?Samtaem yu harem se yu wantem ridim Baebol, be yu gat sem filing olsem olgeta ya antap? Plante man oli harem se i no isi blong ridim Baebol. ?Be olsem wanem sipos yu save se Baebol i save halpem yu blong gat wan gudfala laef? ?Mo olsem wanem sipos yu faenemaot se i gat rod blong mekem se yu glad blong ridim Baebol? ?Bambae yu yu glad blong faenemaot olsem wanem Baebol i save givhan long yu?

I gat sam man we oli luk se Baebol i givhan long olgeta taem oli ridim. Traem luk tingting blong olgeta.

Ezekiel we i gat bitim 20 yia, i talem se: “Bifo, mi mi olsem wan man we i stap draevem wan trak be i no save stret ples we hem i wantem go long hem. Be taem mi ridim Baebol, mi harem se laef blong mi i gat mining. I gat plante gudfala advaes long Baebol we mi save yusum evri dei.”

Frieda we i gat bitim 20 yia, i talem se: “Bifo, mi mi stap kros kwik. Be taem mi ridim Baebol, mi lanem blong bos long tingting blong mi. Mo samting ya i mekem se i isi blong mi joen wetem ol narafala, mo naoia mi gat plante fren.”

Eunice we i gat bitim 50 yia, i talem se: “Baebol i givhan long mi blong kam wan gudfala woman, mo blong mi sakemaot ol fasin blong mi we oli no gud tumas.”

Olgeta ya mo plante milian narafala man oli luk se taem oli ridim Baebol, hemia i givhan long olgeta blong oli gat wan gudfala laef. Yu tu yu save gat wan gudfala laef olsem olgeta ya. (Aesea 48:17, 18) Baebol i save givhan long yu tu, blong yu (1) mekem ol gudfala desisen, (2) faenem ol gudfala fren, (3) winim ol wari, mo beswan olgeta, (4) lanem trutok long saed blong God. Ol advaes blong Baebol oli kamaot long God, taswe sipos yu folem, bambae yu neva gorong. God i neva givim ol advaes we oli nogud.

Wan impoten samting, hemia blong yu stat blong ridim Baebol. ?Wanem gudfala rod we i save givhan long yu blong stat mo blong yu laekem ridim Baebol?

?Yu save mekem wanem blong yu laekem ridim Baebol mo blong yu kam gud moa long fasin ya? Traem luk faef advaes we plante man oli luk se i wok gud.

Yu jusum wan gudfala ples. Yu traem faenem wan ples we i kwaet. Yu mas blokem ol samting we oli save pulum tingting blong yu i gowe long samting we yu stap ridim. Sipos i gat gudfala laet mo fres win, hemia bambae i mekem se yu glad moa blong rid.

Yu gat stret tingting. Baebol i kamaot long Papa blong yumi long heven, taswe bambae hem i givhan moa long yu sipos yu gat fasin olsem wan pikinini we i rere blong lanem samting long papa blong hem we i lavem hem. Sipos yu gat sam nogud tingting, no yu gat prapa bilif blong yu long samting we Baebol i talem, i gud yu lego tingting ya i stap, mo yu letem God i tijim yu.—Ol Sam 25:4.

Yu prea bifo we yu rid. Baebol i talemaot ol tingting blong God, taswe yumi no sapraes se yumi nidim help blong hem blong yumi kasem save long Baebol. God i promes blong givim “Tabu Spirit long ol man we oli askem long hem.” (Luk 11:13) Tabu spirit bambae i givhan long yu blong kasem save ol tingting blong God. Sloslo bambae i openem tingting blong yu, blong yu kasem save gud ol “tingting blong God we man i no save faenemaot.”—1 Korin 2:10.

Yu rid blong kasem save. Yu no rid blong finisim ful Baebol nomo. Be i gud yu tingting gud long samting we yu stap ridim, mo yu askem ol kwestin olsem: ‘?Wanem gudfala fasin blong man ya we mi stap ridim stori blong hem? ?Olsem wanem mi save folem fasin blong hem?’

