Ol Troli We Oli Givim “Witnes Long Olgeta Nesen”

Bitim ten yia finis, ol troli we ol Witnes oli yusum long wok blong prij, oli pulum ae blong ol man. Ol man long olgeta ples long wol, oli luksave ol troli ya we oli yusum blong prij. Ol troli oli naes mo i isi blong yusum olgeta. Ating yu agri wetem wan sista long Polan we nem blong hem Asenata, hem i talem se: “Ol troli oli simpol, oli no flas, be oli luk naes. I isi blong setemap mo muvum olgeta.”

?Yu yu save olsem wanem oli disaenem mo wokem ol troli ya?

Wan Gudfala Disaen

Long 2001, Hed Kampani i agri se ol brata mo sista long Franis oli save traem sam defdefren fasin blong prij long pablik ples, hemia i min se oli traem ol troli. Blong wokem ol defren disaen, oli tekem ol troli blong karem sutkes mo ol troli blong karem ol samting we yu pem long stoa, mo oli jenisim olgeta blong mekem oli stret blong soemaot mo storem ol buk blong yumi. Biaen, branj ofis blong Franis i jusum wan disaen, nao ol pablisa oli yusum blong plante yia.

Ol brata long Franis oli luk se troli i wan gudfala rod blong prij long pablik ples. Ale long 2011, Hed Kampani i agri blong traem ol troli mo ol tebol long New York, Yunaeted Stet. Kwiktaem nomo, ol paenia we oli traem ol troli oli luk se oli wok gud, mo i isi blong muvum olgeta oli go long ol defren ples. Mo tu, ol paenia oli talem sam samting we oli save mekem ol troli oli gud moa. Ol faswan troli, oli wokem long timba, hemia i mekem se oli hevi mo i had blong pulum olgeta i go antap mo i kam daon long ol step. Ale oli jenisim olgeta blong oli laet moa, be oli no laet tumas we win i save kafsaedem olgeta. Mo tu, oli yusum ol wil we oli bigwan moa, oli strong, mo i isi moa blong pulum ol troli long graon we i gat ston mo hol long hem. Mo tu, oli ademap wan smol bokis biaen, blong karem sam ekstra buk.

!Tes ya i soemaot se troli i wan gudfala rod blong prij! Ale long 2012, Hed Kampani i agri se ol brata mo sista long fulwol oli save yusum ol troli blong prij. Ol brata oli faenem wan kampani we i save wokem plante troli wantaem, mo i yusum ol samting we i no hevi tumas mo i save stap longtaem.

Long ol yia we i pas, oli jenisim sam smosmol samting long ol troli. Long 2015, oli ademap wan kava we oli wokem long plastik mo yu save luk tru long hem. Dina, we i stap long kantri blong Jojia, i laekem tumas kava ya. Hem i talem se: “Troli i gat renkot blong hem blong protektem ol buk.” Long 2017, long sam lanwis oli wokem posta we i gat magnet long hem. Wan brata long Polan we nem blong hem Tomasz, i talem se: “Bifo, i had blong jenisim ol posta we yumi fasem wetem glu. I wan gudfala tingting blong putum magnet long olgeta.” Long 2019, oli yusum sam defren samting blong wokem ol troli ya, blong oli save stap gud longtaem moa.

Wokem Ol Troli

Wan kampani nomo i wokem ol troli, mo biaen ol brata oli sanemaot olgeta long ol kongregesen long olgeta ples long wol. Praes blong wan troli i bitim 5,000 vatu, hemia i no kaontem praes blong sanemaot mo sam narafala samting. Kam kasem naoia, mifala i spenem klosap 189 milian vatu long ol troli, mo sanemaot 420,000 troli i go long ol kongregesen long olgeta ples long wol.

Blong yusumgud presen mane, mifala i odarem plante troli wantaem. Mo tu, naoia ol kongregesen oli save odarem ol pat blong fiksimap ol troli taem wan samting i brok, i bitim we oli askem wan niufala troli.

Yusum Ol Troli Blong Givim Witnes

Plante pablisa long olgeta ples long wol oli laekem blong prij wetem ol troli. Martina we i stap long Gana, i talem se: “Taem mifala i prij, mifala i stap go luk ol man. Be mi laekem tumas we ol man oli stap kam luk yumi long troli. Mo tu, troli i givim witnes long evriwan we oli pas.”

Long wan narafala kantri long Afrika, wan man i kam long troli mo i tekem sam buk long lanwis blong hem. Wan wik biaen, hem i kambak mo i talem se: “Mi ridim ol buk ya. Save ya i impoten tumas. Bambae mi serem wetem famle blong mi long vilej.” Vilej blong hem i stap 500 kilometa longwe long taon. Tu manis biaen, man ya i kambak long troli bakegen, mo i talem se: “Ol man long vilej oli ridim ol buk ya, mo oli laekem tumas. Oli wantem joenem ol Witnes blong Jehova. Be oli gat plante kwestin. Oli kasem save se oli mas draon long wota blong baptaes, be i no gat wan reva klosap long vilej blong mifala. ?Oli mas kam long ples ya blong baptaes?” Tufala pablisa long troli i mekem rod blong man ya i mitim wan paenia we i toktok lanwis blong hem, mo naoia tufala i joen oltaem blong storian long Baebol.

I gud tumas we ol Witnes oli stap yusum ol troli blong prij “long olgeta ples long wol, blong oli witnes long olgeta nesen.” (Matiu 24:14) ?Mifala i kasem mane wea blong pem ol troli ya? Mifala i yusum ol presen mane blong givhan long wok long fulwol, we plante taem ol man oli givim tru long donate.jw.org. Tangkiu tumas we yufala i gat gladhat blong givim presen mane ya.