?I Stret Blong Wosipim Ol Pija?

Ansa we Baebol i givim

No, yumi no mas wosipim ol pija. Buk ya New Catholic Encyclopedia i tokbaot ol loa we God i givim long ol man Isrel se: “Plante vas blong Baebol oli soemaot klia se ol man blong God oli no stap yusum aedol long wosip blong olgeta.” Traem luk sam long ol vas ya:

• “Bambae yufala i no mas mekem pija blong ol samting long heven, no long wol, no long solwota we wol ya i stanap long hem, blong yufala i mekem wosip long hem. Bambae yufala i no mas bodaon long aedol olsem blong mekem wosip long hem, from we mi mi [Jehova,] mi God blong yufala, mo yufala i man blong mi, nao mi mi no save letem yufala i mekem wosip long narafala god bakegen.” (Eksodas 20:4, 5) God i wantem se ol man oli ‘wosipim hem nomo,’ taswe hem i no glad sipos yumi presem o mekem wosip long ol pija, aedol, o long ol saen.

• “Mi no wantem we ol man oli presem ol aedol, oli mas presem mi nomo.” (Aes 42:8, Easy-to-Read Version) God i no laekem taem ol man oli yusum ol pija blong mekem wosip long hem. Taem sam man Isrel oli traem blong yusum pija blong wan buluk blong mekem wosip long God, hem i talem se oli mekem “wan bigfala sin.”—Eksodas 32:7-9, Easy-to-Read Version.

• “From we yumi pikinini blong God, yumi no mas ting se God ya i olsem ol samting ya we ol man we oli gat gudhan oli tingting nomo long hem nao oli wokem long gol no silva no ston.” (Ol Wok 17:29) Sam man we oli no wosipim God, oli yusum ol samting we “ol man we oli gat gudhan oli tingting nomo long hem nao oli wokem,” be Baebol i talem se ol Kristin oli mas ‘wokbaot folem bilif, be i no folem ol samting we oli stap luk.’—2 Korin 5:7.

• “Yufala i mas stap longwe long ol aedol.” (1 Jon 5:21) Long ol advaes we i go long ol Kristin tede, Baebol i talemaot klia oltaem se God i no agri long fasin ya we ol man oli yusum ol pija blong mekem wosip.