OL YANGFALA OLI ASKEM
?From Wanem Mi Mas Tok Tru?
?From wanem sam man oli stap giaman?
Tede, plante man oli harem se sipos oli tok tru, bambae oli kasem trabol nomo. Maet samfala oli se:
‘Sipos mi no giaman long perens blong mi, bambae tufala i panisim mi.’
‘Sipos mi no kopi long tes blong narafala, bambae mi no pas.’
‘Sipos mi no stilim samting ya, bambae mi mas sevem mane from.’
Maet sam oli se: ‘Hemia i no wan bigfala samting, yumi save se evri man i stap giaman.’
Hemia i no tru. Plante man, hemia i minim plante yangfala tu, oli bilif se sipos oli tok tru bambae oli kasem pei blong olgeta mo hemia bambae i givhan long olgeta. Baebol i talem se: “Wanem sid we man i planem, be frut blong hem nomo, man ya bambae i kasem.” (Galesia 6:7) Evri samting we yumi mekem, i mas gat risal blong hem, nating se samting ya i gud o i nogud.
Makem nogud risal we i kamaot taem man i giaman.
“Mi stap toktok long wan boe, mo mi giaman long mama long saed blong boe ya. Mama i luksave klia nomo se mi stap giaman. Taem mi giaman long hem namba tri taem, hem i kros long mi. Hem i strik long mi blong tu wik, mo hem i talem se mi no save yusum fon o wajem TV blong wan manis. !Mi no moa giaman bakegen long tufala!”—Anita.
Tingbaot: ?From wanem bambae i tekem taem blong mama blong Anita i trastem hem bakegen?
Baebol i talem se: “From we yufala i tekemaot fasin blong giaman, yufala evriwan i mas tok tru long yufala.”—Efesas 4:25.
“Mi mi giaman long perens blong mi mo ting se mi save haedem, be samtaem biaen tufala i askem mi blong talem bakegen samting we i bin hapen. Samting we mi talem i defren olgeta long samting we i tru, so mi no save tingbaot samting we mi bin talem. Taem yu tok tru long stat, bambae yu nogat eni problem.”—Anthony.
Tingbaot: ?Anthony i save mekem wanem long stat, blong hem i no sem tumas?
Baebol i talem se: “Lips we i stap giaman, i nogud we i nogud long ae blong Jehova, be olgeta we oli mekem ol samting we i stret, oli mekem hem i glad.”—Ol Proveb 12:22.
“Mi mi gat wan fren we i laekem blong mekemap ol stori, mo i mekem olsem se ol stori ya oli rili tru. Mi lavem hem, be mi no wantem tingting tumas long samting we hem i talem. Nating se i olsem, i had blong mi bilivim hem o trastem hem.”—Yvonne.
Tingbaot: ?Olsem wanem fasin blong giaman i save spolem gudnem blong fren blong Yvonne?
Baebol i talem se: “Mifala i wantem tumas we oltaem mifala i stap mekem i stret nomo long olgeta samting.”—Hibru 13:18.
Wan fandesen we i brok i save afektem ful bilding. Long sem fasin, fasin blong giaman i save spolem gudnem we yu gat
Man we i tok tru bambae i kasem pei blong hem
Makem sam gudfala risal we i kamaot taem man i tok tru.
“Woman we i stap go fastaem long mi i mestem sam mane blong hem i foldaon. Ale mi singaot hem mo mi go givimbak. Hem i glad tumas mo i se: ‘O yu gud tumas. Tede plante man oli no tok tru olsem.’ Mi glad se hem i makem gudfala samting we mi mekem.”—Vivian.
Tingbaot: ?From wanem woman ya i sapraes long samting we i hapen? ?Olsem wanem fasin blong tok tru i givhan long Vivian?
Baebol i talem se: “Olgeta we oli mekem samting . . . we i stret, oli glad.”—Ol Sam 106:3.
“Famle blong mi i stap mekem wok ya blong klinim ol ofis, mo taem mifala i luk ol smol koin long floa. Mifala i putum long tebol we i stap klosap. Wan man blong wok i les long kaen ya, mo i se: ‘!Hemia wan smol koin nomo!’ ?Be yu save wanem? Oltaem hem i trastem mifala.”—Julia.
Tingbaot: ?Olsem wanem fasin blong Julia blong tok tru, bambae i givhan long hem taem hem i wantem faenem wan wok?
Baebol i talem se: “Yu mas traehad long evri rod blong God i glad long yu. Long fes blong hem, yu mas kam wan wokman we yu no gat sem long ol wok blong yu.”—2 Timoti 2:15.
“Mi mi kasem wan pei jek se mi wok 80 aoa, be mi mi wok 64 aoa nomo. I tru se i naes blong kipim mane ya, be mi no save mekem olsem. So mi go talemaot long maneja we i lukaot long mane, mo hem i glad tumas. I tru, we bisnes ya i stap gohed gud, be mi no wantem kipim mane ya, from i olsem we mi stilim.”—Bethany.
Tingbaot: ?Olsem wanem? ?Taem yu stil long wan man hemia i mowas i bitim we yu stil long wan kampani?
Baebol i talem se: “Jehova i no laekem nating ol man blong trik, be Hem i fren gud wetem ol man we oli gat stret fasin.”—Ol Proveb 3:32.