?Ol Witnes Blong Jehova Oli Mekem Olsem Wanem Long Olgeta We Oli No Moa Joen Long Skul Blong Olgeta?

Mifala i traehad blong soemaot lav, kaen fasin, mo respek long evriwan. Sipos wan Witnes blong Jehova i kam slak o i no moa joen wetem mifala blong mekem wosip, mifala i toktok wetem hem,a mekem hem i save se mifala i lavem hem, mo traem halpem hem blong kam klosap long Jehova bakegen.—Luk 15:4-7.

Long saed blong samfala, aksen blong olgeta i save mekem se kongregesen i mas putumaot olgeta. (1 Korin 5:13) Be from we mifala i lavem tumas ol Kristin brata mo sista blong mifala, mifala i traehad blong halpem olgeta bifo we i gat nid blong putumaot olgeta. Sipos kongregesen i putumaot olgeta, mifala i soemaot lav mo respek long olgeta yet, olsem Baebol i talem se i stret blong mekem.—Mak 12:31; 1 Pita 2:17.

?Wanem i save mekem se kongregesen i putumaot wan man?

Baebol i talem klia se sipos wan Kristin i mekem bigfala sin mo i no wantem jenisim fasin blong hem, kongregesen i mas putumaot hem.b (1 Korin 5:11-13) Baebol nao i talem ol bigfala sin we oli save putumaot man from. Sam long olgeta, hemia adaltri, fasin drong, kilim narafala i ded, mekem nogud long olgeta long famle, mo fasin blong stil.—1 Korin 6:9, 10; Galesia 5:19-21; 1 Timoti 1:9, 10.

Be mifala i no kwik blong putumaot wan man we i mekem bigfala sin. Fastaem, ol eldac long kongregesen oli traem givhan long hem blong i jenisim fasin blong hem. (Rom 2:4) Long kwaet mo kaen fasin, oli traehad blong halpem hem blong i wantem jenisim fasin blong hem. (Galesia 6:1) Hemia i save mekem se man ya i luksave bigfala rong we hem i mekem mo i tanem tingting blong hem. (2 Timoti 2:24-26) Be, afta we ol elda oli traehad blong halpem hem bakegen mo bakegen, sipos hem i gohed blong mekem fasin we i agensem ol rul blong Baebol mo i no tanem tingting blong hem, oli mas putumaot hem long kongregesen. Ol elda oli talemaot wan sot mesej long kongregesen se man ya i no moa wan Witnes blong Jehova.

Tu elda long kongregesen oli toktok long kaen fasin blong serem sam vas blong Baebol wetem wan yangfala man. Wan elda i putum han blong hem long solda blong yangfala man ya. — Ol elda oli folem kwaet mo kaen fasin blong traem pulum wan man we i mekem bigfala sin blong i jenisim fasin blong hem

?Wanem gudfala samting i kamaot taem oli putumaot wan man we i stap gohed nomo blong mekem bigfala sin? Wan gudfala samting se, kongregesen i stap sapotem ol klin fasin we God i laekem, mo i blokem nogud fasin blong man ya blong i no spolem kongregesen. (1 Korin 5:6; 15:33; 1 Pita 1:16) Mo tu, maet strong aksen ya i pulum man we i mekem bigfala sin blong i lego fasin ya mo folem stret rod.—Hibru 12:11.

?Ol Witnes blong Jehova oli mekem olsem wanem long olgeta we kongregesen i putumaot?

Baebol i talem se ol Kristin oli mas “stop blong joen” wetem man we kongregesen i putumaot, mo oli “no mas kakae wetem man olsem.” (1 Korin 5:11) Taswe mifala i no stap kampani wetem man olsem. Be hemia i no min se mifala i tanem baksaed long hem fulwan. Mifala i soemaot respek long hem. Hem i welkam blong kam long ol miting blong mifala long Haos Kingdom, we ol Witnes oli save talem halo long hem.d Mo tu, hem i save askem long ol elda blong oli givhan long hem blong i kambak insaed long kongregesen.

Long Haos Kingdom, wan Witnes kapol i talem halo long kaen fasin long woman we kongregesen i putumaot hem. — Olgeta we kongregesen i putumaot, oli welkam blong kam long miting long Haos Kingdom

?Olsem wanem sipos hasban o waef mo ol pikinini blong hemia we kongregesen i putumaot, oli ol Witnes blong Jehova? Nating se man ya i no moa joen wetem famle blong hem blong mekem wosip, be oli ol memba blong wan famle yet. From we hem i stap yet long sem haos wetem waef o hasban mo ol pikinini blong hem, evriwan oli stap gohed blong lavlavem olgeta.

