Wok Blong Bildim Ol Haos We i Givhan Long Wok Blong Prij

Hed Kampani i glad blong yusum presen mane blong wokem ol bilding we oli givhan long wok blong talemaot Kingdom. Long sevis yia blong 2023, ol branj ofis blong ol Witnes blong Jehova oli yusum bitim 59 bilian vatu blong pem, bildim, o fiksimap plante Haos Kingdom mo Haos Asembli long olgeta ples long wol.a Ol kongregesen oli spenem plante moa vatu bakegen, blong lukaot gud long ol Haos Kingdom ya.

Mo tu, mifala i yusum presen mane blong bildim mo lukaot gud long ol branj ofis, we oli oganaesem mo lukaot long wok blong prij long fulwol. Mifala i mekem sam jenis long ol branj ofis blong sevem mane, nao mifala i save yusum mane ya blong sapotem wok blong bildim mo wokem bakegen plante Haos Kingdom mo Haos Asembli. Nating se i olsem, i nidim bigfala mane yet blong fiksimap, wokem bakegen, o bildim ol niufala branj ofis long plante kantri. ?From wanem i impoten blong mekem wok ya? ?Olsem wanem ol branj ofis oli givhan long impoten wok ya blong prij? Bambae yumi luk.

“Gohed Blong Yusum Olgeta”

!Plante long ol branj ofis oli wokem bitim 30 o 40 yia finis! Nicholas we i wok long Dipatment Blong Disaen/Konstraksen Blong Fulwol, i eksplenem se: “Nating se mifala i lukaot gud long ol bilding, be taem ol yia oli pas, oli kam olfala mo oli no moa strong. Taem mifala i wokem olgeta bakegen, mifala i save gohed blong yusum olgeta plante moa yia.”

Mo tu, mifala i mas mekem sam jenis long ol Betel, blong oli save gohed blong givim ol samting we oganaesesen i nidim. Long ol kantri we mifala i wokem ol branj ofis finis, namba blong ol pablisa i stap kam antap bigwan, mo i nidim plante moa volontia blong wok long ol branj ofis ya. Hemia i min se plante Betel we bifo oli stret long nid blong kantri, naoia oli smol tumas.

Wan narafala impoten samting, hemia blong meksua se olgeta we oli wok long ol branj ofis ya oli stap sef. Taem yumi stap kam klosap moa long en blong ol las dei, i gat plante moa bigfala disasta. (Luk 21:11) Sipos mifala i yusum ol niufala rod blong bildim o wokem bakegen ol branj ofis, olgeta we oli stap long ol bilding ya bambae oli sef moa. Mo tu, bambae oli save yusum ol bilding ya long taem blong disasta, blong givimaot ol samting we ol brata mo sista oli nidim, mo blong mekem wok blong prij i gohed.

“Jehova i Blesem Desisen Ya”

Long sevis yia blong 2023, ol brata oli mekem bigfala wok blong bildim mo fiksimap 43 branj ofis, folem plan we Hed Kampani i talem. Hemia i min se long plante Betel long wol, wok blong bildim o fiksimap ol bilding ya i stap gohed. Hemia sam eksampol we oli soemaot from wanem wok ya i impoten tumas.

Angola. Wan brata long Branj Komiti long Angola, nem blong hem Matt, i talem se: “I wan bigfala blesing blong luk olsem wanem profet tok blong Hagae 2:7 i stap kamtru long nambawan fasin. !Long ten yia, namba blong ol pablisa i kam antap 60 pesen! I gat plante moa wok blong lukaot gud long olgeta, taswe i mas gat plante moa brata mo sista long Betel, samting olsem tri taem antap long namba we i stap fastaem. Be haos Betel blong mifala i smol tumas, ale mifala i no save singaot plante moa brata mo sista oli kam wok. Hemia i mekem se plante long Betel oli stap wok had tumas, mo oli wok plante moa aoa i bitim ol aoa we oli sud wok.”

Oli askem long sam brata blong oli traem faenem wan rod blong mekem branj ofis long Angola i kam bigwan moa. Fastaem oli ting se i moa gud blong wokem bakegen, mo bambae i moa kwik tu. Be afta we oli mekem plante risej, oli luksave se hemia i no beswan rod blong yusum ol presen mane, be i moa gud blong pemaot wan bilding we i stap klosap mo mekem i gud bakegen. Matt i talem se: “Taem mifala long Branj Komiti i harem samting ya, mifala i wari se maet bilding ya i no stret long ol nid blong mifala olsem wan niufala bilding. Be naoia we bilding ya i finis, mifala i luk se i stret gud long nid blong mifala. Jehova i blesem desisen ya.”

Long fiuja, ating oli mas mekem branj ofis blong Angola i bigwan moa bakegen. Be niufala bilding ya wetem sam haos long graon blong Betel we i isi nomo blong oli jenisim olgeta, mo sam renhaos afsaed long Betel, oli mekem branj ofis ya i bigwan naf blong givhan long bigfala wok blong prij we i stap gohed long kantri ya.

