Oltaem Jehova i Mekem Rod Blong Mifala i Stanap Strong

Tangkiu tumas long angkel mo anti blong mi we tufala i visitim famle blong mifala long 1976. Angkel blong mi i stap stadi Baebol wetem ol Witnes blong Jehova, mo hem i talem long papa mo mama blong mi se hem i lanem wan niufala samting. Fastaem, hem i talem ol tok blong Jisas long Matiu japta 23, long saed blong ol lida blong skul. Afta, hem i skelem ol lida blong skul long taem blong Jisas wetem ol lida blong jej tede. Mama blong mi i strong long skul Katolik, mo hem i no save bilivim se Jisas i tok strong olsem blong jajem ol lida blong skul. Hem i wantem luk samting we Baebol i talem.

Mifala i laef long kantri ya Lituenia, we hem i haf blong Soviet Yunion long taem ya. Gavman i blokem ol man blong oli no fri blong mekem wosip olsem oli wantem, taswe smol man nomo oli gat wan Baebol. Mama i askem long jej blong hem blong oli letem hem i holem Baebol fastaem blong ridim, nao hem i jes luk ol tok we Jisas i talem agens long ol lida blong skul we oli gat tu fes. Tok ya i pulum tingting blong Mama, mo hem i wantem save moa long saed blong Baebol. Ale hem i askem long brata we angkel blong mi i stadi wetem hem, blong i givim sam buk blong ol Witnes long hem.

I no longtaem, famle blong mi i stat blong joen long ol miting blong ol Witnes blong Jehova. Gavman i putum tabu long wok blong ol Witnes, taswe ples we oli mekem miting i jenis evri taem, mo samtaem oli mekem long bus klosap long ples blong mifala. Long 1978, Mama i baptaes, mo mi wetem sista blong mi Danguole we mitufala i twin, mitufala tu i baptaes. Mitufala i gat 15 yia long taem ya. Papa blong mi i baptaes sam yia biaen.

Taem Mi Yangfala, Jehova i Mekem Rod Blong Mi Stanap Strong

Wan manis afta we mitrifala i baptaes, mi mo Danguole i kasem bigfala fasin agens long skul. Long wan spesel miting long skul, sam tija oli luk we mitufala i no stanap taem oli plei singsing blong leftemap kantri blong Soviet Yunion. Hemia from we ol Kristin oli no joen nating long politik. Ol tija oli givim nem blong mitufala long hed tija, mo hem i talemaot mitufala long ol sikret polis. I no longtaem, ol polis ya oli visitim famle blong mifala blong kwestinim mifala.

Mo tu, ol tija long skul oli traem fosem mi mo Danguole blong bilif se i no gat wan God. Mi tingbaot taem ya we mitufala i gat 16 yia, nao evriwan long klas i mas raetem wan stori we nem blong hem se, “?From Wanem Mi No Bilif Long God?” Mi mi no agri long taetel ya, ale mi raetem long wan pis pepa se, “Mi mi bilif long God.” Mi putum pepa ya antap long desk blong mi. Taem tija i ridim, hem i kros we i kros, i singaot strong se, “!Oraet, yu raetem from wanem yu bilif!” Mi glad se hem i givim raet long mi blong raetem stori long saed blong bilif blong mi, mo sista blong mi tu i raetem stori olsem. Tu narafala gel i luk samting we mitufala i stap raetem, nao tufala tu i mekem sem mak. Hemia wan taem we mi luk olsem wanem Jehova i “mekem rod” blong mi stanap strong taem mi fesem trabol, mo hem i mekem samting ya plante taem bakegen long laef blong mi.—1 Korin 10:13.

Ol brata we oli stap lukaot long kongregesen oli letem mifala i holem wan buk blong ol Witnes blong wan manis, nem blong buk ya, From Paradise Lost to Paradise Regained. Long taem ya, ating i gat fo o faef kopi blong buk ya nomo long Lituenia. Mi mo Danguole i stap tingting se, “!I gud tumas sipos mitufala i save kipim buk ya!” Be mitufala i no save kipim, ale mitufala i tingbaot wan narafala rod. Bambae mitufala i raetemdaon ol toktok long ful buk ya. Nating se han blong mitufala i soa, be mitufala i glad tumas blong gat ol save ya blong mekem bilif blong mitufala i strong.

