OL YANGFALA OLI ASKEM
?Olsem Wanem Blong Dil Wetem Ol Mastik Blong Mi?
?Sipos yu bae yu mekem wanem?
Yu ridim samting we i hapen long Karina, mo traem tingbaot sipos samting ya i hapen long yu. ?Sipos yu bae yu mekem wanem?
Karina: “Mi stap ron long trak i go long skul be mi spid tumas, mo wan polis i stopem mi mo hem i talem se bae mi pem wan faen. !Mi harem nogud tumas! Mi talem long Mama, mo hem i talem se mi mas talem long Papa, be mi no wantem mekem olsem.”
?Sipos yu bae yu mekem wanem?
Opsen A: Yu no talemaot mo yu hop se Papa bambae i neva faenemaot.
Opsen B: Yu talemaot stret samting we i hapen.
Maet yu harem se i isi moa blong jusum Opsen A. Ating, mama blong yu bambae i ting se yu talemaot mastik blong yu finis long papa. Be yu mas tingbaot se, oltaem i gat gudfala frut i kamaot taem yu talemaot mastik blong yu, nating se oli kasem yu long trak from yu spid tumas o yu mekem wan narafala mastik.
Tri risen blong talemaot ol mastik blong yu
1. From hem i stret samting blong mekem. Baebol i talem se oltaem ol Kristin oli mas: “mekem i stret nomo long olgeta samting.”—Hibrus 13:18.
“Mi traehad blong tok tru oltaem, akseptem nomo taem mi mestem wan samting, mo talemaot kwiktaem mastik blong mi.”—Alexis.
2. From ol man oli glad moa blong fogivim man we i talemaot ol mastik blong hem. Baebol i talem se: “Sipos yu stap traem haedem ol sin blong yu, bambae yu no save win long laef blong yu. Be sipos yu tanem tingting blong yu, nao yu talemaot ol sin ya blong yu long Hae God, mo yu gowe long olgeta, hem bambae i gat sore long yu.”—Ol Proveb 28:13.
“Man we i rere blong talemaot mastik blong hem, hem i man we i no fraet. Man olsem ol man bambae oli trastem hem from we oli luk se hem i no haedem samting. Taem yu talemaot mastik blong yu, yu mekem se wan nogud samting i kam gudfala samting.”—Richard.
3. Samting we i moa impoten se, yu mekem Jehova God i glad. Baebol i talem se: ‘Jehova i no laekem nating ol man we oli stap trikim narafala. Be Hem i trastem ol stret man, mo i stap fren wetem olgeta.’—Ol Proveb 3:32, NW.
“Afta we mi mekem wan bigfala mastik, mi luksave se mi mas go talemaot. Jehova i no save blesem mi sipos mi no mekem ol samting olsem we hem i wantem.”—Rachel.
?Karina i mekem wanem? Hem i no talemaot long papa blong hem faen we hem i pem long polis. Be samting ya i no save haed olwe. Afta long wan yia, papa blong hem i faenemaot. Karina i talem se: “Mi kasem bigfala trabol taem papa i faenemaot, mama blong mi tu i kros se mi no mekem samting we hem i talem.”
?Yumi lanem wanem?: Karina i talem se: “Problem i kam mowas taem yu haedem ol mastik. Mo wan dei, bae yu kakae frut blong hem.”
Lanem samting long ol mastik blong yu
Evriwan i mekem mastik. (Rom 3:23; 1 Jon 1:8) Taem man i talemaot mastik blong hem, hemia i soemaot se hem i gat tingting daon, mo i kam bigman long tingting.
Narafala samting hemia, blong lanem lesen from mastik we yu mekem. Be sore tumas, plante yangfala oli mestem janis ya. Maet oli gat sem tingting olsem wan yangfala ya we nem blong hem Priscilla. Hem i talem se: “Tingting blong mi i foldaon bigwan from ol mastik we mi stap mekem. From we mi gat rong tingting long mi wan, ol mastik blong mi oli olsem wan bigfala baden we mi no save karem. Mi harem nogud tumas nao mi gud blong nating nomo.”
?Yu yu harem olsem samtaem? Sipos yes, traem tingbaot samting ya: sipos yu stap gohed blong tingbaot ol mastik we yu mekem bifo, hemia i olsem we yu stap draevem wan trak, be ae blong yu i stap long glas we i blong lukluk i go biaen. Sipos yu stap tingting tumas long ol mastik we yu mekem bifo, bambae yu harem se yu yu nating nomo nao bambae yu no naf blong fesem ol trabol we i stap kam.
Yu traem gat wan stret tingting long yu wan
“Yu traem tingbaot ol mastik blong yu, mo lanem lesen blong yu no mekem sem samting bakegen. Mo yu no mas tingbaot olgeta tumas, sipos no bambae i spolem yu.”—Elliot.
“Mi luk ol mastik blong mi, olsem wan rod blong tijim mi blong mi no moa mekem sem mastik bakegen. Sipos yu mekem olsem, bambae yu kam wan bigman long tingting.”—Vera.