Yu putum wan stret mak blong kasem. Sipos yu wantem kasem gudfala samting from Baebol riding blong yu, i gud yu putum mak ya se yu mas lanem wan samting we bambae i mekem se laef blong yu i kam gud moa. Yu save putum ol mak olsem: ‘Mi mi wantem kasem save moa long God.’ ‘Mi mi wantem kam wan gudfala man, wan gudfala hasban no waef.’ Biaen, yu save jusum sam haf blong Baebol we bambae oli givhan long yu blong kasem ol mak ya.a

Ol faef advaes ya bambae oli givhan long yu blong stat ridim Baebol. ?Be wanem i save mekem se yu laekem blong ridim Baebol? Nekis haf bambae i givim sam moa advaes long saed ya.

?Bambae yu harem olsem wanem sipos yu ridim Baebol? ?Bambae yu harem se i ded, no i mekem yu harem gud? Hemia i dipen nomo long samting we yu mekem taem yu rid. I gud yumi luk sam samting we yu save mekem blong yu laekem moa blong rid.

Yu jusum wan Baebol we i klia mo we man i save trastem. Sipos yu ridim wan buk we i gat plante wod we i had, mo i yusum ol olfala tok we yu no save, ating bambae yu no glad blong ridim. Taswe i gud yu ridim wan Baebol we i isi blong kasem save long hem mo i tajem hat blong yu. Be long semtaem, Baebol ya, oli transletem long fasin we i stret mo i givim stret mining.a

Yu yusum ol niufala teknoloji. Tede Baebol i kamaot tu long Intenet. Sam Baebol, yu save ridim nomo long Intenet, no yu save daonlodem long kompiuta, long tablet, mo long mobaelfon blong yu. Sam long ol Baebol ya, i gat sam samting long olgeta we yu save go long hem blong jekem sam narafala vas we oli tokbaot sem topik, no yu save jekem vas ya long plante defren Baebol wantaem. Sipos yu laekem moa blong lesin long riding blong Baebol, i bitim we yu ridim, hemia tu i stap long Intenet. Plante man oli laekem moa blong lesin long riding blong Baebol, taem oli stap long wan pablik transpot, no oli stap was, no oli stap mekem ol narafala wok. I gud we yu tu yu traem wan rod we yu laekem moa.

Yu yusum ol tul blong stadi long Baebol. Ol tul blong stadi long Baebol oli save givhan long yu blong yu laekem moa blong rid. I gat ol map blong ol ples we Baebol i tokbaot, we oli save givhan long yu blong save ol ples we yu stap ridim, mo yu save pijarem ol samting we oli stap hapen. Ol haf we oli stap long ol magasin olsem hemia, mo haf ya “Baebol Tijing” long websaet ya jw.org, i save givhan long yu blong faenemaot mining blong plante haf blong Baebol.

Jenjenisim Rod Blong Yu Blong Ridim Baebol. Sipos yu harem se i had blong ridim Baebol stat long stat go kasem en, i gud yu stat blong ridim sam haf blong Baebol we yu yu laekem. Sipos yu wantem save gud ol man we Baebol i tokbaot olgeta, i gud yu go stret long ol buk blong Baebol we i tokbaot stori blong olgeta. I gat wan eksampol long bokis ya “Ridim Baebol Blong Savegud Ol Man Ya.” No maet yu wantem ridim Baebol folem ol topik, no ol stori we oli folfolem olgeta. I gud yu traem wan long ol rod ya.