Long 1982, smoltaem afta we mi mi kasem 19 yia, kot i jajem mi se mi mas go long prisen blong tu yia, from we mi no wantem joen long ami. Laef long prisen i had, wetem ol rabis man raonabaot long mi. Be mi glad se wanwan taem mi mitim wan narafala Witnes we hem i stap long sem prisen. Mi finisim taem blong mi long prisen, be hemia no laswan taem we mi stap long prisen.

Blesing Blong Faenem Wan Waef We i Lavem Jehova

Afta we mi aot long prisen long 1984, mi mitim mo mi maredem wan naes sista blong Yukren we i lavem Jehova, nem blong hem Lidija. Afta we mitufala i mared, Lidija i aot long kantri blong hem, i muv i kam stap wetem mi long Lituenia. Hem mo famle blong hem oli Witnes blong Jehova, taswe hem tu i fesem fasin agens long skul. Samting we i leftemap tingting blong hem long taem ya, hemia ol stori blong olgeta we oli bin stanap strong long ol rabis kalabus blong ol Nasi, mo olgeta we gavman i sanem olgeta oli go stap longwe long Saebiria.

Long ol yia afta 1980, ol Witnes blong Jehova oli no fri yet blong mekem wok blong olgeta long Lituenia. Taswe, plante taem wan lafet blong mared i wan janis blong mekem asembli blong tu dei long fasin haed. Hemia nao samting we i hapen long mared blong mitufala. Plante oli kam blong luk mared blong mitufala, be long semtaem, mifala i lesin long plante tok, singim plante singsing, mo wajem sam drama we ol man oli werem ol klos blong bifo. Ating i gat samwe long 450 man oli stap, sam oli famle blong mifala we oli kam long ol defren ples long Soviet Yunion, mo i gat sam sikret polis tu, we mifala i no invaetem olgeta be sam brata oli luksave olgeta.

Pas Long Kot Bakegen

Plante taem gavman blong Soviet Yunion i sanem wan Witnes we i no jenisim tingting blong hem, i gobak long prisen. Taswe, long faswan yia blong mared blong mi, mi pas long kot bakegen. Mi mi pasem wan fuldei long kot, mo Lidija, we i gat bel, i pasem dei ya long wan hospital klosap. Oli no letem mi mi visitim hem taem kot kes i stap gohed. Be mi save go long hospital taem i gat wan spel long kot, mi save stanap nomo afsaed long windo blong rum we hem i stap long hem. Hem i openem windo, mo mitufala i gat smoltaem nomo blong lefleftemap tingting blong mitufala. Long en blong dei ya, kot i jajem mi se mi mas go long prisen blong tri yia.

Sore tumas, tu dei biaen, Lidija i lusum pikinini we i stap long bel blong hem. Hem i talem se soa we hem i kasem long filing blong hem, i olsem we oli terem bodi blong hem long tu haf. I no isi nating blong Lidija i winim hadtaem ya, mo antap long hemia, hem i stap traehad blong lan long laef long wan niufala kantri. Mo tu, hem i stap wetem papa mo mama blong mi we tufala i save smol nomo long lanwis blong Lidija, hemia lanwis blong Yukren mo Rasia. Nating se i olsem, Lidija i dipen fulwan long Jehova. Papa mo mama blong mi i traehad tu blong givim lav we hem i nidim mo blong lukaot gud long hem long hadtaem ya.

Jehova i Gohed Blong Mekem Rod Blong Mi Stanap Strong

Faswan taem we mi stap long prisen, i rerem mi blong seken taem. Wan samting we i givhan long mi blong stanap strong, hemia taem mi prij long ol narafala. Mi mekem olsem taem oli stap tekem ol prisena oli go long prisen long ol trak mo ol tren. Oli skwisim 15 o 20 man oli go long wan spes we i naf long faef o sikis man nomo. Mi tekem janis ya blong tokbaot Baebol wetem ol prisena. Mi eksplenem from wanem mi no joen long faet mo politik, mo hemia nao risen from wanem oli arestem mi mo putum mi long prisen. Mo tu, mi tokbaot from wanem mi bilif long God.

