Fas Samuel

30 Nao long namba 3 dei, Deved wetem ol man blong hem oli kamtru long Jiklag.+ Be taem oli no kamtru yet, ol laen blong Amalek+ oli bin go faet mo stil long saot* mo long Jiklag. Oli spolem Jiklag mo oli bonem. 2 Oli tekem ol woman+ mo evri samting we oli stap long taon ya, stat long ol smosmol wan go kasem ol bigbigwan. Oli no kilim wan long olgeta i ded, be oli tekem olgeta evriwan oli go. 3 Taem Deved wetem ol man blong hem oli kamtru long taon ya, oli luk we i bon finis, mo ol waef blong olgeta wetem ol boe mo ol gel blong olgeta, ol man ya oli tekem olgeta i go finis. 4 Nao Deved wetem ol man blong hem oli stat blong krae bigwan gogo kasem we oli no moa gat paoa blong krae. 5 Mo tufala waef blong Deved tu, oli tekem tufala i go, hemia Ahinoam blong Jisrehel, mo Abigel we i wido blong Nabal blong Kamel.+ 6 Deved i wari bigwan from we ol man blong hem oli stap talem se bambae oli stonem hem. Ol man ya oli harem nogud from we oli lusum ol boe mo ol gel blong olgeta. Be Jehova we i God blong Deved, i mekem Deved i kam strong bakegen.+

7 Nao Deved i talem long pris ya Abiata+ we i boe blong Ahimelek, se: “Plis yu tekem efod i kam ya.”+ Ale Abiata i tekem efod i kam long Deved. 8 Nao Deved i askem long Jehova se:+ “?I stret blong mi biaenem grup blong ol raskol ya? ?Bambae mi kasem olgeta?” Nao God i ansa se: “Yu biaen long olgeta, from we bambae yu kasem olgeta, mo yu tekembak evri samting blong yu.”+

9 Nao kwiktaem nomo, Deved wetem ol 600 man+ blong hem oli go, mo oli kasem Wadi* Ya Besoro, nao sam long ol man blong hem oli stap long ples ya. 10 Deved wetem 400 man oli gohed oli go, be 200 man oli taed tumas nao oli no save gokros long Wadi Ya Besoro, nao oli stap nomo long ples ya.+

11 Ale oli faenem wan man Ijip aotsaed long open ples, nao oli tekem hem i go long Deved. Oli givim kakae mo wota long hem, 12 mo wan pis kek blong fig we oli draemap, wetem tu kek blong grep we oli draemap. Afta we hem i kakae, hem i kasem paoa* bakegen, from we hem i no bin kakae mo dring blong tri dei mo tri naet. 13 Nao Deved i askem long hem se: “?Yu yu blong wea mo hu i masta blong yu?” Nao man ya i se: “Mi mi blong Ijip, mo mi slef blong wan man long laen blong Amalek. Be masta blong mi i lego mi from we mi bin sik long tri dei we i pas. 14 Mifala i bin go faet mo stil long saot* blong ples blong ol man Keret,+ mo long teritori blong Juda, mo long saot* blong Keleb,+ mo mifala i bonem Jiklag long faea.” 15 Nao Deved i talem long hem se: “?Yu save tekem mi mi godaon long grup blong ol raskol ya?” Nao hem i talem se: “Sipos yu mekem wan strong promes long mi long nem blong God se bambae yu no kilim mi mi ded, mo se bambae yu no letem mi mi go long han blong masta blong mi, bambae mi tekem yu yu go long olgeta.”

16 Ale hem i tekem Deved i godaon nao oli kasem ol man ya. Long taem ya, ol man ya oli stap olbaot long open ples, oli stap kakae, oli stap dring, mo oli mekem lafet from plante samting we oli bin stilim long ples blong ol man Filistia mo long Juda. 17 Nao Deved i kilim olgeta stat long eli moning, taem i brok delaet gogo kasem long sapa, mo olgeta evriwan oli ded,+ be i gat 400 man we oli jam long kamel mo oli ronwe. 18 Nao Deved i tekembak olgeta samting we ol laen blong Amalek oli bin tekem,+ mo hem i tekembak tufala waef blong hem. 19 I no gat wan samting blong olgeta we i lus, stat long ol smosmol wan i go kasem ol bigbigwan. Oli tekembak ol boe mo ol gel blong olgeta, mo ol samting we ol man ya oli bin stilim.+ Deved i tekembak evri samting we ol man ya oli tekem. 20 Mo tu, Deved i tekem evri sipsip mo buluk blong ol laen blong Amalek, mo ol man blong hem oli mekem ol animol ya oli go fastaem long ol animol blong olgeta. Nao ol man ya oli talem se: “Hemia i blong Deved.”

21 Biaen Deved i kamtru long ol 200 man ya we oli stap klosap long Wadi Ya Besoro.+ Olgeta ya oli bin taed tumas nao oli no folem hem. Taem Deved i kamtru, olgeta ya oli kamaot blong mitim hem mo ol man we oli kam wetem hem. Nao taem Deved i kam klosap long olgeta, hem i askem long olgeta se oli oraet no olsem wanem. 22 Be olgeta man nogud mo olgeta we oli gud blong nating nomo, we olgeta tu oli bin go wetem Deved, oli talem se: “Olgeta ya oli no go wetem yumi, from samting ya eni samting we yumi tekem, yumi no mas givim long olgeta. Bambae oli tekembak nomo ol waef blong olgeta, mo ol boe blong olgeta, mo oli gowe.” 23 Be Deved i talem se: “Ol brata blong mi, yufala i no mas mekem olsem long ol samting we Jehova i givim long yumi. Grup blong ol raskol ya oli kam agensem yumi, be hem i protektem yumi mo i putum olgeta long han blong yumi.+ 24 ?Hu bambae i agri wetem yufala? Man we i stap blong lukaot long olting blong yumi, bambae hem i kasem sem samting olsem man we i godaon blong faet.+ Evriwan bambae oli kasem sem samting.”+ 25 Stat long dei ya, hem i mekem tok ya i kam wan rul, mo rul ya i kam wan loa long Isrel kam kasem tede.

26 Taem Deved i kambak long Jiklag, hem i tekem sam samting we hem i bin tekemaot long ol enemi blong hem, mo i sanem i go long ol fren blong hem we oli ol elda long Juda, mo i se: “Hemia wan presen* blong yufala we i kamaot long ol samting we mifala i tekemaot long ol enemi blong Jehova.” 27 Hem i sanem i go long olgeta we oli stap long Betel,+ mo long Ramot long Negeb,* mo long Jatiri,+ 28 mo long Aroere, mo long Sifmot, mo long Estemoa,+ 29 mo long Rakal, mo long olgeta we oli stap long ol taon blong ol laen blong Jeramehel,+ mo long olgeta we oli stap long ol taon blong ol man Kenaet.+ 30 Mo tu hem i sanem i go long olgeta we oli stap long Homa,+ mo long Borasan, mo long Atak, 31 mo long Hebron,+ mo long olgeta ples we hem wetem ol man blong hem oli bin stap go long hem.