Ol Man Blong Givhan Oli Mekem Impoten Wok

LONG leta we aposol Pol i raetem long kongregesen blong Filipae, hem i talem se: “Mi Pol, wetem Timoti we mitufala i slef blong Kraes Jisas, mitufala i raetem leta ya i go long ol tabu man long Filipae we oli joen long Kraes Jisas, mo long ol ovasia, mo long ol man blong givhan.” (Fil. 1:1) Yu makemgud we Pol i talem halo long ol man blong givhan. I klia se ol man ya oli mekem wan impoten wok blong givhan long ol elda long kongregesen long taem bifo. Sem mak long taem blong yumi, ol man blong givhan oli mekem plante wok blong givhan long ol elda, mo blong mekem se kongregesen i no olbaot.

² ?Yu yu savegud ol man blong givhan long kongregesen blong yu? ?Yu yu save ol wok we oli mekem blong givhan long yu mo long kongregesen? Yumi save se Jehova i glad long hadwok blong olgeta. Aposol Pol i talem se: “Ol man we oli stap mekem gud minista wok blong olgeta, oli stap kasem gudnem blong olgeta wanwan mo oli fri moa blong tokbaot bilif blong olgeta we i kamaot long Kraes Jisas.”—1 Tim. 3:13.

OL MAK WE MAN BLONG GIVHAN I MAS KASEM

³ Ol man blong givhan, laef blong olgeta i mas klin mo stret, oli mas ol man we ol narafala oli save trastem, mo oli mas mekemgud wok blong olgeta. Yumi luksave samting ya from ol tok we Pol i raetem long Timoti blong talem ol mak we oli mas kasem. Hem i talem se: “Ol man blong givhan oli mas mekem ol fasin we narafala i save respektem olgeta from, oli no mas talem ol tok blong trikim ol man, oli no mas dring tumas waen, mo oli no mas griri nao oli mekem samting we i blong givhan long olgeta nomo. Mo oli mas holemtaet tabu tokhaed we i tokbaot bilif, we tingting blong olgeta i no stikim olgeta. Mo tu, i gud blong traem olgeta fastaem blong luk sipos oli naf blong mekem wok ya blong minista. Nao sipos oli no gat poen long olgeta, oli save mekem wok ya. I gud we ol man blong givhan oli gat wan waef nomo, mo oli lidim gud ol pikinini blong olgeta mo famle blong olgeta.” (1 Tim. 3:8-10, 12) Taem ol man blong givhan oli kasem ol hae mak ya, i no save gat wan man we i talem se kongregesen i givim wok ya long man we i no naf.

⁴ Nating se man blong givhan i yangfala o i olfala, be hem i prij oltaem, i no mestem wan manis. Hem i wok had long wok blong prij olsem Jisas. Taem hem i wok had olsem, hem i soemaot sem tingting olsem Jehova, we i wantem tumas blong sevem ol man.—Aes. 9:7.

⁵ Ol man blong givhan oli soemaot gudfala eksampol long klos mo hea, ol toktok blong olgeta, tingting mo fasin blong olgeta. Oli gat klia mo stret tingting, mo from samting ya ol narafala oli respektem olgeta. Mo tu, oli traehad oltaem blong fren moa wetem Jehova, mo oli tinghevi long wok we oli mekem long kongregesen.—Taet. 2:2, 6-8.

⁶ Ol man blong givhan, “i gud blong traem olgeta blong luk sipos oli naf.” Bifo we oli kam man blong givhan, oli soemaot finis se laef blong olgeta i blong Jehova. Oli putum ol wok blong Kingdom fastaem long ol narafala samting long laef blong olgeta, mo oli stap traehad blong kasem wok long kongregesen. Tru ya, ol man ya oli soemaot gudfala eksampol we ol narafala long kongregesen oli save folem.—1 Tim. 3:10.

WOK BLONG OLGETA

⁷ Ol man blong givhan oli mekem defdefren wok blong givhan long ol Kristin brata mo sista blong olgeta. Samting ya i mekem se ol elda oli gat moa taem blong tijim kongregesen mo blong lukaot long ol sipsip blong God. Taem ol elda oli givim wok long ol man blong givhan, oli tingbaot save mo gudhan we olgeta wanwan oli gat, mo samting we kongregesen i nidim.

⁸ Yu tingbaot sam wok we oli mekem: Maet wan man blong givhan i mekem wok ya blong lukaot long ol buk. Samting ya i mekem i isi blong yumi kasem ol buk blong yumi wanwan, mo olgeta we yumi nidim long wok blong prij. Sam narafala oli lukaot long ol kaon blong kongregesen mo ol map blong teritori. Maet sam oli lukaot long maekrofon, saon, oli man blong welkam, mo oli givhan long ol elda long sam narafala wok. I gat plante wok blong mekem blong fiksimap mo klinim Haos Kingdom, ale plante taem ol elda oli askem long ol man blong givhan blong oli lukaot long wok ya.