Oli tekem mi mi go long Marijampole prisen.a Ating mi wan nomo we mi Witnes long ples ya, mo mi stap long medel blong 2,000 rabis man we oli raf bitim mak. Wan taem nomo oli kilim mi nogud, be oltaem oli stap tok nogud long ol narafala prisena, oli wipim olgeta, mo oli kilim sam long olgeta i ded. Nating se i wan ples we i had tumas, mi traem blong leftemap tingting blong olgeta we oli harem nogud mo soemaot sore long olgeta, hemia wan fasin we oli no stap kasem long prisen.

Ol sikret polis tu oli traem blong mekem mifala i konfius mo pulum mifala blong bilivim ol giaman toktok. Oli stap faenemaot wanem we famle blong mi i stap tokbaot long haos blong mifala, mo oli talemaot ol samting ya long mi. Be oli twistim mo oli traem givim tingting long mi se oli stap raorao mo oli no joen gud. Mi neva bilivim samting ya, mo mi jes faenemaot wanem we famle blong mi i rili talem taem mi kamaot long prisen.—Matiu 10:16.

Wan taem, wan sista i askem long neba blong hem we i wan gad long prisen, blong i givim wan smol Baebol long mi long fasin haed. Baebol ya i stap long lanwis blong Rasia. Evri naet mi kopi sam vas blong Bigfala Toktok blong Jisas antap long hil, long wan smol pepa. Long nekis dei, taem mi stap wok long faktri long prisen, mi ridim ol vas ya bakegen mo bakegen taem i no gat man i stap wajem mi. Long fasin ya, mi lanem baehat ful toktok blong Jisas antap long hil long lanwis blong Rasia, nating se i no prapa lanwis blong mi. Wan dei, ol gad oli faenem Baebol ya mo oli sakemaot. Be nating, ol tok blong Jisas oli stap finis long tingting mo hat blong mi.

Mo tu, Lidija i sapotem gud mi. Hem i raetem leta klosap evri dei blong leftemap tingting blong mi. Be oli letem mi mi raet long hem tu taem long wan manis nomo. Nating se i olsem, hem i talem se ol leta we mi sanem oli naf blong givim tri impoten save long hem: Mi mi laef i stap, mi stap holemstrong long Jehova, mo mi lavem hem yet.

Jehova i Mekem Rod Blong Mi Stanap Strong Taem Hem i Ansarem Prea Blong Mi

Wan dei, wan grup blong ol prisena we oli fosem olgeta blong wok strong bitim mak, oli talem long ol bos blong prisen se oli mas mekem wok ya i kam isi moa, sipos no bambae oli no moa wok. Oli kasem strong panis from stronghed fasin blong olgeta. Afta, ol bos blong prisen oli talem long mi mo sam nara prisena, se bambae mifala i tekem ples blong ol stronghed ya mo mekem wok we bifo oli mekem.

Sipos mi no joen long grup ya, bambae mi kasem strong panis. Sipos mi joen, ol stronghed prisena bambae oli ting se mi mi agensem olgeta, nao bambae oli mekem i nogud tumas long mi. Hemia i save min se bambae oli kilim nogud mi o oli stikim mi long naef. Mi harem olsem se oli stap skwisim mi long tufala saed, mo mi no save wanem blong mekem. (2 Kronikel 20:12) Ale mi plis long Jehova blong hem i halpem mi.

Wantaem nomo, wan prisena long grup we mi stap wok wetem olgeta, i singaot mifala blong go wetem hem blong luk maneja blong wok ya. Prisena ya i no wan fren blong mi, mifala i wok tugeta nomo. Nating se i olsem, hem i talem long maneja se mi mas stap wetem grup blong hem. Tufala i rao strong gogo, maneja ya we i neva jenisim tingting blong hem long eni samting, i ronemaot mifala long ofis blong hem, mo i letem mi mi stap wetem grup ya blong wok. Mi glad we mi glad. (2 Pita 2:9) Long olgeta yia we mi stap long prisen, mi neva luk wan prisena we i traehad olsem blong halpem wan narafala prisena. Samting ya i tijim mi se Jehova i save yusum eniwan blong halpem yumi mo blong ansa long prea blong yumi.