Japan. Oli wokem branj ofis blong Japan klosap 40 yia finis, mo bighaf blong ol bilding oli neva wokem bakegen. Nating se oli mekem plante wok blong lukaot gud long ol bilding ya, be oli yusum olgeta bitim mak. Taswe naoia oli stap mekem olgeta oli gud bakegen.

Mo tu, long ol yia we oli pas, i gat plante jenis long ol Betel. Bifo long 2015, long Betel long Japan, oli rerem kakae long bigfala kijin, mo ol wanwan rum oli gat wan smol kijin nomo. Be naoia, bighaf blong olgeta we oli stap long Betel, olgeta nomo oli rerem kakae blong olgeta. Taswe, taem oli wokem bakegen ol rum long Betel, oli mekem ol kijin oli kam bigwan moa, nao i isi blong evriwan oli kukum kakae long rum blong olgeta. Wan sista we i wok long branj ofis long Japan, nem blong hem Kumiko, i talem se: “Kijin ya i mekem mi mi harem se mi stap long prapa haos blong mi, mo i givhan long mi blong folem niufala plan ya long saed blong kakae.”

Ol wok we oli mekem long branj ofis blong Japan, i wan impoten haf blong wok we i stap gohed long fulwol. (Matiu 28:19, 20) Japan i wan long tufala branj ofis nomo we oli stap printim ol Baebol. Taswe long faktri blong printim ol buk, oli stap putum ol niufala masin blong katem ol pepa long stret saes mo karemaot ol das. Hemia i protektem helt blong olgeta we oli wok long faktri ya. Praes blong ol masin ya i klosap 119,000,000 vatu. Be oli impoten, from we oli mekem se faktri ya i save gohed blong printim mo sanemaot ol buk mo Baebol we oli mekem bilif blong yumi i strong.

Taem oli stap wokem bakegen ol bilding ya, ol brata oli meksua se long semtaem oli save gohed blong printim ol Baebol. Wan brata long Branj Komiti blong Japan, nem blong hem Trey, i talem se: “Taem oli stap mekem ol wok long ol bilding ya, oganaesesen i stap printim ol Baebol long plante moa lanwis, mo namba we mifala i mas printim i stap go antap oltaem. Plante dipatmen oli mas mekem wan gudfala plan wetem ol wokman blong makem wan stret taem blong putum ol niufala masin ya, mo long semtaem gohed blong printim ol buk.” Taem wok ya blong bildim faktri bakegen i stap gohed, mifala i printim klosap 220,000 Baebol evri manis, stat long Maj kasem Ogis 2023. Nating se i no isi, be wok ya blong bildim faktri bakegen i finis, mo praes blong hem i stret long plan blong mifala.

Wan impoten samting, hemia se mifala i wokem ol bilding blong oli no yusum plante lektrik olsem fastaem. Ale, mifala i putum ol niufala sola paoa, we bambae i katem praes blong lektrik i godaon bitim 14 milian vatu evri yia. Mo tu, mifala i putum ol windo we oli gat tri glas, hemia bambae i katem praes blong lektrik i godaon bitim 1,200,000 vatu evri yia. Sola paoa mo ol spesel windo ya oli mekem praes blong wokem bakegen ol bilding i kam antap, be bambae oli katem praes blong lektrik i godaon bitim 415 milian vatu long ol yia we mifala i yusum ol bilding ya. Mo tu, bambae oli mekem se ol bilding ya oli no spolem envaeronmen.

“I Gat Plante Moa Projek Yet Blong Mekem”

Ol projek we mifala i mekem long tufala branj ofis ya oli soemaot bigfala wok we mifala i stap mekem long ol Betel, blong gohed blong givim ol samting we ol brata mo sista oli nidim long wok blong prij. Mo wok ya i no finis yet. Aaron we i wok long Dipatment Blong Disaen/Konstraksen Blong Fulwol, i talem se: “Ol brata oli mekem bigfala wok finis, be i gat plante moa projek yet blong mekem.” ?Bambae oli naf blong finisim ol wok ya? Yes. ?From wanem? Aaron i gohed se: “Mifala i yusum presen mane blong pem ol samting we mifala i nidim long ol impoten wok ya. Antap long hemia, mifala i glad tumas long fasin blong olgeta we oli volontia, we oli rere blong wok had, sem mak long olgeta we oli stap jenisim sam samting long laef blong olgeta blong givhan long fiuja. Hadwok blong ol brata mo presen mane we oli givim, i soemaot klia se Jehova i stap blesem wok ya.”—Ol Sam 110:3.

Ol presen mane i mekem se mifala i save gohed long wok ya blong bildim ol niufala branj ofis mo wokem bakegen sam olfala bilding. Plante oli givim presen mane tru long donate.jw.org. Tangkiu tumas we yufala i gohed blong givim presen mane wetem gladhat blong yufala, blong sapotem ol wok ya.