I Kam Isi Moa Blong Printim Ol Buk Blong Halpem “Ol Defdefren Kaen Man”

Jehova God i wantem se “ol defdefren kaen man” oli “kasem stret save long trutok.” (1 Timoti 2:3, 4) Be ol Kristin brata mo sista mo ol man we yumi prij long olgeta oli toktok plante handred lanwis. Evri yia, yumi printim klosap tu bilian traket, magasin, buklet, mo buk long ol lanwis ya. ?Olsem wanem yumi printim ol buk long plante lanwis, be long semtaem yumi yusum gud presen mane?

Yumi No Moa Printim Ol Buk Long Plante Ples, Mo Yumi Yusum Ol Masin We Oli Gud Moa

Long ol yia 1980, yumi printim ol magasin long bitim 40 kantri. Be sloslo, hemia i jenis, mo naoia yumi printim ol buk long naen kantri nomo. Nating se i olsem, namba blong ol lanwis we yumi stap printim ol buk long hem i go antap bigwan, we namba i samwe sikis taem antap bakegen. ?Olsem wanem yumi save printim ol buk long plante moa lanwis be yumi no moa printim long plante ples? Wan impoten samting we i givhan, hemia se ol masin we yumi yusum oli gud moa long hemia we yumi yusum bifo.

Ol niufala masin oli mekem se yumi save printim plante moa buk long wan sot taem nomo. Ol olfala masin we yumi yusum bifo, man i mas spenem moa taem blong mekemrere masin blong printim ol defdefren buk. Be wetem ol niufala masin ya, kwiktaem nomo oli save jenis i go long narafala buk. Taswe long sot taem, oli save printim ol defdefren kaen buk long plante lanwis, nating se smol man nomo oli toktok ol lanwis ya. I tru, i nidim ol defdefren plet blong putum long ol masin blong printim ol defren lanwis. Long wan yia nomo, yumi bin spenem bitim 236 milian vatu blong pem ol plet blong ol masin.a Taswe, taem oli printim wan lanwis we smol man nomo oli toktok, oli yusum ol masin we oli wok wetem kompiuta mo oli no nidim ol plet ya. Ol masin ya, we sam long olgeta oli wok wetem laser, oli save printim smol namba blong ol buk. I no sas tumas blong mekem olsem, mo tu, yumi no westem pepa mo ink.

Long fulwol, long tri yia we i pas, yumi spenem bitim wan bilian vatu blong pem ol niufala masin blong printim mo putum kava long ol buk. Tingbaot olsem wanem yumi stap yusum sam long ol masin ya blong wokem ol Baebol. Bifo, afta we oli printim wan Baebol, i gat 40 defren step we oli mas mekem blong wokem buk ya, olsem somap, katem, mekem ol kona oli naes, smutum, mo flasem. Mo tu, afta we oli finisim ol wanwan step, plante taem oli mas muvum mo stakemap ol Baebol wetem ol han blong olgeta nomo. Tede, i gat ten step nomo we oli mas mekem, from we ol masin oli joenem plante step wantaem, mo oli karem ol Baebol oli go long nekis step tu. Hemia i min se wok we ol man oli mas mekem blong wokem ol Baebol i godaon bitim 55 pesen. Bifo, faktri long branj ofis long Japan, i wokem 2,000 Baebol nomo long eit aoa. Be naoia, !oli wokem 35,000 Baebol long eit aoa!

No Moa Kipim Tumas Buk Long Faktri

Ol jenis we yumi tokbaot finis oli givhan blong sevem presen mane. Eksampol, naoia we oli save printim smol namba blong ol buk wantaem mo jenis kwiktaem i go long narafala lanwis, oli no moa kipim plante buk long faktri. Gary we i wok long branj ofis blong Yunaeted Stet, i talem se: “Fastaem, mifala i no kasem save olsem wanem mifala i save sevem mane taem mifala i wokem smol namba blong ol buk. Mifala i ting se i moagud blong printim plante buk wantaem.” Gary i gohed se: “Long faswan yia we mifala i stat blong printim smol namba blong ol buk, mane we mifala i spenem long ol plet blong masin mo pepa we mifala i westem, i go antap seven milian vatu. Be mifala i sevem 177 milian vatu, from we mifala i no storem pepa mo ol buk we mifala i printim.” Naoia, yumi save yusum mane ya blong pem ol narafala impoten samting we yumi nidim, olsem bildim ol niufala Haos Kingdom mo givhan long ples we disasta i spolem.

Mo tu, taem mifala i no storem plante buk, i gat moa spes long ol branj ofis we oli save yusum blong mekem ol narafala wok long Betel. Antap long hemia, taem yumi no printim ol buk long plante ples, yumi no nidim ol bigfala branj ofis taswe yumi save bildim olgeta oli smol moa. Eksampol, long 2018, yumi seftem wok blong printim ol buk long branj ofis blong Briten, i go long Sentrol Yurop mo sam narafala branj ofis tu. From samting ya, taem yumi bildim niufala branj ofis long Chelmsford Inglan, yumi sevem plante handred milian vatu.

“!Yu Tingbaot Mi!”

Samting we i moa impoten, hemia se taem yumi mekem wok blong printim ol buk i kam moa isi, yumi stap halpem ol man blong kam klosap moa long God. Naoia, yumi naf blong printim ol buk long plante moa lanwis, nating se i nidim handred buk nomo long sam lanwis, olsem lanwis blong Walis, we 35,000 man nomo long Niukaledonia, Walis, mo Futuna, oli toktok. Long Ogis 2024, Baebol Long Niu Wol Translesen i kamaot long lanwis blong Walis. Wan pablisa we i toktok lanwis ya, nem blong hem Selafina, i talem se: “Bifo, mi ridim ol toktok long Franis Baebol we mi no kasem save long hem. Be taem mifala i kasem Baebol long lanwis blong Walis, wota i fulap long ae blong mi, mo mi prea se: ‘!O Jehova, yu tingbaot mi! Yu wan God we yu mekem i sem mak long olgeta man.’”

Namba blong ol man long Demokratik Ripablik blong Kongo we oli toktok lanwis Sanga, i no kasem 500,000. Nating se i olsem, buk ya !Enjoem Laef Olwe! i stap long lanwis ya. Josue, we i joen long wan kongregesen blong lanwis Sanga, i talem se: “Bifo, i hadwok blong eksplenem o transletem sam toktok long buk blong stadi, long ol Baebol studen. Mo samtaem, nating se mi traehad, ol studen oli no kasem save yet wanem we buk i stap talem. !I gud tumas blong kasem buk ya long Sanga! Naoia, ol studen oli kasem save ol tijing, mo mi no moa nid blong tekem plante taem blong eksplenem.”

Naoia, yumi printim mo givimaot ol gudfala save blong Baebol long plante moa man mo lanwis i bitim olgeta yia bifo. Ol presen mane blong yufala, wetem hemia we yu givim tru long donate.jw.org, i givhan long mifala blong mekem olsem. Tangkiu tumas we yufala i gat gladhat blong givim presen.