?I Stret We Woman i Putum Iaring Mo Jen Mo Pentem Fes?
Ansa we Baebol i givim
Baebol i no tokbaot tumas fasin blong putum iaring, jen, o pentem fes. Mo hem i no talem tu se fasin ya i nogud. Nating se i olsem, hem i pulum yumi blong yumi no tingting tumas blong mekem bodi i naes, be hem i se: ‘I gud yufala i gat pis long laef blong yufala, mo yufala i kwaet.’—1 Pita 3:3, 4.
Flasem bodi i no wan sin
Ol gudfala woman bifo oli flasem olgeta. Rebeka, we i maredem Aesak boe blong Ebraham, hem i putum wan gol iaring long nus blong hem, mo ol gol jen long han blong hem, mo sam narafala sas samting we fiuja palika blong hem i givim long hem. (Jenesis 24:22, 30, 53) Esta tu i ‘ravem gudfala oel long bodi blong hem’ blong rere from dei ya we bambae hem i kam kwin blong Pesia. (Esta 2:7, 9, 12) Hemia i save minim tu se “oli pentem maot, mo oli putum ol paoda long fes,” mo “oli yusum ol defdefren samting blong pentem fes.”—New International Version; Easy-to-Read Version.
Iaring mo jen i pijatok blong ol gudfala samting. Wan man we i lesin long gudfala advaes hem i tingbaot ol tok ya olsem “ring mo jen we oli wokem long gol.” (Ol Proveb 25:12) God hem wan i tokbaot gudfala fasin we hem i mekem long neson blong Isrel, se hem i olsem wan hasban we i flasem waef blong hem wetem ol braslet, jen, mo ol iaring. Ol flas samting ya oli mekem neson ya i ‘naes we i naes.’—Esikel 16:11-13.
Giaman tingting long saed blong iaring, jen, mo pentem fes
Giaman: Long 1 Pita 3:3, Baebol i talem se i nogud blong ‘tanem hea blong yufala mo putum ol flas samting we oli wokem long gol.’
Trutok: Long japta ya, Baebol i wantem soemaot se ol gudfala fasin long hat, oli gud moa i winim ol sas samting we oli flasem bodi. (1 Pita 3:3-6) Tingting ya i stap tu long plante narafala ples long Baebol.—1 Samuel 16:7; Ol Proveb 11:22; 31:30; 1 Timoti 2:9, 10.
Giaman: Fasin blong kwin Jesebel blong “pentem ae,” i pruvum se i no stret blong pentem fes.—2 King 9:30.
Trutok: Oli jajem Jesebel from we hem i wok wetem ol rabis spirit mo i kilim man i ded, be i no from we hem i flasem hem.—2 King 9:7, 22, 36, 37.