Taem i Gat Defdefren Tingting

I no isi taem hasban mo waef i gat defdefren tingting long saed blong samting we tufala i laekem, mo ol fasin blong tufala. Be sam samting i had moa, olsem:

• Hamas taem blong spenem wetem ol famle

• Olsem wanem blong spenem mane

• Bambae tufala i gat pikinini o nogat

?Yu save mekem wanem sipos hasban o waef blong yu i gat defren tingting long sam samting?

• Samting we yu mas save

• Samting we yu save mekem

Samting we yu mas save

Joen gud i no min se tingting i sem mak. Nating se hasban mo waef i joen gud, be i no oltaem we bambae tufala i gat sem tingting long ol impoten samting.

“Mi mi gruap long wan famle we oli laekem blong spenem taem tugeta. Evri wiken, mifala i spenem taem wetem abu man mo abu woman, ol angkel, ol anti, mo ol kasen. Be ol famle blong hasban blong mi oli no joen tumas olsem. Taswe mitufala i gat defdefren tingting long saed blong hamas taem we mitufala i mas spenem wetem famle, o spenem blong toktok wetem ol famle we oli laef longwe.”—Tamara.

“Mi mo waef blong mi i gruap long tu famle we tufala i gat defdefren tingting long samting we i impoten, taswe mitufala i gat defdefren tingting long samting we mitufala i pem. Long ol fas manis blong mared, mitufala i rao from samting ya. Mitufala i mas storian plante taem blong stretem problem ya.”—Tyla.

Blong winim sam problem, i no naf we tufala i lego prapa tingting blong tufala. Eksampol, ?olsem wanem sipos papa o mama blong wan long tufala i sik mo i nidim wan blong lukaot long hem? ?Olsem wanem sipos wan i wantem gat pikinini be narawan i no wantem?a

“Mi mo waef blong mi i toktok plante taem long saed blong gat pikinini. Waef blong mi i wantem tumas blong gat pikinini, nao mitufala i stat blong gat defdefren tingting. Mi no save tingbaot wan rod blong mekem mitufala i glad.”—Aleks.

Defdefren tingting i no nid blong spolem mared. Sam man oli talem se sipos hasban mo waef i no save agri long wan samting we i impoten, tufala i mas strong blong kasem samting we tufala wanwan i wantem, nating sipos tufala i mas divos. Be hemia i no stretem problem, i soemaot nomo se yu tingbaot filing blong yu i bitim promes we yu mekem long fored blong God, hemia se hasban mo waef i mas stap tugeta nomata wanem samting i hapen.

Samting we yu save mekem

Yu mas gat strong tingting blong holem promes blong mared. Sipos yu mekem olsem, bambae hemia i givhan long yutufala blong wok olsem wan tim blong stretem problem, i bitim we yutufala i agensem yutufala.

Rul blong Baebol: “Samting we God i joenem, man i no mas seraotem.”—Matiu 19:6.

Kaontem praes. Tingbaot sipos wan i wantem gat pikinini be narawan i no wantem. I gat sam stamba samting blong tingbaot, olsem:

• Mared blong yutufala i strong olsem wanem.

  ?Yutufala i naf blong lukaot gud long wan pikinini?

• Mekem ol wok olsem papa mo mama.

  I no naf blong givim kakae, klos, mo ples blong slip nomo.

• Hamas mane we yutufala i gat.

  ?Yu save skelem wok, famle, mo ol narafala samting?

Rul blong Baebol: “?Hu long yufala we i wantem wokem wan bigfala taoa, be i no sidaon fastaem blong kaontem praes blong ol samting we hem i nidim?”—Luk 14:28.

Kasemsave gud long evri samting. Maet yutufala i save faenem rod blong stretem sam tingting we i defdefren. Olsem nao, sipos wan long yutufala i wantem gat pikinini, narawan we i no wantem i save tingbaot se:

• ‘?Taem mi talem se mi no wantem gat pikinini, mi wantem minim se mi no wantem gat pikinini nating o mi no wantem gat naoia?’

• ‘?Mi mi fraet se mi no naf blong kam wan gudfala papa o mama?’

• ‘?Mi mi fraet se hasban o waef blong mi bambae i no moa tingbaot mi?’

Hemia we i wantem gat pikinini i save tingbaot ol kwestin olsem:

• ‘?Mitufala i rere blong mekem ol wok we papa mo mama i mas mekem?’

• ‘?Mitufala i gat naf mane blong lukaot long wan pikinini?’

Rul blong Baebol: “Waes we i kamaot long heven, [i mekem se man] . . . i rere blong lego prapa tingting blong hem.”—Jemes 3:17.

Luksave ol gudfala tingting we hasban o waef blong yu i gat. Nating se tu man i stap lukluk sem samting, be tufala i save gat defdefren tingting long hem. Long sem fasin, hasban mo waef i save gat defdefren tingting long ol samting olsem: olsem wanem tufala i mas spenem mane. Blong tokbaot eni samting we yutufala i gat defdefren tingting long hem, i gud yutufala i tokbaot fastaem samting we yutufala i agri long hem.

• ?Wanem samting we yutufala tugeta i wantem?

• ?Wanem ol gudfala tingting we yutufala wanwan i gat?

• Blong mared blong yutufala i stap strong, ?wan long yutufala o yutufala tugeta i save jenisim sam tingting?

Rul blong Baebol: “I nogud man i stap lukaot rod we i save givhan long hem nomo. Hem i mas lukaot rod blong givhan long ol narafala man.”—1 Korin 10:24.