?Olsem Wanem Sipos Mi Fas Long Fasin Ya Blong Wajem Rabis Pija Oltaem?

Yu save mekem wanem

Yu mas kasem save se rabis pija i rili wanem. Rabis pija blong seks i pulum man blong i gat rabis tingting long fasin ya we God i wokem blong ol man oli mekem long wei we i gat ona. Sipos yu kasem save long tingting ya we rabis pija i stap mekem bambae yu wantem ‘agens long rabis fasin ya.’—Ol Sam 97:10.

Tingbaot ol nogud samting we oli kamaot from fasin ya. Rabis pija blong seks i soem se olgeta we oli stap soemaot olgeta oli olsem anamol nomo. Mo tu i spolem man we i stap wajem. Taswe i stret nomo we Baebol i talem se: “Man we i gat gudfala tingting i save luksave we trabol i stap kam, nao i save ronwe long hem.”—Ol Proveb 22:3.

Mekem wan promes. Gudfala man ya Job i talem se: “Mi mi mekem wan strong promes se, neva bambae mi lukluk wan gel wetem tingting ya we mi wantem hem tumas.” (Job 31:1, Today’s English Version) Hemia sam long ‘ol strong promes’ we yu save mekem:

• Bambae mi no yusum Intenet taem mi stap mi wan.

• Bambae mi kwik blong kamaot long websaet we i soem ol rabis pija.

• Bambae mi talemaot long wan fren we i bigman long tingting sipos mi stap wajem rabis pija bakegen.

Tokbaot long prea. Man blong raetem Sam i plis long Jehova God se: “Plis yu blokem mi blong mi no save folem ol fasin ya we i no gat wan gudfala samting i save kamaot long hem.” (Ol Sam 119:37) God i wantem se yumi win, mo sipos yu prea long hem, hem i save givim paoa long yu blong mekem samting we i stret.—Filipae 4:13.

Tokbaot long wan narafala. Sipos yu jusum wan fren blong tokbaot problem ya long hem, plante taem, hemia i wan impoten step we yu mekem blong stopem habit ya.—Ol Proveb 17:17.

Tingbaot samting ya: Evri taem we yu blokem yu blong no wajem rabis pija, yu winim wan impoten faet. I gud yu talemaot long Jehova God se yu winim faet ya, mo yu talem tangkiu long hem, from we hem i mekem yu strong. !Taem yu winim fasin ya blong wajem rabis pija, yu stap mekem God i glad!—Ol Proveb 27:11.