Welfis Blong Cuvier i Save Daeva i Godaon Dip

Welfis blong Cuvier we nus blong hem i olsem dakdak, i save daeva i godaon 2,992 meta (9,816 fit). Long dip ples olsem, presa blong solwota i strong we i strong, samwe long 30,300 kilopaskal (4,390 psi). Mo tu, welfis ya i save stap longtaem aninit long solwota. Oli luk wan we i stap 3 aoa mo 42 minit bifo we i kam antap bakegen blong pulum win. ?Olsem wanem ol welfis ya we oli mas pulum win, oli save laef longtaem long ples we i gat strong presa mo smol oksijen?

Olsem plante narafala animol blong solwota, ol welfis oli save benem ol rib blong olgeta mo skwisimaot ol win long waet leva blong olgeta. Ol man blong stadi oli faenemaot se taem ol animol blong solwota oli mekem hat blong olgeta i slodaon, blad we i stap long ol haf blong bodi i go nomo long bren, hat, mo ol masel, nao oli no nidim tumas oksijen.

Mo tu, i gat wan protin, nem blong hem myoglobin, long ol masel blong ol animol ya, we i mekem se oli save holemtaet oksijen long ol masel, mo oli lego oksijen ya sloslo taem oli daeva i godaon dip. Oli gat plante moa myoglobin long ol masel blong olgeta i bitim ol man mo ol animol blong graon.

Nating se i olsem, wan man blong stadi i tokbaot ol welfis ya, i se: “Oli daeva i godaon dip bitim mak. Folem save we mifala i gat, mifala i no ekspektem se oli save daeva i dip olsem mo oli save stap aninit long solwota longtaem olsem.” Ol saentis oli hop se bambae oli kasem save moa long fasin blong ol welfis ya blong daeva i godaon dip, from we hemia bambae i givhan long ol dokta blong faenem sam moa tritmen blong ol man we oli no save pulum gud win.

?Wanem tingting blong yu? Fasin blong welfis blong Cuvier blong daeva i godaon dip mo stap aninit long solwota blong longtaem, ?i kamaot olsem nomo, o i gat wan Man we i wokem?