?Ol Man Blong Hae Save Oli Bilif Se Jisas i Bin Laef Long Wol?

Ol man blong hae save oli bilif strong se Jisas i bin laef long wol ya. Wan buk (Encyclopædia Britannica, 2002 Edition) i tokbaot ol stori we ol man blong histri oli talem long saed blong Jisas mo ol fas Kristin, se: “Ol stori ya oli pruvum se bifo, ol enemi blong ol Kristin tu oli sua fulwan se Jisas i bin laef long wol. Long en blong ol yia 17 handred nomo, ol man oli jes stap kwestinim samting ya, mo oli gohed olsem kasem stat blong ol yia 19 handred.”

Long 2006, wan buk (Jesus and Archaeology) i talem se: “Tede, i no gat wan gudfala man blong hae save we i save kwestinim se wan man Jiu we nem blong hem Jisas, mo we i boe blong Josef, i bin laef long wol ya. Plante long olgeta oli talem ol samting we yumi tu yumi save, olsem ol samting we hem i mekem, mo ol stamba tijing blong hem.”

Baebol i tokbaot Jisas se hem i laef i stap. Baebol i talemaot nem blong ol stret famle blong hem mo blong ol bubu blong hem. (Matiu 1:1; 13:55) Mo Baebol i talemaot nem blong ol haeman tu we oli rul long taem we Jisas i laef long wol. (Luk 3:1, 2) Olgeta save ya oli givhan long ol man blong stadi, blong oli pruvum se ol stori blong Baebol oli tru.