Mi Glad Se Mi Jusum Beswan Wok

Mi gruap long Ostrelia long wan ples we i stap aotsaed long taon. Papa mo mama blong mi wetem ol perens blong tufala oli lanem trutok long ol yia 1950. Mi stat blong prij taem mi gat 6 yia, mo mi baptaes taem mi gat 13 yia. Plante taem long ol skul holide mi stap mekem wok blong haftaem paenia. Mi lavem Jehova mo mi wantem mekem wok blong hem long ful laef blong mi.

Taem mi gat 15 yia, ol koj blong mi long skul oli luk se mi mi gud long saed blong spot. From samting ya, 2 haeman blong wan profesenol ragbi tim oli givim wan spot skolasip long mi. Mi glad long tingting ya blong kam wan popiula man long ragbi, be longtaem ya, mi givim laef blong mi finis long Jehova. Papa blong mi i talem se mi mas tingting gud long promes we mi mekem long Jehova, bifo we mi mekem desisen blong joen long wan spot. Mi folem samting we hem i talem mo mi luksave se mi no save mekem tufala samting ya wantaem, so mi no akseptem skolasip ya. Sam manis biaen, Australian Institute of Sport long Canberra i wantem givim wan skolasip long mi blong mi ron long wan longfala resis. Oli wantem blong mi representem Ostrelia long Commonwealth Games o Olympic Games. Nating se i olsem, mi talem no bakegen, from we mi wantem holemtaet promes ya we mi mekem long God ya we mi lavem hem.

Smol taem afta, mi lego skul mo mi stat blong mekem wok blong fultaem paenia, hemia wan mak we mi stap tingbaot longtaem finis blong kasem. Be from we famle blong mi i fesem problem blong mane, mi stop blong paenia mo mi wok fultaem blong draevem ol bigfala trak long wan fam. Longtaem ya, mi mi wan yangfala nomo, mo mi laef mi wan. Mi stap wosipim Jehova, be tingting blong mi i no stap fulwan long hem. Sloslo, mi no moa fren gud wetem Jehova. Ale mi stat blong joen wetem ol fren we oli stap dring bitim mak, oli mekem ol doti fasin, mo hemia i pulum mi blong mi wantem mekem sem mak. Mi no moa tinghevi long frensip blong mi wetem Jehova, mo mi stat blong mekem ol samting we mi save haremgud long olgeta blong smoltaem nomo.

Mi luksave se mi mas mekem sam jenis. Taswe mi muv blong go laef long wan narafala taon, blong mi save stap longwe long ol rabis fren we mi gat. Long ples ya, mi fren gud bakegen wetem Jehova, mo mi mekem plan blong mi stat paenia bakegen. Biaen, mi mitim Leann McSharry, we i gruap long fam mo hem i wan gel we i stap sem. Long taem ya, hem i wan paenia mo mitufala i kam ol gudfala fren. Mitufala i laekem blong tokbaot ol mak we mitufala i wantem kasem, mo mitufala i tokbaot tu wok blong misinari. Biaen, long 1993 mitufala i mared. Mitufala tugeta i wantem se Jehova i lidim laef blong mitufala.

Mitufala i Traehad Blong Kasem Ol Mak

Long sem yia ya, mi joenem Leann blong mekem wok blong fultaem paenia. From we mitufala i wantem gat wan simpol laef mo no mekem kaon, mitufala i pem wan haos we trak i save pulum blong mitufala i laef long hem. Blong sikis yia mitufala i go long eni ples we oganaesesen i askem mitufala blong go long hem, mo mitufala i mekem eni kaen wok blong sapotem mitufala. Mitufala i stap prij wetem ol smol kongregesen long ol bigfala teritori we ples i drae, i flat, mo we i stap long ol rimot eria long Queensland. Plante taem, bambae mifala i kamp mo mekem ol miting long bus o insaed long wan komuniti haos. Mitufala i glad tumas, nating se olsem, mitufala i stap tingting se: ‘?Mitufala i save mekem moa long wok blong Jehova?’ Samtaem biaen, mitufala i kasem ansa.