Jehova i Mekem Rod Blong Lidija i Stanap Strong

Bambae mi eksplenem samting we Lidija i fesem taem mi stap long prisen. Hem i mas faenem wan wok. Be from we mi mi stap long prisen, bighaf blong ol bos oli no wantem givim wok long hem, from we oli fraet se sikret polis bambae oli mekem trabol long olgeta. Lidija i traehad gogo hem i faenem wan wok blong lukaot long 30 pikinini blong 12 aoa evri dei. !Wok ya i had tumas! Be Jehova i givim paoa long hem blong wok evri dei. Mo tu, ol Kristin brata mo sista blong ol defren ples long Lituenia, oli draevem trak plante handred kilometa blong kam leftemap tingting blong hem, kampani wetem hem, mo karem ol buk i kam long hem long lanwis blong Rasia. Hem i neva harem se i stap hem wan.

Wosipim Jehova Olsem Wan Famle

Taem mi kamaot long prisen, mi givhan blong setemap wok blong translesen long lanwis blong Lituenia, long fasin haed. Sam yia biaen, Soviet Yunion i finis, mo gavman blong Lituenia i givim raet long ol Witnes blong mekem wok blong olgeta. Biaen, mifala i setemap wan translesen ofis long Lituenia. Nating se mi mas draevem trak wan aoa haf blong kasem ofis ya, mi glad blong go givhan long wok blong translesen. Mi mekem samting ya evri wik blong faef yia.

Long Ogis 1997, oli singaot mi mo Lidija i go wok long branj ofis blong ol Witnes blong Jehova o Betel long Lituenia. Mitufala i glad we i glad. Mitufala i gat tu gel, Oksana we i gat naen yia, mo Svajune we i gat faef yia. Branj ofis i givim tri dei blong mifala i muv i kam long wan renhaos klosap long Betel, mo blong putum Oksana long wan niufala skul.

?Olsem wanem mitufala i lukaot gud long famle mo wok long Betel long semtaem? Evri moning mi girap eli mo go long Betel. Afta we Lidija i tekem tufala gel i go long skul, hem i joenem mi long Betel. Mo hem i kambak long haos bifo we tufala gel i kamaot long skul, blong hem i save spenem taem wetem tufala.

Mifala evriwan long famle i laekem tumas Fraede naet. Long taem ya, mifala i joen blong kukum kakae, klinim haos, mekem famle wosip, mo pleplei. Mo tu, mifala i mekem ol trip i go antap long ol bigfala hil, go long solwota, o go visitim sam narafala Betel long Yurop. Olsem nao, tufala gel ya i luk ol naes samting we Jehova i wokem, mo tufala i mitim ol brata mo sista blong ol narafala kantri. Mi mo Lidija i praod long tufala gel ya we tufala i stat long wok blong fultaem paenia taem tufala i gat 15 yia. Tede, Oksana mo hasban blong hem, Jean-Benoit, i wok long translesen ofis long Lituenia, mo Svajune wetem hasban blong hem, Nicolas, i wok long Betel long Franis.

Bigfala samting we i givhan long mi mo Lidija blong kam “wan bodi nomo,” hemia se mitufala i mekem wok blong Jehova i kam moa impoten i bitim ol narafala samting long laef blong mitufala. (Efesas 5:31; Prija 4:12) Nating se mifala i “stap long medel blong ol trabol” mo oli ronem mo kilim mifala blong plante yia, be mifala i neva harem se mifala i stap mifala nomo, mo “oli no fasem mifala we mifala i no save muvmuv.” (2 Korin 4:8, 9) Bakegen mo bakegen, mifala i luk we Jehova i mekem rod blong mifala i stanap strong, mo mifala i bilif se bambae hem i gohed blong mekem olsem blong olwe.