joen: Ol eria elda, ol elda, mo ol man blong givhan.

Skul Blong Olgeta We Oli Wok Long Betel

I givhan olsem wanem: I givhan long olgeta we oli wok long Betelf blong oli mekem gud wok blong olgeta, mo blong oli lavem moa God mo oli lavlavem olgeta.
I gohed blong: Faef dei mo haf.
Hu i save joen: Ol niuwan long Betel. Olgeta we oli stap longtaem finis long Betel be oli no joen long skul ya long faef yia we i pas, oli save kasem invetesen tu.

Wajtaoa Baebol Skul Blong Gilead

I givhan olsem wanem: I givhan long ol studen blong oli kasem save mo laekem moa Tok blong God, mo blong oli folem samting we oli lanem. (1 Tesalonaeka 2:13) Ol man mo woman we oli go long Skul blong Gilead oli bigman long ol Kristin fasin, be skul ya i mekem se oganaesesen blong Jehova i save yusum olgeta moa long wok we i gohed long fulwol blong tijim ol man long Baebol. Olgeta we oli gotru long skul ya maet oli go mekem wok blong prij o wok long branj ofis long kantri blong olgeta o long wan narafala kantri.
I gohed blong: Faef manis.
Hu i save joen: Ol branj ofis oli invaetem samfala we oli jusum blong oli fulumap pepa blong joen long skul ya. Oli mekem skul ya long Wajtaoa Edukesen Senta, long Patterson, New York, Yunaeted Stet.

Skul Blong Ol Memba Blong Branj Komiti Mo Waef Blong Olgeta

I givhan olsem wanem: I givhan long ol memba blong Branj Komitig blong oli lukaotgud long ol wok long branj ofis, mo ol wok we ol Witnes blong Jehova oli mekem long ol kantri we branj ofis ya i lukaot long olgeta.
I gohed blong: Tu manis.
Hu i save joen: Wol Hedkwota blong ol Witnes blong Jehova i singaot sam memba blong ol Branj Komiti we oli jusum wetem waef blong olgeta, blong oli joen long skul ya long Wajtaoa Edukesen Senta long Patterson, New York.

Wan tija i givim tok long ol studen long Skul Blong Ol Memba Blong Ol Branj Komiti Mo Waef Blong Olgeta.

?Trening we ol Witnes oli kasem, i stanap long wanem?

Trening we ol Witnes blong Jehova oli kasem i stanap long Baebol. Mifala i bilif se Baebol i kamaot long God, mo i save tijim gud mifala long evri haf blong Kristin laef blong mifala.—2 Timoti 3:16, 17.

?Ol Witnes blong Jehova oli pem blong kasem trening ya?

Nogat. Trening ya i fri. Presen mane nomo i sapotem wok blong ol Witnes blong Jehova.—2 Korin 9:7.

a Baebol mo ol buk we oli givhan long mifala blong stadi Baebol, wetem ol video tu, oli stap long websaet ya blong mifala, jw.org.

b Paenia, hemia wan man o woman we i baptaes finis olsem wan Witnes, mo i wantem spenem wan stret namba blong aoa evri manis blong talemaot ol trutok blong Baebol long ol man.

c Elda, hemia wan man we i bigman long ol Kristin fasin, i yusum Baebol blong tijim ol man blong Jehova, i givhan long olgeta, mo i leftemap tingting blong olgeta, olsem man blong lukaot long sipsip i lukaot gud long ol sipsip blong hem. Elda i no kasem pei from wok blong hem.

d Eria elda i prij fultaem mo evri wik i visitim wan defren kongregesen long eria we hem i stap wok long hem. Hem i givim ol tok we oli stanap long Baebol blong leftemap tingting blong ol brata mo sista mo i joen wetem olgeta long wok blong prij.

e Ol man blong givhan oli mekem ol defdefren wok blong halpem ol Kristin brata mo sista blong olgeta. Hemia i letem ol elda oli fri moa blong mekem wok blong tij insaed long kongregesen mo leftemap tingting blong ol brata mo sista.

f Betel, hemia nem blong ol branj ofis blong ol Witnes blong Jehova. Olgeta we oli wok fultaem long ol branj ofis ya, oli sapotem ol wok we ol Witnes oli mekem long teritori we branj ofis i lukaot long hem.

g Long wan Branj Komiti, i gat tri o bitim tri man we oli bigman long ol Kristin fasin.

?Trening ya i stap givhan long ol Witnes blong Jehova olsem wanem?

“I had blong mi mi tokbaot Baebol long ol strenja, from we mi wan woman blong sem. Be trening we mi kasem long miting long medel wik, i givhan long mi blong mi no fraet mo mi kam gud moa long fasin blong tij. Mo tu, mi lanem blong toktok long ol narafala long kongregesen mo long wok blong mi.”—Natasha, Yunaeted Stet.
“Skul blong Kingdom Ivanjelis i givhan long mi blong mi folem ol fasin blong Jehova olsem lav, longfala tingting, mo kaen fasin. From samting ya, mi harem se fasin blong mi olsem wan Kristin, wan fren, mo wan neba i kam gud moa. Skul ya i tijim mi tu olsem wanem blong mekem risej long ol topik long Baebol, mo eksplenem Tok blong God long fasin we i kasem hat blong man.”—Stephen, Naejeria.
“Skul Blong ol Elda i givhan long mi blong mi gat tingting daon, hemia wan fasin we mi nidim taem mi mekem wok blong elda. Ol tok oli makem long mi olsem wanem mi mas traehad blong folem eksampol blong Jisas.”—Luca, Itali.
“Kingdom Ministri Skul i tijim mi se mi mas kaen, soemaot lav, mo mekem ol narafala oli no fraet blong kam storian wetem mi. Mi lanem tu se taem mi mekem samting blong narafala, mi no fos nomo blong mekem, be lav nao i mas pusum mi blong mekem.”—Samuel, Briten.
“Skul blong Gilead i givhan long mitufala blong yusum Tok blong God olsem wan mira blong jekemap mitufala. (Jemes 1:22-25) Ale mitufala i luksave ol jenis we mitufala i mas mekem long fasin blong mitufala mo long wok blong Jehova. Mo tu, mitufala i lanem blong tingbaot ol narafala moa i bitim we mitufala i tingbaot mitufala nomo, mo blong letem lav i lidim mitufala long evri samting we mitufala i talem mo mekem.”—Elnathan mo Princess, Filipin.