Oganaesesen i askem blong mitufala i go mekem wok olsem misinari long wan narafala kantri. Mitufala i sek mo harem se mitufala i no naf blong mekem wok ya, from we mitufala i no kasem trening long Skul Blong Gilead. Mitufala i laekem tumas wok blong prij, be from we mitufala i no gat plante Baebol stadi long ol ples we mitufala i stap prij long hem, mitufala i ting se mitufala i no gat gudhan blong tij.

Ale mitufala i talemaot ol filing blong mitufala long brata Max Lloyda we i wan memba blong Branj Komiti. Hem i leftemap tingting blong mitufala mo i talem se sipos mitufala i letem Jehova i yusum mitufala nating se mitufala i ting se mitufala i no naf, Jehova bambae i givhan bigwan long mitufala. Brata ya i olsem wan gudfala papa, mo advaes we hem i givim i mekem se mitufala i glad blong akseptem asaenmen ya blong go long Sri Lanka.

Wan Asaenmen We i No Isi

Long 1999, mitufala i kam long Colombo, we i kapital blong Sri Lanka. Laef long ples ya i defren long hemia we mitufala i bin gat aotsaed long ol taon long Ostrelia. Long Sri Lanka ol man oli stap faet, i gat ol man we oli pua, i gat plante tumas man, i gat ol man blong askem mane, mo i gat plante lanwis we i had blong kasemsave. Nating se i olsem, samting we i spesel long saed blong Sri Lanka, hemia ol brata sista mo plante man we oli gat tingting daon be oli no save Jehova yet.

Biaen, oli sanem mitufala i go long Kandy, wan naesfala taon we i stap long ol hil mo i fulap long ol plantesen blong ti mo ol bigfala tri. Plante man oli save taon ya from we i fulap long ol tempol blong Buda. Mo long ples ya, smol man nomo oli gat save long saed blong God ya we i wokem yumi. Long kongregesen we mitufala i stap long hem, ol brata sista oli toktok lanwis Sinhala mo Tamil, mo long ol miting mifala i yusum tugeta lanwis ya. I had blong lanem lanwis Sinhala, be ol brata sista mo ol Baebol stadi oli glad se mitufala i traehad blong lanem lanwis ya, nating se plante taem mitufala i mestem mo oli laf long mitufala.

Nating se i olsem, samting we i moa had hemia fasin agens we mitufala i fesem. Hemia faswan taem long laef blong mitufala we mitufala i luk olsem wanem ol man oli agensem trutok bigwan. Wantaem, i gat wan bigfala grup blong ol man we oli kros oli kam raonem mifala. Samfala oli bonem ol buk blong yumi, mo sam narafala oli stap kikim mo faetem mi wetem wan narafala brata. Long taem ya, mifala i prea blong Jehova i givhan long mifala blong stap kwaet mo blong i tingbaot mifala sipos mifala i ded. Wantaem nomo bigfala grup blong ol man ya oli lego mifala. Nating se mifala i seksek taem mifala i aot long vilej ya, be mifala i talem tangkiu long Jehova from we hem i protektem mifala.

Sloslo mitufala i stat blong luk Sri Lanka olsem hom blong mitufala. Nating se faet i mekem se ol man long aelan ya oli seseraot, be mitufala i luk we Jehova i yusum trutok blong pulum ol man we hat blong olgeta i stret oli kam joen long famle blong hem. Mitufala i gat plante gudfala memori blong naesfala aelan ya. Be afta long tu yia, ol lida blong skul oli stat blong gat paoa long ol haeman blong gavman, mo hemia i mekem se plante misinari oli mas aot long kantri ya.

Afta long taem ya, tingting blong mitufala i fasfas mo mitufala i harem nogud. Mitufala i stap tingting se: ‘?Bambae mitufala i go wea?’ Be biaen, Hed Kampani i sanem mitufala i go long Papua Niugini. Mo long Septemba 2001, mitufala i kasem Port Moresby we i kapital blong PNG.

Papua Niugini—Kantri We Ol Samting Oli Hapen We Yu No Tingbaot

Nating se Papua Niugini i stap klosap nomo long Ostrelia, be fasin blong laef mo kalja blong ples ya i defren olgeta. Mo bakegen, mitufala i mas lan long niufala ples ya. Mitufala i lanem lanwis ya Tok Pisin, we bighaf blong ol man ples ya oli stap toktok long hem, nating se kantri ya i gat bitim 800 lanwis.

