Ol Bigfala Asembli We Ol Man Oli “Harem Mo Oli Luk”

Bitim 130 yia finis, ol Witnes blong Jehova oli joen blong mekem ol bigfala asembli evri yia long ol defren ples. Long ol bigfala asembli naoia i gat 40 defren tok, wetem miusik, ol intaviu mo ol video. Blong mekem se asembli i givhan long evriwan mo i mekem tingting blong olgeta i strong moa blong wok, oli mas ‘harem mo luk’ evri samting i klia nomo. (Luk 2:20) ?Olsem wanem mifala i yusum presen mane blong yu, blong meksua se olgeta man oli kasem ol gudfala samting long ol bigfala asembli ya, nomata weples oli stap laef long hem?

Odio/Video i Mas Stret Long Ol Defren Ples We Oli Mekem Asembli

Long ol rij kantri, plante stadium oli gat ol masin blong odio/video finis. Taswe, taem mifala i rentem wan ples olsem, ?from wanem plante taem mifala i wantem yusum ol prapa masin blong mifala? David, we i wok long Brodkasting Dipatmen long Wol Hedkwota, i talem se: “I no gat plante ples blong rentem we ol man oli save lesin gud blong bitim sikis aoa, long wan program we bighaf blong hem hemia ol toktok nomo. Long ol ples blong mekem spot, oli yusum ol maekrofon mo spika blong talemaot ol sot mesej nomo mo plei miusik blong smoltaem. Oli yusum ol skrin blong video blong soemaot nomo hamas poen ol tim oli winim, ol samting we ol bisnesman oli wantem salem, mo blong plei bakegen sam smol haf blong ol gem blong spot. Be yumi wantem se ol man oli wajem ol video we oli longfala moa, mo harem klia mo kasem save long evri toktok we i kamaot long asembli ya.”

Ol ples blong mekem asembli oli defdefren, taswe oli mas mekem ol masin blong odio/video i stret long ol ples ya wanwan. Taem oli jusum finis ol ples blong asembli, Brodkasting Dipatmen long ol branj ofis i mekem desisen weples blong putum ol jea. Hemia i dipen long hamas man bambae oli kam mo saes blong haos asembli o stadium. Biaen, ol brata oli wokemaot weples oli mas putum ol spika mo skrin blong video, olsem wanem blong joenem ol rop blong olgeta, mo oli mekem wan lis blong ol samting we bambae oli nidim blong evriwan oli save luk mo harem program ya.

I had moa blong setemap odia/video long ol asembli we bambae oli kamaot long plante lanwis wantaem. Sipos i gat plan blong transletem ol haf blong asembli i go long narafala lanwis, ol transleta oli mas harem mo luk klia ol odio mo video, mo translesen blong olgeta i mas go long wan defren radio janel, blong olgeta we oli lesin long lanwis ya oli harem. I gud tumas se i gat ol spesel pleia we oli save plei plante lanwis wantaem, nao olgeta we oli lesin, nating se maet i gat eit grup we oli toktok ol defdefren lanwis, be oli save luk mo harem evri samting long prapa lanwis blong olgeta. David i talem se: “I no isi blong mekem ol masin ya oli ron gud, mo ol volontia we oli mekem olgeta oli wok, oli mas kasem plante trening fastaem.”

Bighaf blong ol branj ofis oli gat ol prapa odio/video masin blong olgeta, we oli yusum evri yia. Sipos i olsem, ol brata oli mekem plan blong sanem ol masin ya oli goraon long ol bigfala asembli long teritori blong branj ya. Long Yunaeted Stet nomo, branj ofis i spenem bitim 23 milian vatua evri yia blong sanem ol masin blong odio/video i go long ol ples blong mekem ol bigfala asembli. Nating se hemia bigfala mane, be i moa gud yet i bitim we mifala i pem mo mekem rere ol narafala masin. Steven, we i givhan blong lukaot long ol odio/video long wan bigfala asembli long Kanada, i talem se: “Tim blong mifala i mekem bes blong olgeta blong meksua se evri skru, evri rop, mo ol narafala samting blong odio/video i stap mo i wok gud, nao oli putum gud long ol bokis blong oli rere long nekis asembli.”

