?Ol Pleplei We i Joen Wetem Rabis Spirit Oli Gud Nomo?

?Wanem tingting blong yu?

• ?I wan denja blong lukluk ol stori blong ol man blong stadi long sta, ol man we oli yusum bod ya Ouija, o ol kleva?

• ?Ol stori blong olgeta i wan stori we oli jes aktem nomo blong soem ol gudfala samting mo ol nogud samting o i wan samting we i denja?

Atikol ya bambae i tokbaot from wanem maet wok blong rabis spirit i olsem wan samting we i gud nomo, mo from wanem yumi mas lukaotgud.

• ?Wan gudfala samting we i gud nomo?

• ?From wanem yu mas lukaotgud?

• Samting we yu save mekem

• Samting we oli narafala yangfala oli talem

?Wan gudfala samting we i gud nomo?

Ol bisnes man oli stap winim plante mane taem oli wokem ol muvi, ol program long TV, ol video gem, mo ol buk we oli soemaot wok blong ol rabis spirit. From samting ya, plante yangfala oli intres long ol samting olsem, wok blong talemaot fiuja, ol devel, ol vampaea, mo majik. ?From wanem? From ol risen ya:

• Faenemaot: Sipos i rili gat ol rabis spirit

• Save: Samting we bambae i hapen long fiuja

• Joen: Toktok wetem ol famle mo fren we oli ded

Maet ol risen ya oli no rong. Eksampol, i oraet nomo blong tingbaot ol fren mo famle we oli ded. Be i gat sam denja tu i stap we yu mas save.

?From wanem yu mas lukaotgud?

Baebol i givim sam strong woning long saed blong ol wok blong rabis spirit. Eksampol, hem i talem se:

“Bambae yufala i no . . . go luk ol kleva mo blong makem ol smosmol saen we oli luk, mo mekem singsing long man, mo blong wokem ol bisnes blong masing mo posen, mo blong singaot long ol devel blong dedman blong oli givhan long olgeta. Ol fasin ya i nogud we i nogud, Hae God i no laekem nating ol man we oli stap mekem olsem, i agens long olgeta.”—Dutronome 18:10-12.

?From wanem Baebol i givim strong woning long saed blong ol rabis spirit?

• Wok blong rabis spirit i mekem se yumi sapotem ol devel. Baebol i tijim se sam enjel oli rebel agens long God mo oli kam enemi blong hem. (Jenesis 6:2; Jud 6) Ol rabis enjel ya oli karem nem ya ol devel, mo oli stap lidim ol man oli go rong taem oli yusum ol kleva, ol man blong mekem nakaemas, ol man blong talemaot samting we bambae i kamtru, mo ol man blong lukluk ol sta blong talemaot fiuja. Taem yumi mekem ol samting ya, bambae yumi kam fren wetem ol enemi blong God.

• Wok blong rabis spirit i leftemap bilif ya se sam man oli save talemaot fiuja. Be, God i se: “Long stat blong olgeta samting, mi mi talemaot fastaem ol samting we biaen oli hapen. Bifo finis, mi mi talemaot ol samting we biaen oli kamtru.”—Aesea 46:10; Jemes 4:13, 14.

• Wok blong rabis spirit i leftemap giaman bilif ya se ol ded man oli save toktok wetem ol man. Be, Baebol i talem se: “Ol man we oli ded finis oli no moa save wan samting . . . I no gat Wok, mo tingting, mo save, mo waes long Hom blong ol Dedman.”—Prija 9:5, 10.

Hemia ol risen we oli mekem se ol Witnes blong Jehova oli stap longwe long wok blong ol rabis spirit. Mo tu, oli no wajem, ridim o plei ol video gem we i gat ol samting olsem ol sombi, vampaea, mo wok blong majik. Wan yangfala gel, nem blong hem Maria i talem se: “Sipos i gat eni samting we i joen wetem wok blong rabis spirit, mi no save wajem.”a

Samting we yu save mekem

• Yu mas gat strong tingting blong ‘mekem tingting blong yu i stap klin’ long fored blong Jehova taem yu stap longwe long ol wok mo pleplei we i joen wetem rabis spirit.—Ol Wok 24:16.

• Sakemaot eni samting blong yu we i joen wetem wok blong rabis spirit. Ridim Ol Wok 19:19, 20, mo makem gudfala eksampol we ol fas Kristin oli soem long saed ya.

Tingbaot: Taem yu stap longwe long ol wok mo pleplei we oli joen wetem rabis spirit, yu soemaot se yu sapotem Jehova. !Mo samting ya i mekem Jehova i glad tumas!—Ol Proveb 27:11.