Jehova i Halpem Mi Blong Mekem Bes Blong Mi

Cecil i wan brata we i gat tingting daon mo oltaem hem i kaen long ol narafala. Eksampol blong hem wetem eksampol blong mama blong mi mo ol narafala brata mo sista long kongregesen, i pulum mi blong “wantem wok” mo blong mekem bes blong mi long wok blong Jehova. (Filipae 2:13) Bambae mi tokbaot stori blong mi long yu.

Eksampol Blong Mama Blong Mi i Givhan Long Mi

Mi bon long 1943. Papa mo mama blong mi oli laef long Ostrelia, long wan fam klosap long taon ya Bundaberg, long wan eria long Queensland we i gat ol plantesen blong sugaken. Ol man long eria ya, oli gat fasin ya blong go long taon evri Sarede aftenun, blong joen wetem ol narafala. Long wan long ol Sarede ya long 1939, papa mo mama blong mi oli mitim tu paenia (ol Witnes blong Jehova we oli prij fultaem) we oli tokbaot Baebol long tufala. Samting we oli talem i kasem hat blong papa mo mama blong mi, mo biaen tufala i kam ol Witnes blong Jehova. Taswe, mi mo sista blong mi Jean, mitufala i gruap long trutok. Be sore tumas, wan dei taem papa blong mi i stap long haos, hem i kasem wan aksiden nao i ded. Long taem ya mi gat seven yia nomo, mo mi sek nogud long samting we i hapen. Mi stap tingbaot yet se papa blong mi i wan man we i wok had mo i stap talem ol fani stori we i mekem mifala i laf. !Mi wantem tumas blong luk hem taem hem i laef bakegen mo savegud hem!—Ol Wok 24:15.

Mama blong mi i kaen mo i no mekem i strong tumas long mi mo sista blong mi. Hem i letem mitufala i talemaot samting we mitufala i laekem mo mitufala i no laekem. Be long semtaem, hem i strong blong folem ol stamba trutok blong Baebol mo blong wosipim Jehova. Mifala i stap go long ol miting oltaem, mo mama blong mi i stap talem long mi mo Jean blong no spenem tumas taem wetem ol pikinini blong skul we oli no Witnes. (1 Korin 15:33) Taem mi tingtingbak long ol taem ya, mi glad tumas long fasin blong mama blong mi blong tijim gud mitufala.

Mama blong mi i gat strong tingting blong prij, mo plante taem hem i stap mekem wok ya we naoia oli talem se haftaem paenia. Mi tingbaot se hem i stap visitim bitim 50 famle blong givim ol niufala Wajtaoa mo Wekap! long olgeta. Taem hem i kam olfala mo i no moa strong, hem i gohed blong gat strong tingting blong givhan long ol man we oli intres long trutok. Fasin blong hem blong lavem ol narafala, antap moa mi mo sista blong mi, i pulum mitufala blong lavem hem mo wantem folem eksampol blong hem. Nao long 1958, taem mi gat 14 yia, mi givim laef blong mi long Jehova mo mi tekem baptaes.

Ol Gudfala Fren Oli Leftemap Tingting Blong Mi

Samtaem biaen, wan yangfala long kongregesen blong mifala we i gat samwe 20 yia, we nem blong hem Rudolf, hem tu i tekem baptaes. Hem i blong Jemani. Evri Sarede moning, mi mo Rudolf i stap prij long ol man we oli stap wet long trak, taem famle blong olgeta i go long stoa.

Rudolf i wan brata we i gat strong tingting blong prij, mo hem i askem mi blong joenem hem blong mekem wok blong haftaem paenia long ol taem we mi spel long skul. Long wan long ol taem ya, mitufala i go prij tugeta long taon ya Gladstone blong sikis wik. Taon ya i stap samwe 190 kilometa long not blong Bundaberg. Fasin blong Rudolf blong kaen long mi olsem we hem i bigfala brata blong mi, mo glad we mi kasem long wok blong haftaem paenia, i pulum mi blong wantem kam wan fultaem paenia. Nao taem mi gat 16 yia, mi kam wan fultaem paenia, mo mi gat strong tingting blong gohed blong mekem wok blong Jehova fultaem long ful laef blong mi.

Faswan ples we mi mekem wok blong paenia long hem, hemia long Mackay, wan taon we i stap long not blong Bundaberg mo i no longwe tumas long Great Barrier Reef. Wan yia afta, taem mi gat 17 yia, oli askem mi blong kam wan spesel paeniaa long wan ples long Ostrelia we i drae mo i no gat tumas man long hem. Mi mekem wok blong paenia wetem Bennett (Ben) Brickell,b wan brata we tabu spirit i makemaot hem. Hem i olfala moa long mi, mo i gat samwe 60 yia. Hem i wan paenia we i gat plante ekspiriens mo ol narafala oli tinghae long hem from gudfala eksampol blong hem. !I wan bigfala blesing blong wok tugeta wetem hem!