Pem Mo Lukaot Gud Long Ol Masin

I sas we i sas blong rentem ol masin blong odio/video, mo plante taem ol masin ya oli no beswan mo ol man oli no bin lukaot gud long olgeta. From samting ya, klosap oltaem mifala i pem ol masin we mifala i nidim. Naoia praes blong wan LED skrin blong putum long wol, we longfala blong hem faef meta mo bigfala blong hem tri meta, hem i klosap tri milian vatu, mo wan rop blong maekrofon we i longfala olsem 15 meta, hem i bitim 2,300 vatu. Taswe, Brodkasting Dipatmen i wok wetem Dipatmen We i Pem Ol Samting blong “kaontem praes” bifo we oli pem ol samting we oli nidim. (Luk 14:28) Oli mas tingbaot se: ?Bambae oli yusum ol samting ya blong givhan long hamas man? ?I moa gud blong pem ol niufala masin o nogat? ?I gat wan gudfala ples we i bigwan naf blong kipim ol masin ya? ?I gat ol tul mo ol man we oli tren finis blong fiksimap mo lukaot gud long ol masin ya?

Blong mekem se ol odio/video masin oli wok gud blong longtaem mo blong yusum gud mane we i blong mekem wok blong Kingdom i gohed, oltaem mifala i jekem mo fiksimap ol masin ya. Mo tu, taem mifala i mas sanem olgeta oli go long ol narafala ples, mifala i putum olgeta long ol strong bokis blong i no gat wan samting i spolem olgeta, mo plante taem mifala i mas fiksimap ol bokis ya tu.

Givim Wan Gudfala Witnes Mo Harem Asembli i Klia Nomo

Plante man we oli no ol Witnes, oli sapraes long gudfala odio/video we oli harem mo luk long ol asembli blong mifala. Wan man we i wok long wan bigfala kampani blong brodkasting long wol, i tokbaot olsem wanem ol tok mo video long wan bigfala asembli, oli nambawan tumas. Jonatan, we i wok long odio/video long ol bigfala asembli, i talem se: “Man ya i sapraes bigwan taem hem i faenemaot se olgeta long tim blong mifala oli ol volontia, mo hemia i no prapa wok blong olgeta. Hem i talem se long kampani blong hem, i tekem faef dei blong setemap samting we mifala i setemap long wan dei mo haf.” Long wan narafala asembli, maneja blong stadium i talem se: “I gat plante man oli kam long ples ya we oli save gud wok ya, !be mi neva luk wan we i gat save mo gudhan olsem yufala i gat!”

?Yu yu kasem ol gudfala samting we i kamaot long ol asembli from we i gat gudfala odio/video? Maet yu harem olsem David we i stap long Inglan. Hem i talem se: “Mi mi gat 88 yia, mo mi bin go long ol asembli long ful laef blong mi. Be mi luk se naoia i isi moa blong putum tingting blong mi i stap long ol gudfala save we i stap kamaot. Ol naesfala video oli mekem se taem i pas kwik, mo ol save we i kamaot i klia mo i isi blong folem.” Micheal, we i stap long Naejeria, i talem se: “Naoia i isi moa blong ol brata mo sista oli harem ol toktok mo lukluk ol video. From samting ya, oli save putum tingting i stap gud long program blong asembli mo tingting i no stap flae olbaot.”

Taem yu stap long ol bigfala mo spesel asembli blong yia ya “!Talemaot Gud Nius!” tekem smoltaem blong tingbaot ol wok we ol brata oli mekem blong givhan long yu blong harem mo luk ol samting long asembli ya. Mifala i talem tangkiu from ol presen mane we yufala i givim, wetem presen mane we i kamtru long donate.jw.org, blong givhan blong mekem ol asembli oli ron gud olsem. Tangkiu tumas.