EKSPLENESEN BLONG OL VAS
Matiu 6:33—“Yufala i Mas Lukaot Kingdom Blong God Fastaem”
“Yufala i mas gohed blong lukaot Kingdom mo stret fasin blong hem fastaem, nao biaen hem i save givim ol narafala samting ya tu long yufala.”—Matiu 6:33, Baebol Long Niu Wol Translesen.
“Be fastaem yufala i mas lukaot kingdom blong God mo stret fasin blong Hem, mo ol narafala samting ya bambae hem i givim long yufala.”—Matiu 6:33, New King James Version.
Mining Blong Matiu 6:33
Kingdom blong God i wan gavman long heven we bambae i mekem wil blong God i kamtru long wol. (Matiu 6:9, 10) Yumi lukaot Kingdom fastaem, taem yumi mekem i kam moa impoten i bitim ol narafala samting long laef blong yumi.a Hemia i min se, yumi glad blong lanem evri samting long saed blong Kingdom ya, be i no hemia nomo, yumi glad tu blong talemaot ol gudfala samting we Kingdom bambae i mekem. (Matiu 24:14) Mo bambae yumi prea tu blong Kingdom ya i kam.—Luk 11:2.
Stret fasin blong God i minim ol fasin we i stret mo ol fasin we i no stret long tingting blong hem. (Ol Sam 119:172) Taswe, yumi lukaot stret fasin blong God taem yumi folem ol loa blong hem long saed blong gudfala fasin, we oli mekem i gud oltaem long yumi.—Aesea 48:17.
Hem i save givim ol narafala samting ya long yufala, i wan promes se sipos yumi lukaot Kingdom blong God fastaem, mo yumi folem ol gudfala fasin blong hem, bambae hem i givim evri samting we yumi nidim.—Matiu 6:31, 32.
Ol Vas Raonabaot Long Matiu 6:33
Jisas i talem ol tok ya long Matiu japta 5 kasem 7 long wan tok we hem i givim antap long hil. Plante man we oli lesin long Jisas oli pua. Maet oli ting se i stret blong tingbaot fastaem ol wok we oli mas mekem blong kasem ol samting blong laef, taswe oli gat smoltaem nomo i stap blong lukaot long Kingdom. Be Jisas i pulum olgeta blong tingbaot olsem wanem God i lukaot gud long ol plant mo animol we hem i krietem. Hem i promes blong mekem sem mak long ol man we oli lukaot Kingdom blong hem fastaem.—Matiu 6:25-30.
Rong Tingting Long Saed Blong Matiu 6:33
Rong Tingting: Man we i lukaot Kingdom bambae i kam rij.
Trutok: Jisas i talem se olgeta we oli lukaot Kingdom blong God fastaem, bambae oli kasem ol samting we oli nidim, olsem kakae mo klos. (Matiu 6:25, 31, 32) Be hem i no promes se bambae oli kasem ol rij samting, mo i no talem se sipos oli kam rijman, hemia i soemaot se God i blesem olgeta. Blong talem stret, Jisas i givim woning long ol man se oli no mas traem blong kam rijman, from we hemia i save mekem i had moa blong oli lukaot Kingdom fastaem. (Matiu 6:19, 20, 24) Aposol Pol i wok had oltaem blong sapotem Kingdom blong God, be samtaem hem i gat smol nomo long saed blong bodi. Hem i mekem olsem Jisas, hem i givim woning long ol man se i wan bigfala denja blong traehad blong kam rij.—Filipae 4:11, 12; 1 Timoti 6:6-10.
Rong Tingting: Ol Kristin oli no nid blong wok blong kasem ol samting we oli nidim blong laef.
Trutok: Baebol i talem se ol Kristin oli mas wok blong sapotem olgeta mo famle blong olgeta. (1 Tesalonaeka 4:11, 12; 2 Tesalonaeka 3:10; 1 Timoti 5:8) Jisas i no talem long ol man blong hem se oli mas lukaot Kingdom nomo, be hem i talem se oli mas lukaot Kingdom fastaem.
Olgeta we oli lukaot Kingdom blong God fastaem mo oli wok blong kasem ol samting we oli nidim blong laef, oli save gat strong tingting se God bambae i givhan long olgeta blong kasem ol samting ya.—1 Timoti 6:17-19.
a “Gohed blong lukaot” i kamaot long wan Grik tok we i soemaot se aksen ya i stap gohed oltaem, taswe yumi save tanem tu se “lukaot oltaem.” Kingdom i no wan samting we yumi intres long hem blong smoltaem nomo, be hem i impoten moa i bitim ol nara samting long laef.