Baebol i no wan buk olbaot nomo. Hem i talemaot ol advaes we oli kamaot long God ya we i wokem olgeta samting. (2 Timoti 3:16) Ol tok blong hem oli save gat bigfala paoa long yumi. Baebol i talem se: “Tok blong God i wan samting we i laef, mo i stap wok.” (Hibrus 4:12) Hem i gat paoa blong mekem laef blong yumi i kam gud moa long tu defren rod: Hem i givim gudfala advaes naoia blong lidim yumi evri dei, mo i mekem se yumi save God mo ol promes blong hem.—1 Timoti 4:8; Jemes 4:8.

Hem i mekem se laef blong yu i kam gud moa naoia. Baebol i save givhan long yumi long prapa laef blong yumi. Hem i givim gudfala advaes, blong yumi

• Joen gud wetem ol narafala. —Efesas 4:31, 32; 5:22, 25, 28, 33.

• Kontrolem filing blong yumi mo gat gudfala helt. —Ol Sam 37:8; Ol Proveb 17:22.

• Gat ol gudfala fasin.—1 Korin 6:9, 10.

• No sot long wan samting.—Ol Proveb 10:4; 28:19; Efesas 4:28.a

Wan yangfala man mo woman blong hem we tufala i blong Esia, tufala i glad tumas long ol gudfala advaes blong Baebol. Tufala i jes mared, taswe i no isi blong tufala i lan long ol fasin blong tufala mo blong tufala i toktok gud tugeta. Be tufala i stat blong folem ol samting we tufala i ridim long Baebol. ?Wanem i kamaot from? Hasban ya we nem blong hem Vicent, i talem se: “Samting we mi ridim long Baebol i givhan long mi blong winim ol problem blong mared long fasin we i soemaot lav. Taem mitufala i folem ol samting we Baebol i talem, mitufala i glad long laef blong mitufala.” Waef blong hem, Annalou i agri i se: “Mitufala i ridim stori blong samfala long Baebol we i givhan long mitufala. Naoia mi mi hapi mo mi glad long mared blong mitufala, mo mitufala i gat wan mak blong kasem long laef.”

Hem i mekem se yu save God. Vicent i no tokbaot mared nomo, be hem i talem tu se: “Taem mi ridim Baebol, mi harem se naoia mi kam klosap moa long Jehova i bitim bifo.” Vicent i makemaot wan impoten poen, hemia se Baebol i save givhan long yumi blong kasem save long God. Taem yu ridim Baebol, bambae yu kasem plante gudfala advaes, be i no hemia nomo, bambae yu naf blong save gud God mo kam fren blong hem. Mo bambae yu luk se hem i talemaot plante save long saed blong wan gudfala fiuja, wan taem we yu save harem gud long “laef ya we i prapa wan,” hemia laef we i no save finis. (1 Timoti 6:19) Hemia wan samting we ol narafala buk oli no save mekem.

Sipos yu putum wan mak blong ridim Baebol mo yu gohed long hem, yu tu yu save kasem ol gudfala samting ya, yes bambae laef blong yu i kam gud moa naoia, mo bambae yu save God. Be taem yu stap ridim Baebol, bambae yu gat plante kwestin. Long taem olsem, i gud yu tingbaot stori blong man Itiopia ya we i laef 2,000 yia bifo. Hem i gat plante kwestin long saed blong Baebol. Taem Filip i askem long hem sipos hem i kasem save samting we hem i stap ridim, hem i ansa se: “?Bambae mi mi save olsem wanem? I no gat man blong i talemaot mining blong hem long mi.”b Ale hem i agri se wan man we i save gud Baebol, i givhan long hem. Mo Filip nao we i wan disaepol blong Jisas, i givhan long hem. (Ol Wok 8:30, 31, 34) Long sem fasin, sipos yu wantem save moa Baebol, yu save go long websaet ya www.pr2711.com blong fulumap wan fom, no yu raet i go long wan long ol adres we i stap long magasin ya. Yu save askem tu long wan Witnes blong Jehova no yu go long wan Haos Kingdom klosap long yu. I gud yu tekem wan Baebol naoia mo yu letem hem i lidim yu, blong yu gat wan gudfala laef.