⁹ Long sam kongregesen, maet i gat plante man blong givhan, ale olgeta wanwan oli mekem defdefren wok. Be long sam kongregesen, maet wan man blong givhan i mekem plante wok. Samtaem, i gat moa long wan man blong givhan we i lukaot long wan wok. Sipos i no gat naf man blong givhan blong lukaot long olgeta wok, maet bodi blong elda i askem long sam brata we oli baptaes finis mo oli gudfala eksampol long kongregesen, blong oli lukaot long sam wok. Olsem nao, ol brata ya oli lanem plante wok, mo samting ya bambae i givhan long olgeta biaen, taem oli kam naf blong kam man blong givhan. Sipos i no gat brata, maet ol elda oli askem long wan sista we i gat gudnem long kongregesen, blong i mekem sam wok. Be ol sista ya oli no save kam man blong givhan. Wan brata o sista we i soemaot gudfala eksampol, hem i wan we ol narafala oli luksave se i stret blong folem fasin mo wosip blong hem. Hem i soemaot gud eksampol long ol narafala long fasin blong hem blong kam long ol miting, joen long wok blong prij, mekem gud wok blong hem long famle, jusum gud ol pleplei mo spel, klos mo hea blong hem, mo plante narafala samting bakegen.

¹⁰ Long kongregesen we i no gat plante elda, maet oli askem long man blong givhan blong i mekem ol kwestin blong baptaes wetem samfala. Bambae hem i mekem ol kwestin nomo we oli tokbaot ol tijing blong Baebol. Ol kwestin ya oli stap long Sam Moa Save “Haf 1: Ol Bilif Blong Ol Kristin.” Wan elda i mas mekem “Haf 2: Laef Blong Ol Kristin,” from we i tokbaot ol fasin blong yumi wanwan.

¹¹ Samtaem, maet ol elda oli luk se i moagud blong jenisim wok blong wan man blong givhan, sipos i gat wan gudfala risen. Be i gud tumas sipos ol brata ya oli save gohed longtaem lelebet long semfala wok nomo, olsem nao oli save lanem blong mekemgud wok ya.

¹² Samtaem, maet i gat sam narafala wok long kongregesen we ol elda oli luk se oli save givim long ol man blong givhan. Be man blong givhan i mas stap gohed gud long laef mo wok blong hem, “nao olgeta man bambae oli luk klia.” (1 Tim. 4:15) Sipos i no gat naf elda, maet wan man blong givhan i halpem elda blong lukaot long grup blong prij. Samtaem, maet wan man blong givhan i lukaot long grup, be hem i wok aninit long han blong ol elda nomo. Maet ol man blong givhan oli givim sam tok long Miting Blong Kristin Wok Mo Laef, maet oli lidim Baebol Stadi Blong Kongregesen, mo maet oli givim sam pablik tok. Sipos wan man blong givhan i naf, maet hem i kasem wan narafala wok long kongregesen we i no gat man blong mekem. (1 Pita 4:10) Ol man blong givhan oli mas glad nomo blong mekem enikaen wok blong givhan long ol elda.

¹³ Nating se wok blong man blong givhan i defren long wok blong elda, be wok ya tu i wan tabu wok. Mo wok ya i impoten from we i mekem kongregesen i gohed gud. Sloslo, wan man blong givhan we i mekemgud wok blong hem bambae i kam naf blong tijim kongregesen mo blong lukaot long ol sipsip blong God. Nao maet ol elda oli luksave se hem i naf blong kam wan elda.

¹⁴ Sipos yu yu wan yangfala brata o yu baptaes i no longtaem, ?yu yu stap traehad blong kam naf blong mekem wok blong man blong givhan? (1 Tim. 3:1) Evri yia, fulap niuwan oli joen long kongregesen. Taswe i nidim ol man we oli bigman long ol Kristin fasin blong oli lukaot long ol wok long kongregesen. Blong kasem wok ya, yu mas wantem tumas blong givhan long ol narafala. Wan rod blong kam olsem, i blong tingting dip long fasin blong Jisas. (Mat. 20:28; Jon 4:6, 7; 13:4, 5) Glad we yu kasem bambae i mekem se yu wantem givhan moa long ol narafala. (Wok 20:35) Taswe i gud yu glad blong givhan long ol narafala, mo blong fiksimap Haos Kingdom, mo blong tekem ples blong narafala blong givim tok long Miting Blong Kristin Wok Mo Laef. Mo tu, blong kam wan man blong givhan, yu mas gat wan gudfala program blong stadi yu wan, nao bambae yu gat ol nambawan fasin we Jehova i glad long olgeta. (Sam 1:1, 2; Gal. 5:22, 23) Brata we i stap traehad blong kasem wok ya, i soemaot tu se ol narafala oli save trastem hem, from we hem i mekem gud ol wok long kongregesen.—1 Kor. 4:2.

¹⁵ Tabu spirit i stap putumap ol man blong givhan, blong oli mekem ol gudfala wok long kongregesen. Taem olgeta long kongregesen oli wok gud wetem ol man blong givhan, i olsem we oli stap talem tangkiu from hadwok blong olgeta. Mo kongregesen i soemaot se i glad long plan we Jehova i putumap blong i gat oda insaed long famle blong hem.—Gal. 6:10.