Revelesen 21:4—“Hem Bambae i Waepemaot Wota Blong Ae”

“Hem bambae i ravemaot wota blong ae blong olgeta, mo bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:4, Baebol Long Niu Wol Translesen.

“Hem bambae i waepemaot wota blong ae blong olgeta, bambae i no moa gat man i ded, i krae, mo i harem i soa long bodi blong hem, from we ol samting ya blong bifo oli lus olgeta.”—Revelesen 21:4, English Standard Version.

Mining blong Revelesen 21:4

God i promes blong tekemaot soa mo ol trabol we i mekem man i safa tede, be i no hemia nomo. Bambae hem i tekemaot stamba blong ol trabol ya tu.

“Hem bambae i ravemaot wota blong ae blong olgeta.” Ol tok ya i makem bakegen promes we Jehovaa i mekem tru long profet Aesea, se bambae Hem i “waepemaot wota blong ae long fes blong olgeta man.” (Aesea 25:8; Revelesen 7:17) Ol tok ya i soemaot olsem wanem God i kea long olgeta we oli krae from wan we oli lavem i ded, o from wan narafala samting we i mekem oli safa.

“Bambae i no moa gat man i ded.” Narafala rod blong tanem ol tok ya, hemia se “ded bambae i lus olgeta” o “bambae ded i no moa gat.” God i promes blong finisim ded mo fasin blong harem nogud we i kamaot from. Mo tu, bambae ol dedman oli save laef bakegen. (1 Korin 15:21, 22) Yes, “bambae hem i finisim” ded blong olwe.—1 Korin 15:26.

‘Man i no moa sore, i no moa krae, mo i no moa harem nogud long bodi blong hem.’ Promes blong God i no min se bodi blong man bambae i no moa naf blong harem soa, olsem taem i givim woning se bambae i gat denja o yumi save kasem kil. Be promes ya i soemaot se harem nogud long tingting, filing, o bodi blong yumi we sinb i stamba blong hem, bambae i finis.—Rom 8:21, 22.

“Ol samting ya blong bifo oli lus olgeta.” Lastok long vas ya i soemaot bigfala jenis we bambae i hapen long laef blong ol man. Wan buk we i eksplenem Baebol i talem se: “Fasin blong laef we yumi no save ronwe long ded, sore, krae, mo soa, bambae i finis, mo wan niufala fasin blong laef bambae i tekem ples blong hem.” Ol man bambae oli harem gud blong laef olwe long wol ya we i no moa gat trabol long hem, olsem God i wantem fastaem.—Jenesis 1:27, 28.

Ol vas raonabaot long Revelesen 21:4

Long stat blong japta 21, aposol Jon i tokbaot wan vison we hem i luk, i se: “Mi luk wan niufala heven mo wan niufala wol.” (Revelesen 21:1) Hem i yusum wan pijatok blong makem gud wan bigfala jenis we sam narafala vas blong Baebol oli tokbaot. (Aesea 65:17; 66:22; 2 Pita 3:13) “Niufala heven,” hemia gavman blong God long heven, we bambae i tekem ples blong olgeta gavman blong man, mo bambae i rulum “niufala wol,” hemia wan niufala grup blong man we oli laef long wol.—Aesea 65:21-23.

?Wanem i soemaot se vison ya i stap tokbaot laef long wol? Fas samting, hemia ol tok we i kam bifo long promes ya, se: “Tent blong God i stap wetem ol man.” (Revelesen 21:3) Yumi luk se promes ya i no go long ol enjel long heven, be i go long ol man long wol. Seken samting, vison ya i talem se “bambae i no moa gat man i ded.” (Revelesen 21:4) Ded i neva bin stap long heven, hem i wan samting we i kasem ol man long wol nomo. (Rom 5:14) Taswe, i klia se vas ya i tokbaot samting we bambae i hapen long wol.

Wajem sot video ya blong luk samting we buk blong Revelesen i tokbaot.