Ol Sam 37:4—“Yu Mas Glad Tumas Long MASTA”

“I gud yu faenem bigfala glad long Jehova, mo bambae hem i givim ol samting we hat blong yu i wantem tumas.”—Ol Sam 37:4, Baebol Long Niu Wol Translesen.

“Yu mas glad tumas long MASTA, nao hem bambae i givim samting we yu wantem tumas long hat blong yu.”—Ol Sam 37:4, English Standard Version.

Mining blong Ol Sam 37:4

Man blong raetem Sam ya i pulum ol man we oli wosipim God blong oli glad long frensip we oli gat wetem Hem. Olgeta we oli mekem olsem, oli save sua se Jehovaa God bambae i givim samting we oli wantem, we i stret long tingting blong hem.

“I gud yu faenem bigfala glad long Jehova.” Narafala rod blong tanem tok ya se, “yu faenem glad we i bigwan tumas long Jehova,” “harem gud fulwan long wok blong MASTA,” mo “yu mas glad tumas long samting we MASTA i promes long yu.” Bigfala tingting long vas ya se yumi mas “faenem glad we i bigwan tumas” long wosip blong trufala God. (Ol Sam 37:4, futnot) ?From wanem yumi talem olsem?

Olgeta we oli wosipim Jehova oli gat tingting blong hem long evri samting, mo oli faenem tingting ya long Baebol. Oli save God, mo tu oli save se i waes blong obei long hem. From samting ya, tingting blong olgeta i klin long fored blong hem, mo oli no mekem plante bigfala mastik mo nogud desisen. (Ol Proveb 3:5, 6) Taswe, taem i luk olsem se ol man we oli griri mo mekem kruked fasin oli win, ol man blong God oli no kam kros o jalus. (Ol Sam 37:1, 7-9) Oli glad blong save se i no longtaem bambae God i finisim ol fasin we oli no stret mo blesem ol man we oli holemstrong long hem, from ol gudfala fasin blong olgeta. (Ol Sam 37:34) Mo tu, oli harem gud tumas blong save se Papa blong olgeta long heven i glad long olgeta.—Ol Sam 5:12; Ol Proveb 27:11.

“Bambae hem i givim ol samting we hat blong yu i wantem tumas.” Narafala rod blong tanem tok ya se “bambae hem i ansarem ol prea blong yu” o “bambae hem i givim samting we yu wantem tumas.” Hemia i no min se Jehova bambae i givim evri samting we yumi wantem. Jehova i olsem wan gudfala Papa we i save samting we i moagud long ol pikinini blong Hem. Mo tu, samting we yumi askem mo ol fasin blong yumi oli mas laenap wetem ol samting we hem i wantem. (Ol Proveb 28:9; Jemes 4:3; 1 Jon 5:14) Taem i olsem, yumi save gat strong tingting se “Man blong harem ol prea” bambae i lesin long yumi.—Ol Sam 65:2; Matiu 21:22.

Ol vas raonabaot long Ol Sam 37:4

King Deved blong Isrel bifo, i raetem Ol Sam 37. Hem i yusum rod ya blong folem ol leta long Hibru alfabet.b

Plante taem ol man oli mekem i nogud long Deved. King Sol mo plante narafala oli ronem hem blong traem kilim hem i ded. (2 Samuel 22:1) Be oltaem Deved i trastem God blong hem fulwan. Deved i save se Jehova bambae i panisim ol man nogud. (Ol Sam 37:10, 11) Nating se oli stap win long laef blong olgeta, be olsem “grin gras we i jes gru,” oli save kam drae mo lus.—Ol Sam 37:2, 20, 35, 36.

Ol Sam 37 i tokbaot fiuja blong ol man we oli folem loa blong God, mo trabol we ol man bambae oli kasem sipos oli no folem. (Ol Sam 37:16, 17, 21, 22, 27, 28) Buk blong Sam ya i halpem yumi blong kasem waes mo kam ol man we God i glad long olgeta.

Wajem sot video ya blong luk wanem samting we buk blong Ol Sam i tokbaot.