?Hu i Raetem Baebol?

Ansa we Baebol i givim

Plante man oli talem se, yumi no save stret se hu nao i raetem Baebol. Be Baebol i talemaot klia ol man we oli raetem Baebol. Sam haf blong Baebol oli stat wetem ol tok olsem, “Nehemaea i talem se,” “ol tok we Hae God i givim long wan profet we nem blong hem Profet Aesea,” mo “ol tok blong buk ya, Hae God i givim long Profet Joel.”—Nehemaea 1:1; Aesea 1:1; Joel 1:1.

Plante man we oli raetem Baebol oli talem se, ol tok we oli raetem oli kamaot long Jehova, we hem nao i tru God mo i lidim olgeta. Ol profet we oli raetem Ol Testeman, oli raetem bitim 300 taem se: ‘Hae God [Jehova] i talem se.’ (Amos 1:3; Maeka 2:3; Neham 1:12) Sam narafala, ol enjel nao oli talemaot mesej blong God long olgeta blong oli raetem.—Sekaraea 1:7, 9.

I gat samwe long 40 man we oli raetem Baebol, mo i tekem samwe long 1,600 yia blong oli raetem. Samfala oli raetem plante buk long Baebol. I gat 66 buk we oli mekemap wan Baebol. Long Hibru Haf blong Baebol, we plante man oli singaot se Ol Testeman, i gat 39 buk evriwan, mo long Grik Haf blong Baebol we oli singaot se Niu Testeman, i gat 27 buk evriwan.