Man ya we kongregesen i putumaot i save askem long ol elda blong oli kam visitim hem. Ol elda bambae oli soemaot ol advaes blong Baebol mo pulum hem long kaen fasin blong tanem tingting blong hem mo kam klosap long God bakegen. (Sekaraea 1:3) Sipos hem i stopem ol nogud fasin mo i soemaot se i rili wantem folem ol stret rul blong Baebol, hem i save kambak insaed long kongregesen. Olgeta long kongregesen bambae oli ‘fogivim hem mo leftemap tingting blong hem,’ olsem ol Kristin long Korin bifo oli mekem long wan man we i jenisim ol nogud fasin blong hem.—2 Korin 2:6-8.

?Wanem tingting blong samfala we oli kambak insaed long kongregesen?

Hemia toktok blong sam Witnes blong Jehova we kongregesen i bin putumaot olgeta mo biaen oli mekem desisen blong kambak long God.

“Taem mi mekem desisen blong kambak long kongregesen, mi ting se ol elda bambae oli wantem save evri nogud samting we mi bin mekem long ol yia we mi stap afsaed. Be i no olsem, oli talem nomo se: ‘Mifala i wantem se yu putum tingting blong yu i stap strong long samting we yu save mekem naoia blong gohed gud.’ Afta we oli talem olsem, mi harem gud mo mi no moa fraet.”—Maria, Yunaeted Stet.

“Kongregesen i glad tumas se mi wantem kambak. Mi harem se ol Kristin brata mo sista oli lavem mi. Oli mekem mi mi harem se Jehova mo olgeta oli fogivim mi, mo hemia i halpem mi blong fogetem ol samting blong bifo mo lukluk i go long fiuja. Ol elda oli rere oltaem blong givhan long mi blong fren gud bakegen wetem Jehova. Oli leftemap tingting blong mi mo givhan long mi blong save se Jehova i lavem mi yet mo i stap tingbaot mi.”—Malcom, Siera Leon.

“Mi glad se Jehova i lavem ol man blong hem tumas, taswe hem i meksua se oganaesesen blong hem i stap klin. Maet plante man afsaed long kongregesen oli ting se i strong tumas blong putumaot man we i stap mekem bigfala sin, be i no olsem. Hemia samting we i mas hapen mo i soemaot lav. Mi talem tangkiu long Papa blong yumi long heven we i wan God blong lav mo i fogivim yumi.”—Sandi, Yunaeted Stet.

Toktok blong ol man we oli gat bigfala save long loa mo oli no Witnes blong Jehova

?Ol kot mo olgeta we oli gat bigfala save long loa, oli talem wanem long saed blong fasin blong ol Witnes blong Jehova blong putumaot man we i mekem bigfala sin? Hemia sam toktok blong olgeta.

“I stret nomo we wan grup blong wosip we oli bilif mo traem folem ol rul blong Baebol, oli gat raet blong [putumaot wan man we i no wantem folem ol rul ya]. Hemia stret tingting, mo oli mas mekem olsem, from we man we i no wantem save o folem ol rul blong Baebol, i no stret blong hem i stap olsem memba blong grup ya. Mo tu, sipos oli no putumaot hem, hem i save spolem fasin blong ol narafala long grup ya.”—Hae Kot Blong Jastis, Inglan mo Wels, 7 Jun, 2019.
“Ol kot long Yurop mo long ol narafala ples oli faenemaot se desisen blong [putumaot man olsem] . . . i stret folem loa mo i stret rod blong ol Witnes blong Jehova oli folem. Konstitusen i givim raet long olgeta blong mekem olsem, taem i talem se oli fri blong wosip . . . mo tu, i no wan bisnes blong ol kot oli jajem.”—Profesa Paulo Pinto de Albuquerque, we bifo hem i jaj long European Court of Human Rights.

a Save ya i stret long ol man mo long ol woman tu.

b Bifo, mifala i talem se ol man we oli no tanem tingting from rong we oli mekem oli disfelosip. Be naoia mifala i folem tok we Baebol i yusum se kongregesen i putumaot ol man olsem.

c Ol elda oli ol Kristin man we oli gat strong bilif mo ekspiriens, mo oli yusum Baebol blong tijim mo lukaot gud long ol man blong Jehova, taem oli halpem mo leftemap tingting blong olgeta. Oli no kasem pei from wok blong olgeta.—1 Pita 5:1-3.

d Sam samtaem, wan man we i lego kongregesen i tekem aksen blong traem spolem kongregesen o blong pulum ol narafala long kongregesen blong oli mekem nogud fasin. Long taem olsem, mifala i folem ol tok blong Baebol we i talem se mifala “i no mas talem halo” long man olsem.—2 Jon 9-11.