Ples we mitufala i prij long hem i stap klosap long Galf blong Carpentaria, long notwes blong Queensland. Long taem ya, mi mo Ben nomo mitufala i Witnes long ples ya. Ol man long ples ya oli laef longlongwe long olgeta, mo samtaem i tekem plante aoa blong mitufala i draev long wan haos i go long narafala haos. Taem mitufala i stap ron long ol rod ya we i gat plante das, Ben i stap tokbaot ol ekspiriens we hem i gat long wok blong prij bifo. Hem i tokbaot se long Wol Wo 2, long taem we gavman blong Ostrelia i putum tabu long wok blong ol Witnes blong Jehova, ol brata oli yusum ol trak we i gat laodspika long hem blong prij. Hemia i mekem se plante moa man oli harem mesej blong Kingdom.

Afta we mitufala i prij fuldei, plante taem mitufala i slip klosap long rod.c Mitufala i karem ol faeawud mo statem wan faea blong kukum kakae blong mitufala. Mi mekem bed blong mi long wan samting olsem tapolen we mi putum long graon, ol blangket, mo wan pilo. Mi tingbaot yet filing we mi gat taem mi lukluk ol sta long naet, we oli klia gud from i no gat ol laet blong taon. Hemia i mekem mi harem se mi kam klosap moa long Jehova.

Long ples ya, sipos wan pat blong trak blong yu i nogud long rod, hemia i wan bigfala problem. Wan dei, taem mitufala i stap ron, aean ya we i holem tufala wil blong trak i brok. Ples i hot we i hot, mo klosap wota we mitufala i karem blong dring i finis. Ale, Ben i jam long wan nara trak i go long taon blong Cloncurry blong faenem jenis blong aean ya. Mi mi stap nomo long trak mo mi wet long hem blong tri dei. Evri dei i gat sam trak we oli pas, mo ol draeva oli kaen long mi nao oli givim sam wota blong dring. Wan long olgeta i givim wan olfala buk long mi. Hem i talem se: “Fren blong mi, yu ridim buk ya. Maet bambae i givhan long yu.” Nating se buk ya i no blong oganaesesen blong yumi, !be mi sek se i tokbaot ekspiriens blong ol Witnes blong Jehova long ol rabis kalabus blong ol Nasi!

Mi mo Ben i paenia tugeta klosap wan yia. Bifo we mitufala i seraot, hem i talem long mi se: “Brata blong mi, gohed blong holemstrong.” Eksampol blong Ben blong holemstrong long Jehova, i mekem tingting blong mi i strong moa blong gohed long fultaem wok blong Jehova.

Mi Go Long Gilead, Mo Biaen Mi Go Long Taewan

Afta we mi mekem wok blong paenia blong sam yia, oli askem mi blong mekem wok blong eria elda, we i minim se evri wik mi stap visitim ol defdefren kongregesen mo grup blong wan eria. Mi mekem wok blong eria elda long fo defren eria long Queensland mo New South Wales. Biaen, long 1971, mi kasem wan blesing we mi no tingbaot, hemia blong go long namba 51 klas blong Gilead. Gilead i wan skul blong ol Witnes blong Jehova we i stap long New York, mo skul ya i trenem man blong kam misinari. Mifala i stap long skul ya blong faef manis, blong stadi dip long Baebol mo joen gud wetem ol narafala studen mo ol tija, blong lefleftemap tingting blong mifala. Skul ya i rerem mi from nekiswan wok we mi kasem, hemia blong mekem wok blong misinari long Taewan.

Long klas ya, oli sanem naen long mifala i go long Taewan. Mi mi mekem wok blong misinari wetem wan brata blong Niusilan we nem blong hem Ian Brown. Mitufala i no save nating se Taewan i olsem wanem. Mitufala i no save tu se i stap wea, ale mitufala i jekem long wan map.

!Taewan i defren olgeta long ples we mi stap prij long hem fastaem long Queensland! Faswan jalens we mitufala i fesem, hemia blong toktok Jaenis. Ol miting blong kongregesen i wan impoten haf blong wosip we i mekem bilif blong yumi i strong, be i tekem longtaem blong mi kasem save long ol miting ya. Mo i had blong mi storian wetem ol brata mo sista. Ol jalens ya i mekem mi mo Ian i luksave from wanem mitufala i bin lanem plante samting long Gilead. Ol save mo trening we mitufala i bin kasem, wetem fasin blong stadi Baebol mo prea oltaem, i givhan long mitufala blong holemstrong long Jehova. Mo nating se mitufala i no naf blong storian gud wetem ol brata mo sista, be lav we oli soemaot long mitufala mo long Jehova, i leftemap tingting blong mitufala.

