Ol Wok 1:8—“Bambae Yufala i Kasem Paoa”

“Taem tabu spirit i kam long yufala, bambae yufala i gat paoa nao yufala i witnes blong mi long Jerusalem, mo long olgeta ples long Judia mo Sameria, gogo yufala i kasem olgeta ples long wol.”—Ol Wok 1:8, Baebol Long Niu Wol Translesen.

“Bambae yufala i kasem paoa taem Tabu Spirit i kam long yufala, mo bambae yufala i witnes blong Mi long Jerusalem, mo long olgeta ples long Judia mo Sameria, go kasem ol laswan ples long wol.”—Ol Wok 1:8, New King James Version.

Mining blong Ol Wok 1:8

Jisas i promes long ol man blong hem se tabu spirit blong God bambae i givim paoa long olgeta blong prij long olgeta ples long wol.

“Taem tabu spirit i kam long yufala, bambae yufala i gat paoa.” Jisas i talem bakegen wan promes we hem i mekem finis long ol disaepol, se taem hem i gobak long heven, spirita blong God bambae i givhan long olgeta. (Jon 14:16, 26) Long yia 33 K.T., ten dei afta we Jisas i go antap long heven, ol man blong hem oli kasem tabu spirit ya we hem i promes blong givim long olgeta. (Ol Wok 2:1-4) Tabu spirit i mekem se oli save toktok long ol defdefren lanwis mo wokem ol merikel, mo tu i mekem se oli no fraet blong prij mo tokbaot bilif blong olgeta long saed blong Jisas.—Ol Wok 3:1-8; 4:33; 6:8-10; 14:3, 8-10.

“Bambae . . . yufala i witnes blong mi.” Tok ya “witnes” i min se man i “givim pruf” blong wan samting, taem hem i “talemaot” samting we hem i luk o i save. Ol aposol oli luk ol samting we i hapen long laef blong Jisas, taswe oli save givim pruf o talemaot ol samting long saed blong taem we hem i stap prij, i ded, mo i laef bakegen. (Ol Wok 2:32; 3:15; 5:32; 10:39) Ol trufala samting we oli talemaot i givhan long plante man, blong oli bilif se Jisas i Kraes o Mesaea we God i promes blong sanem. (Ol Wok 2:32-36, 41) Olgeta we oli bilif long tok blong ol aposol oli kam ol witnes blong Jisas, nao olgeta tu oli prij blong eksplenem mining blong laef, ded, mo laef bakegen blong Jisas.—Ol Wok 17:2, 3; 18:5.

“Kasem olgeta ples long wol.” Sam transleta oli tanem tok ya i kam “long ol laswan ples blong wol” o “long ol narafala kantri.” Jisas i soemaot se ol disaepol blong hem bambae oli wokbaot longwe blong witnes long hem. Bambae oli go longwe moa i bitim Judia mo Sameria blong talemaot bilif blong olgeta. Yes, bambae oli prij long plante moa ples mo long plante moa man i bitim Jisas. (Matiu 28:19; Jon 14:12) Bifo we 30 yia i pas, aposol Pol i raetem se “oli stap talemaot long olgeta ples long wol” gud nius ya long saed blong Jisas. Hemia i min se oli talemaot long ol ples farawe, olsem Rom, Patia (saotis blong Kaspian Si), mo Not Afrika.—Kolosi 1:23; Ol Wok 2:5, 9-11.

Ol vas raonabaot long Ol Wok 1:8

Luk, we i raetem buk blong Ol Wok, i gohed long ol samting we hem i tokbaot long en blong Gospel blong Luk. (Luk 24:44-49; Ol Wok 1:4, 5) Fastaem, hem i eksplenem olsem wanem Jisas i kamtru long ol man blong hem, afta we hem i laef bakegen. (Ol Wok 1:1-3) Biaen, hem i tokbaot olsem wanem Kristin kongregesen i stat mo i kam bigwan moa long ol yia 33 K.T. go kasem 61 K.T.—Ol Wok 11:26.

Ol vas raonabaot long Ol Wok 1:8 oli soemaot se ol man blong Jisas oli wantem save sipos Jisas bambae i kam King blong Kingdom blong God taem oli stap laef yet, o nogat. (Ol Wok 1:6) Long ansa we Jisas i givim, hem i talem se oli no mas wari tumas long saed blong taem we Kingdom ya bambae i stanap. (Ol Wok 1:7) Be oli mas putum tingting blong olgeta fulwan long wok ya blong witnes long Jisas long “olgeta ples long wol.” (Ol Wok 1:8) Long sem fasin, ol Kristin tede oli prij wetem ful paoa blong olgeta long saed blong gud nius blong Kingdom blong God.—Matiu 24:14.

Wajem sot video ya blong luk wanem samting we buk blong Ol Wok i tokbaot.