Fas Samuel

7 Ale ol man Kiriatsearim oli kam tekem Bokis blong Jehova i go antap long haos blong Abinadab+ we i stap long hil, mo oli putumap* Eleasara we i pikinini blong Abinadab, blong i lukaot long Bokis blong Jehova.

2 Bokis ya i stap longtaem long Kiriatsearim, i stap 20 yia, mo ol man Isrel oli stat blong lukaot* Jehova.+ 3 Nao Samuel i talem long ol man Isrel se: “Sipos yufala i kambak long Jehova wetem fulhat+ blong yufala, yufala i mas sakemaot ol god blong ol narafala kantri+ mo ol pija blong Astoret,+ mo yufala i mas givim hat blong yufala fulwan long Jehova mo mekem samting we hem nomo i wantem,+ mo hem bambae i tekemaot yufala long han blong ol man Filistia.”+ 4 Nao ol man Isrel oli sakemaot ol pija blong ol Bal mo ol pija blong Astoret mo oli mekem wosip long Jehova nomo.+

5 Biaen Samuel i se: “Yufala i singaot olgeta man Isrel oli kam wanples long Mispa,+ mo bambae mi prea long Jehova long bihaf blong yufala.”+ 6 Nao oli kam wanples long Mispa, mo oli kasem wota mo oli kafsaedem long fored blong Jehova, mo oli fasting long dei ya.+ Nao oli talem se: “Mifala i mekem sin agensem Jehova.”+ Mo Samuel i stat blong wok olsem jaj+ blong ol man Isrel long Mispa.

7 Taem ol man Filistia oli harem se ol man Isrel oli kam wanples long Mispa, ol rula blong olgeta+ oli kam blong faet agensem ol man Isrel. Taem ol man Isrel oli harem samting ya, oli fraet long ol man Filistia. 8 Ale ol man Isrel oli talem long Samuel se: “Yu gohed blong askem long God blong yumi Jehova, blong i givhan long yumi+ mo i sevem yumi long han blong ol man Filistia.” 9 Nao Samuel i tekem wan smol sipsip we i stap titi yet, mo i bonem blong givim i go long Jehova olsem wan ofring we i bon fulwan.+ Mo Samuel i askem long Jehova blong i givhan long ol man Isrel, mo Jehova i ansa long hem.+ 10 Taem Samuel i stap bonem ofring ya, ol man Filistia oli muv i kam blong statem faet agensem ol man Isrel. Be long dei ya, Jehova i mekem tanda i faerap bigwan+ long ol man Filistia, mo hem i mekem we tingting blong olgeta i paspas,+ nao ol man Isrel oli winim olgeta.+ 11 Ale ol man Isrel oli aot long Mispa, oli ronem ol man Filistia, mo oli stap kilim olgeta i ded go kasem long saot blong Betkara. 12 Biaen Samuel i tekem wan ston+ mo i stanemap long medel blong Mispa mo Jesana mo i putum nem blong hem se Ebenesa,* from we hem i talem se: “Jehova i givhan long yumi olsem we hem i mekem bifo.”+ 13 Ol man Isrel oli winimgud ol man Filistia, nao oli no moa kam long teritori blong ol man Isrel.+ Mo long olgeta dei we Samuel i stap laef, han blong Jehova i gohed blong agensem ol man Filistia.+ 14 Mo tu, ol man Isrel oli tekembak ol taon blong olgeta we i bin stap long han blong ol man Filistia, stat long Ekron i go kasem Gat, mo oli tekembak teritori blong olgeta we ol man Filistia oli bin holem.

Mo tu i gat pis bitwin ol man Isrel mo ol man Amoro.+

15 Mo Samuel i gohed blong mekem wok olsem jaj long Isrel long ful laef blong hem.+ 16 Mo evri yia hem i stap visitim Betel,+ Gilgal,+ mo Mispa,+ mo i mekem wok blong jaj long ol ples ya. 17 Be oltaem hem i kambak long Rama,+ from we haos blong hem i stap ya, mo tu long ples ya hem i mekem wok blong jaj long ol man Isrel. Mo hem i wokem wan olta blong Jehova long ples ya.+