Mi Lanem Blong Toktok Jaenis

Olgeta misinari we oli kam long Taewan, oli stap joen long wan sot kos blong lanem Jaenis. Tija blong mifala i wan sista blong Ostrelia, we nem blong hem Kathleen Logan.d Hem i bin go long namba 25 klas blong Gilead. Mifala i traehad bigwan blong lanem lanwis ya. Mo kwiktaem nomo mifala i traem blong folem ol samting we mifala i lanem. Mi mo Ian i lanem baehat wan sot fastok blong yusum long faswan dei we mitufala i go prij. Taem mitufala i stap wokbaot i go long teritori, mitufala i stap tokbaot se hu nao bambae i prij long faswan haos. Mi mi olfala moa long Ian, taswe mi talem long hem se: “Yu smol, yu go fastaem.” Man blong haos ya i wan Jaenis we mifala i luksave se hem i skul gud. Hem i lesin wetem longfala tingting taem Ian i talem fastok blong hem we i miksim Jaenis wetem Inglis. Biaen, !mitufala i sek se hem i toktok gud Inglis mo i askem from wanem mitufala i kam! Mitufala i gat wan gudfala storian wetem hem, mo biaen hem i leftemap tingting blong mitufala blong no givap blong lanem Jaenis. Ol gudfala toktok blong hem i givim strong tingting long mitufala blong “gohed blong holemstrong,” olsem we Ben i bin talem long mi bifo.

Ples we mitufala i mas prij long hem i bigwan, hemia bighaf blong taon ya Taipei. Plante man oli neva harem trutok bifo, from we long taem ya i no gat plante Witnes we oli laef long ples ya. Be hemia i no stopem mi mo Ian blong gat strong tingting blong prij. Mitufala i stap givimaot plante handred magasin evri manis. Maet sam man oli tekem ol magasin nomo from oli wantem save se mitufala i hu, mo mitufala i stap traem blong talem wanem. Be mitufala i gohed nomo blong sakem ol sid blong trutok, mo mitufala i gat strong tingting se sam long ol sid ya bambae i gru long hat blong ol gudfala man.

Mi Faenem Wan Gudfala Fren We i Givhan Long Mi

Taem mi stap prij long ples ya, wan sista blong Taewan we nem blong hem Wen-hwa, i kam wan gudfala fren blong mi. Hem i lavem trutok mo i wantem givhan long ol narafala long ples ya, blong olgeta tu oli save ol trutok blong Baebol. Taswe hem i halpem plante misinari olsem mi blong kam gud moa blong toktok Jaenis. Sloslo mi stat blong lavem gudfala sista ya, mo long 1974, mitufala i mared.

Wen-hwa i givhan long ol misinari blong kasem hat blong ol man long wok blong prij. Hem i halpem mifala blong kasem save long ol kastom mo tingting blong ol man long Taewan. Mo tu, hem i halpem mifala blong jenisim fastok blong mifala, blong i save pulum intres blong ol man we oli go long skul blong Buda o Tao. Plante man oli wosipim spirit blong ol bubu blong olgeta, mo oli neva ridim o luk wan Baebol bifo. Taswe taem mifala i prij, mifala i tokbaot moa se i gat wan God we i wokem olgeta samting, mo nem blong hem Jehova. Sipos wan man blong wokem garen o wan man blong hukum fis, i talem se: “Heven nao i stap givim kakae long mifala,” mifala i save talem se: “?Be hu ya nao we i stap long heven mo i stap givim kakae long yumi? Hemia God ya we i gat olgeta paoa mo i mekem olgeta samting, mo i stret nomo blong yumi wosipim hem.”

Sloslo, mifala i kasem frut blong ol hadwok blong mifala, mo ol sid blong trutok we mifala i sakem i gru long hat blong plante gudfala man. Sam long ol Baebol stadi blong mifala oli mas traehad bigwan blong sakemaot ol giaman tijing mo kastom we oli bin folem blong plante yia. Be oli naf blong mekem from we ol misinari mo ol narafala pablisa oli givhan long olgeta, nao laef blong olgeta i kam gud moa. (Jon 8:32) Biaen, plante long olgeta oli kam ol brata mo sista. Sam long ol brata ya oli mekem plante wok insaed long kongregesen, olsem man blong givhan mo elda. Mo tu, sam long ol brata mo sista ya oli mekem wok blong Jehova fultaem, mo samfala oli wok long branj ofis blong Taewan.

Stat long 1976, mi gat blesing ya blong kam wan memba blong Branj Komiti Blong Taewan, be long semtaem mi gohed yet olsem wan misinari. Long 1981, oli askem mi mo Wen-hwa blong kam wok long Betel, mo mi gohed blong stap olsem wan memba blong branj komiti blong plante yia. Naoia mi mekem wok blong Jehova fultaem blong bitim 60 yia finis, mo samwe 50 long ol yia ya, mi spenem long Taewan wetem gudfala waef blong mi. Gudfala fren blong mi, Ian Brown, we mitufala i mekem wok blong misinari tugeta, i gohed blong mekem fultaem wok blong Jehova long ples ya, go kasem we hem i ded long 2013.

Mi mo Wen-hwa i gohed blong stap bisi long wok blong Betel, long kongregesen blong mitufala we i toktok Jaenis, mo long wok blong prij. Mitufala i talem bigfala tangkiu long Jehova from ol nambawan blesing ya we mitufala i kasem. Hem nao i givim paoa long mi, mo i mekem se mi wantem wok blong hem wetem fulhat blong mi, stat taem mi yangfala. Mo hem i gohed blong givhan olsem long mi mo Wen-hwa kam kasem naoia.