?Kingdom Blong God i Stap Insaed Long Hat Blong Yu?
Ansa we Baebol i givim
Nogat, Kingdom blong God i no wan samting insaed long hat blong ol Kristin.a Baebol i soemaot stret ples blong hem, taem i kolem Kingdom ya se “Kingdom blong heven.” (Matiu 4:17, King James Version) Tingbaot olsem wanem Baebol i soem se hem i wan tru gavman we i stap long heven mo i stap rul.
Kingdom blong God i gat ol rula blong hem, ol man we hem i rul antap long olgeta, ol loa, mo wan plan blong mekem wil blong God i kamtru long heven mo long wol.—Matiu 6:10; Revelesen 5:10.
Gavman, o Kingdom blong God bambae i rul antap long olgeta ‘man, nesen, mo lanwis grup’ long wol. (Daniel 7:13, 14) I no ol man we oli givim otoriti long gavman ya blong rul, be God nao i givim.—Ol Sam 2:4-6; Aesea 9:7.
Jisas i talem long ol aposol blong hem se bambae oli joen wetem hem long Kingdom blong heven, blong “sidaon long ol jea blong king.”—Luk 22:28, 30.
Kingdom ya i gat ol enemi blong hem, mo bambae hem i distroem olgeta.—Ol Sam 2:1, 2, 8, 9; 110:1, 2; 1 Korin 15:25, 26.
Baebol i no tijim se Kingdom blong heven i stap insaed long hat blong yu, we hemia i min se hem i rul tru long hat blong man. Be Baebol i soem se “tok blong Kingdom” o “gud nius ya blong Kingdom” i save gat paoa long hat blong yumi.—Matiu 13:19; 24:14.
?Wanem mining blong tok ya “kingdom blong God i stap long yufala”?
Sam man oli konfius se Kingdom i stap wea, taem oli ridim sam translesen blong Luk 17:21. Eksampol, King James Version i talem se “kingdom blong God i stap long yufala.” Blong kasemsave gud long vas ya, yumi mas tingbaot konteks blong hem.
Kingdom blong God i no stap long hat blong ol stronghed man ya we oli agensem Jisas mo kilim hem i ded
Jisas i stap toktok long ol Farisi, hemia wan grup blong ol lida blong skul we oli agensem hem, mo oli tekpat long plan ya blong kilim hem i ded. (Matiu 12:14; Luk 17:20) Olgeta oli stronghed, ?taswe yu ting se i stret blong talem se Kingdom i stap insaed long hat blong olgeta? Jisas i talem long olgeta se: “Insaed, yufala i fulap long giaman mo fasin blong brekem loa.”—Matiu 23:27, 28.
Sam narafala Baebol i transletem klia tok ya blong Jisas long Luk 17:21, se: “Kingdom blong God i stap long ples ya wetem yufala.” (Mifala nomo i jenisim raeting ya; Contemporary English Version) “Kingdom blong God i stap long medel blong yufala.” (Niu Wol Translesen) Kingdom blong heven i stap “wetem” o “long medel” blong ol Farisi, i min se Jisas we God i jusumaot hem blong i rul long Kingdom ya, i stap stanap long fored blong olgeta.—Luk 1:32, 33.
a Plante jos we oli talem se oli Kristin, oli tijim se Kingdom blong God i stap insaed long man, o insaed long hat blong man. Eksampol, long Yunaeted Stet, jos ya Southern Baptist Convention i talemaot se Kingdom blong God hem i “rul blong God we i stap long hat mo long laef blong ol man wanwan.” Long sem fasin, Pop Benedict 16 i talem long buk blong hem Jesus of Nazareth, se “Kingdom blong God i kam taem man i lesin long hat blong hem.”