Afta we mitufala i spenem tri yia long taon ya Popondetta, oli askem mitufala blong mekem wok blong eria elda. !Mitufala i neva tingbaot se Jehova bambae i yusum mitufala blong mekem wok ya! Mi mi laekem fasin blong ol eria elda blong givim advaes, gud han we oli gat blong tij, mo oli bigman long saed blong spirit. Be long saed blong mi, mi harem se mi no naf blong kam wan eria elda. Longtaem finis i kam, mak blong mi hemia blong mekem wok blong misinari. !Mi neva gat tingting ya se wan dei bambae mi mekem wok blong eria elda! Taswe mi sapraes tumas taem Jehova i givim nambawan privilej ya long mi.

Taem mitufala i visitim ol kongregesen we oli stap long taon, plante taem i gat elektrik paoa, wota, mo wan rum we i gat wan bed. Be long ol ples aotsaed long taon, plante taem i no gat ol samting ya. Mitufala i slip nomo long ol smol natanggura haos, mitufala i kuk aotsaed long faea, mo mitufala i go long reva blong swim. Be sipos i gat ol krokodael we oli stap klosap, bambae mitufala i kasem wota long baket mo karem i gobak blong swim long hem.

Asaenmen ya i no isi, from we mitufala i mas yusum paoa blong mitufala plante. Nating se i olsem, mitufala i trastem se sipos mitufala i ‘go wetem paoa we mitufala i gat,’ Jehova bambae i givhan long mitufala blong mekem gud wok ya. (Jajes 6:14) Samtaem i had blong go kasem ol kongregesen mo ol grup we mitufala i mas visitim, from we oli stap longwe long ol bus, oli stap long ples we i gat ol swam, o oli stap long ol hil we rod i nogud. Blong kasem ol ples ya, mitufala i go long ol trak we oli gat fo wil draev, mitufala i tekem bot, plen, mo plante taem mitufala i wokbaot nomo blong kasem ol brata mo sista.b

Taem mitufala i go blong visitim wan kongregesen we i stap klosap long boda blong Indonesia, mifala i mas draev bitim 350 kilometa long ol rod we i rafraf, mo mifala i mas krosem bitim 200 krik mo ol reva we plante long olgeta oli no gat brij. Long ol yia ya, mifala i spenem plante aoa blong digim mo pusumaot trak blong mitufala we i stak long sofmad, blong mifala i save go kasem ol brata mo sista we oli stap wet long mifala wetem bigfala smael long fes blong olgeta mo oli rerem ol kakae finis i stap.

Mo taem mitufala i go visitim ol vilej we oli stap antap long ol hil, mitufala i mas travel long ol smol plen. Plante taem antap long ol hil ya i gat fulap klaod, taswe paelot i mas faenem wan smol spes bitwin ol klaod ya blong hem i save luk se epot i stap wea. Be bifo we plen i lan, paelot bambae i jekem fastaem se i no gat ol pikinini o ol animol. Sipos i no gat, naoia mifala i mas rere blong lan long rod blong epot ya we i rafraf, i gat sofmad, mo i stap stret antap long top blong hil ya we i hae bitim 2,100 meta. Samtaem, blong plen i aot long ol vilej olsem, hem i mas ron i go kasem en blong rod blong epot we i stap stret long klifc blong i save flae i go.

Mo i gat samtaem we mitufala i mas wokbaot long ol smol rod we i go antap long ol hil we oli stanap stret, o mitufala i wokbaot long ol ples we i gat sofmad, ples i hot we i hot, mo basket blong mitufala i fulap long ol buk mo ol samting we mitufala i nidim. Be from we mitufala i gat kampani blong ol brata mo sista, mifala i gat janis blong laflaf mo tokbaot ol samting we i leftemap tingting blong mifala.

