Esikel

42 Biaen hem i lidim mi mi go long yad aotsaed long saed i go long not.+ Mo hem i tekem mi mi go long bilding blong ol rum blong kakae we i stap afta long open eria,+ long not blong bilding we i joen wetem.+ 2 Longfala blong hem long saed blong entrens long not, hem i 100 kiubit,* mo bigfala blong hem i 50 kiubit. 3 Bilding ya i stap bitwin long yad insaed mo ston floa blong yad aotsaed. Yad insaed ya, bigfala blong hem i 20 kiubit.+ Ol ples blong wokbaot blong bilding ya oli fesem olgeta bakegen mo bilding ya i tri stori. 4 Long fored blong ol rum ya blong kakae,* i gat wan ples blong wokbaot we i stap insaed,+ mo bigfala blong hem i 10 kiubit mo longfala blong hem i 100 kiubit,* mo ol entrens blong olgeta i stap long saed i go long not. 5 Long bilding ya, ol rum blong kakae we oli stap long stori antap, oli smol moa long ol rum we oli stap long stori daon mo long stori long medel, from we ol ples blong wokbaot oli tekem moa spes blong olgeta. 6 Bilding ya i gat tri stori, be ol stori ya oli no gat ol bigfala pos olsem ol bigfala pos long ol yad. From samting ya, oli tekemaot moa spes long floa blong stori we i stap antap, i bitim stori we i stap daon mo stori long medel.

7 Stonwol aotsaed we i stap klosap long ol rum blong kakae, mo i lukluk i go long yad aotsaed we i fesem ol narafala rum blong kakae, longfala blong hem i 50 kiubit. 8 Ol rum blong kakae we oli stap long saed i go long yad aotsaed, longfala blong olgeta i 50 kiubit, be blong olgeta we oli fesem tabu ples, hem i 100 kiubit. 9 Ol rum ya blong kakae oli gat wan doa long saed i go long is, we man i folem blong go antap long ol rum ya, taem i aot long yad aotsaed i kam.

10 I gat ol rum blong kakae tu insaed long* stonwol blong yad long saed i go long is, hemia klosap long open eria mo bilding ya.+ 11 I gat wan ples blong wokbaot long fored blong olgeta, olsem long ol rum long saed i go long not.+ Longfala blong olgeta mo bigfala blong olgeta i sem saes nomo, mo oli gat sem doa blong go aotsaed mo oli wokem folem sem plan. Ol entrens blong olgeta 12 i olsem ol entrens blong ol rum blong kakae we oli stap long saed i go long saot. Stat long ples blong wokbaot, i gat wan entrens we man i save kam insaed long hem, hem i stap bifo long stonwol we i stap klosap, long saed i go long is.+

13 Biaen hem i talem long mi se: “Ol rum blong kakae long not mo ol rum blong kakae long saot we oli stap klosap long open eria,+ oli ol tabu rum blong kakae, hemia nao ples we ol pris ya we oli stap kam klosap long Jehova, oli stap kakae ol ofring we oli tabu we oli tabu.+ Hemia ples we oli putum ol ofring we oli tabu we oli tabu, ol sid ofring, ol ofring blong sin, mo ofring blong tekemaot fol, from we ples ya i tabu.+ 14 Taem ol pris oli kam insaed long holi ples, nao oli wantem go long yad aotsaed, fastaem oli mas tekemaot ol klos we oli werem blong mekem minista wok,+ from we ol klos ya oli tabu. Nao bambae oli werem ol narafala klos blong oli save go long ples we ol man oli gat raet blong go long hem.”

15 Afta we hem i mesarem eria insaed long tempol,* hem i lidim mi mi goaot long haos get we i lukluk i go long is,+ nao hem i mesarem ful eria ya.

16 Hem i yusum waelken blong mesarem samting,* mo i mesarem saed ya we i go long is. Mo folem waelken ya, longfala blong saed ya i 500 waelken long wan saed i go kasem narafala saed.

17 Hem i mesarem saed we i go long not, mo folem waelken ya blong mesarem samting, longfala blong saed ya i 500 waelken.

18 Hem i mesarem saed we i go long saot, mo folem waelken ya blong mesarem samting, longfala blong saed ya i 500 waelken.

19 Hem i goraon long saed i go long wes, mo i yusum waelken ya blong mesarem samting, mo i mesarem 500 waelken long longfala blong hem.

20 Hem i mesarem fofala saed blong hem. Ol fofala saed ya oli gat wan wol we i goraon long olgeta,+ blong seraotem ples we i tabu mo ples we i no tabu,+ mo longfala blong wol ya i 500 waelken+ mo bigfala blong hem i 500 waelken.