?Skul Blong Ol Witnes Blong Jehova i Wan Cult?
Nogat. Skul blong ol Witnes blong Jehova i no wan cult. Mifala i Kristin mo mifala i mekem bes blong mifala blong folem eksampol blong Jisas Kraes, mo blong folem ol tijing blong hem long laef blong mifala.
?Wan cult i minim wanem?
Ol man oli gat ol defdefren tingting long mining blong tok ya “cult.” Be i gat tu tingting we plante taem ol man oli gat long saed blong tok ya. I gud yumi tokbaot tufala tingting ya, mo yumi tokbaot from wanem ol tingting ya oli no stret long mifala.
Sam man oli ting se wan cult hem i wan niufala jos we i jes stat, mo we ol tijing blong hem oli defren olgeta long tijing blong ol narafala jos. Skul blong ol Witnes blong Jehova i no wan niufala skul we i jes stat. Defren olgeta, mifala i folem fasin blong wosip blong ol fas Kristin bifo. Eksampol mo ol tijing blong ol Kristin ya i stap long Baebol. (2 Timoti 3:16, 17) Mifala i bilif se tabu tok blong Baebol nomo i save talemaot wanem fasin we i stret blong ol Kristin oli mekem taem oli wosipim God.
Sam man oli ting se wan cult i wan jos we i stap spolem ol man, mo we wan man nomo i lidim. I no gat wan man long wol ya we i lida blong ol Witnes blong Jehova. Be mifala i folem rul we Jisas i givim long ol man blong hem, we i talem se: “Yufala i gat wan Masta nomo blong yufala, we hemia mi ya, mi Mesaea.”—Matiu 23:10.
Skul blong ol Witnes blong Jehova i no wan cult we i stap spolem ol man. Skul blong mifala i givhan long ol memba blong mifala mo long ol narafala man long komuniti. Yu save tingbaot wok ya we mifala i stap mekem blong go prij long ol man. Wok ya i givhan long plante man blong oli lego ol fasin we i stap spolem olgeta, olsem fasin blong tekem drag mo fasin blong drong. Mo tu, long olgeta ples long wol, mifala i givhan long plante taosen man blong oli lanem rid mo raet. Mo mifala i halpem ol man long taem blong disasta. Mifala i wok had blong mekem se laef blong mifala i save givhan long ol narafala, olsem we Jisas i talem long ol man blong hem blong oli mekem.—Matiu 5:13-16.