?From Wanem Ol Witnes Blong Jehova Oli Jenisim Sam Bilif Blong Olgeta?

Oltaem mifala i yusum Baebol olsem stamba blong bilif blong mifala, taswe mifala i jenisim bilif blong mifala taem mifala i kasem save klia moa long sam samting long Baebol.a

Ol jenis olsem oli stret, taem yumi tingbaot tok blong Baebol long Ol Proveb 4:18 se: “Rod blong ol stret man i olsem laet long eli moning, we sloslo i stap kam klia moa gogo i delaet gud.” Taem san i girap long moning, sloslo yumi luk ol samting oli kam klia moa. Long sem fasin, God i mekem se sloslo trutok long saed blong hem i kam klia long stret taem blong hem. (1 Pita 1:10-12) Baebol i talemaot se bambae hem i mekem samting ya i hapen moa long “taem blong en.”—Daniel 12:4.

Mifala i no sapraes mo harem nogud from ol jenis ya. Ol man blong God bifo tu, oli gat sam rong bilif mo rong tingting long saed blong fiuja, we oli mas jenisim.

• Moses i wantem mekem nesen blong Isrel i kamfri 40 yia bifo we God i makemaot.—Ol Wok 7:23-25, 30, 35.

• Ol aposol oli no kasem save long profet tok ya se Mesaea bambae i ded mo i laef bakegen.—Aesea 53:8-12; Matiu 16:21-23.

• Sam Kristin bifo oli gat rong tingting long saed blong taem we “dei blong Jehova” bambae i kamtru.—2 Tesalonaeka 2:1, 2.

Biaen, God i stretem ol rong tingting blong olgeta, mo mifala i prea se bambae hem i gohed blong mekem sem mak long mifala.—Jemes 1:5.