OL YANGFALA OLI ASKEM
?Olsem Wanem Mi Save Jusum Wan Gudfala Eksampol Blong Folem?
“Samting we i givhan long mi taem mi fesem wan problem long skul, hemia se mi tingbaot wan man o woman we hem tu i fesem sem problem ya. Mo mi traem blong folem eksampol blong hem. Taem yu tingbaot wan gudfala eksampol we yu save folem, i mekem se i isi blong winim ol problem.”—Haley.
Wan gudfala eksampol we yu save folem i save givhan long yu blong blokem ol problem mo kasem ol mak we yu wantem kasem. Be blong mekem olsem, yu nidim blong jusum wan gudfala eksampol blong folem.
?From wanem i gud blong jus gud?
Jus blong yu bae i gat paoa long ol samting we yu mekem.
Baebol i talem long ol Kristin se blong tingbaot sam gudfala eksampol we oli save folem. Hem i se: “Yufala i mas luklukgud se fasin blong olgeta i karem wanem frut, blong yufala tu i folem bilif blong olgeta.”—Hibrus 13:7.
Advaes: From we eksampol we yu jusum i save gat paoa long ol samting we yu mekem, i gud blong jusum olgeta we oli gat ol gudfala fasin, i no jes olgeta we plante man oli save gud o olgeta we oli gat sem yia olsem yu.
“Mi lanem plante samting long wan Kristin brata we nem blong hem Adam. Hem i gat ol gudfala fasin. Mi stap tingbaot bakegen sam samting we hem i talem o i mekem. Be hem i no save nating se ol gudfala fasin blong hem oli gat paoa long mi.”—Colin.
Jus blong yu bae i gat paoa long tingting mo ol filing blong yu.
Baebol i talem se: “Yufala i no mas letem ol narafala oli lidim yufala i go krangke. Ol rabis fren oli save spolem ol gudfala fasin.”—1 Korin 15:33.
Advaes: Jusum wan man o woman we i gat ol gudfala fasin, i no wan we i gat naes fes. Sipos no, bae yu save harem nogud biaen.
“Yu save harem se yu no impoten o yu no naes taem yu stap skelem yu oltaem wetem ol man we oli gat naes fes. Samting ya i save mekem yu harem nogud.”—Tamara.
Sam samting blong tingbaot: ?Wanem ol problem we i save kamaot taem yu jusum blong folem eksampol blong ol man blong aktem muvi mo ol man blong resis?
Jus blong yu bae i gat paoa long ol mak we yu wantem kasem.
Baebol i talem se: “Sipos man i go joen long ol waes man, bambae hem i save kam waes.”—Ol Proveb 13:20.
Advaes: Jusum man o woman we i soemaot o mekem ol samting we yu wantem mekem. Taem yu stap lukluk olgeta, yu save lanem sam samting we yu save mekem blong kasem mak blong yu.
“I nogud yu giaman long yu wan se ‘Mi wantem se bae mi olsem.’ Be yu save talem se, ‘Mi wantem mekem olsem Jane. Hem i stap long stret taem oltaem mo i mekem gud ol wok blong hem.’”—Miriam.
Samting we i impoten: Taem yu jusum wan gudfala eksampol, yu stap jusum se bae yu kam wanem kaen man o woman.
!Taem yu folem wan gudfala eksampol bae i isi blong kasem ol mak blong yu!
?Olsem wanem blong jus?
I gat 2 rod blong jusum wan gudfala eksampol blong folem.
Yu save tingbaot wan fasin we yu wantem gat mo yu jusum wan man o woman we i gat fasin ya.
Yu save tingbaot wan man o woman we yu laekem, nao yu save jusum wan fasin we hem i gat we yu wantem folem.
I gat wan pepa blong fulumap we i joen wetem haf ya. Pepa ya bae i givhan long yu blong jusum wan gudfala eksampol blong folem.
Maet yu wantem folem eksampol blong:
Sam fren. “Mi wantem kam olsem bes fren blong mi. Oltaem hem i tingbaot narafala. Hem i yangfala moa long mi, be mi luk se hem i gat sam gudfala fasin we mi no gat, ale mi wantem folem eksampol blong hem.”—Miriam.
Sam bigman. Maet ol papa mo mama blong yu o sam brata mo sista. “Mi harem se papa mo mama blong mi oli wan gudfala eksampol blong folem. Tufala i gat sam gudfala fasin. Mi luk we tufala i mestem samtaem, be mi luk tu se tufala i no lego bilif blong tufala. Taem bae mi gat sem yia olsem tufala, mi hop se ol narafala oli talem sem samting long saed blong mi.”—Annette.
Sam man long Baebol. “Mi jusum defdefren man long Baebol we mi save folem eksampol blong olgeta olsem: Timoti, Rut, Job, Pita, smol gel Isrel. Moa we mi save ol man long Baebol, moa we oli kam ril long mi. Mi laekem tumas blong stadi long ol stori we oli stap long buk ya Imitate Their Faith, mo tu haf ya ‘Role Model Index’ we i stap long volium 1 mo 2 blong buk ya Questions Young People Ask—Answers That Work.”—Melinda.
Advaes: I gud blong jusum plante man mo woman we yu save folem eksampol blong olgeta. Aposol Pol i talem long ol Kristin se: “Yufala i stap lukluk i go long olgeta we oli wokbaot folem eksampol we mifala i soemaot long yufala.”—Filipae 3:17.
?Yu yu save? !Yu tu yu save kam gudfala eksampol we ol narafala oli save folem! Baebol i talem se: “Yu mas soemaot gudfala eksampol long ol toktok blong yu, mo long samting we yu mekem, mo long fasin blong yu blong lavem ol man, mo long bilif blong yu, mo long fasin blong yu blong stap klin.”—1 Timoti 4:12.
“Nating se yu mas kam gud yet long sam fasin blong yu, be yet yu save givhan long ol narafala tu. Yu no save se hu i stap lukluk, maet ol samting we yu talem i save jenisim laef blong wan man.”—Kiana.