Mitufala i gat semfala filing olsem aposol Pol taem hem i raetem ol tok ya long 1 Tesalonaeka 2:8, we i se: “Mifala i lavem yufala tumas, taswe mifala i glad . . . blong givim laef blong mifala, blong givhan long yufala. Mifala i mekem olsem from we yufala i kam ol fren we mifala i lavem tumas.” Mitufala luksave se ol brata mo sista tu oli rere blong ded blong protektem mitufala long ol kriminol we oli holem masket. Wantaem, wan man we i holem wan naef i talem sam tok blong mekem Leann i fraet. Long taem ya, mi no save givhan long hem from mi stap long wan defren ples. Be kwik taem nomo wan brata i kam stanap blong protektem Leann long man ya. Brata ya i kasem smol kil nomo, taem ol narafala oli kam blong stopem man ya we i kros. Nating se ol raf fasin oli kam plante long kantri ya, be evri dei Jehova i givhan long mitufala blong gohed blong lukaot gud long ol brata mo sista long saed blong spirit.

Long Papua Niugini i no gat ol gudfala hospital, hemia i mekem se i had blong mitufala i lukaot gud long helt blong mitufala. Long 2010, Leann i kasem wan sik we klosap i lusum laef blong hem, taswe mitufala i mas gobak long Ostrelia blong kasem tritmen. Be Jehova i givhan long mitufala blong gat kwaet tingting. Mitufala i glad tumas se ol dokta oli faenem wan tritmen we i stret long sik blong hem. Wan long ol dokta ya i talem se: “Yutufala i bin mekem wok blong God, mo naoia hem i givhan long yutufala.” Plante manis biaen, mitufala i gobak long asaenmen blong mitufala.

Mitufala i Gat Plante Samting Blong Mekem Long Ostrelia

Mitufala i mas go kam long Ostrelia blong Leann i save kasem ol tritmen blong hem. Biaen, long 2012, oli askem mitufala blong stap nomo long Ostrelia blong mitufala i lukaot gud long helt blong mitufala. From we blong plante yia mitufala i no bin stap long Ostrelia, samting we mitufala i faenem i had moa, hemia blong jenisim tingting mo lan bakegen long fasin blong laef blong ples ya. Mitufala i harem nogud tumas blong lego asaenmen blong mitufala mo ol brata sista we mitufala i lavem tumas. Mitufala i harem olsem se mitufala i no mekem gud wok blong mitufala mo se Jehova i no moa save yusum mitufala. Mitufala i no moa harem se Ostrelia i hom blong mitufala. Mo long taem ya, mitufala i rili nidim help blong ol brata mo sista.

Afta we Leann i kam gud bakegen, mitufala i mekem wok blong spesel paenia long Wollongong, we i stap long New South Wales, long sot blong Sydney. Klosap wan yia afta, mitufala i glad tumas blong kasem invetesen blong go long Baebol Skul Blong Ol Brata Mo Woman Blong Olgeta (naoia yumi singaot se Skul Blong Kingdom Ivanjelis). Biaen, branj blong Ostrelia i askem mitufala blong mekem wok blong eria elda. Blong plante ya mitufala i bin visitim ol kongregesen mo ol grup we oli stap long ol taon we i bisi, ol smol taon we i no gat tumas man, mo ol vilej we ol man oli laekem blong fising. Naoia, mitufala i visitim moa ol kongregesen we oli stap long draeples long notwes blong Ostrelia, mo ful teritori blong Is Timo.

Mi glad tumas se waef blong mi i sapotem mi mo i gat strong tingting blong mekem wok blong Jehova. Hem i wan nambawan presen we i kam long Jehova. Leann i neva talem no long eni asaenmen, nating se i had. Taem oli askem long hem se wanem nao i givhan long hem blong i stanap strong, hem i talem se: “Mi mi talemaot evri samting long Jehova.” Mo taem hem i ridim Tok blong God, hem i letem Jehova i tijim hem blong i yusum gud tingting blong hem, kontrolem ol filing, o mekem samting we i stret.

Mi mi glad se mi no akseptem blong kam wan man blong spot, be mi jusum blong letem Jehova i lidim laef blong mi. Mi luksave se Jehova i save trenem yumi blong mekem enikaen wok sipos yumi rere blong akseptem eni wok we hem i givim long yumi. Mi lanem se sipos mi fesem sam hadtaem o mi mas mekem sam desisen, fastaem mi mas prea blong askem waes mo tabu spirit blong Jehova. Jehova i lavem yumi tumas, hem i promes blong givim wan gudfala laef long yumi, mo yumi wantem tumas blong luk olsem wanem bambae hem i yusum yumi we yumi olsem “ol graonpot” nomo, blong mekem plante moa samting we hem i wantem.—2 Korin 4:7.