Trabol i Soemaot Se Wan Gudfala Taem i Stap Kam

“Long Lasdei, laef long wol ya bambae i kam strong tumas.”—2 TIMOTI 3:1.

?YU YU harem finis, no yu luk finis wan long ol trabol ya?

● Wan rabis sik i kilim plante man i ded.

● Plante handred man oli ded from we kakae i sot.

● Graon we i seksek i kilim i ded plante taosen man mo i mekem we plante moa man oli no moa gat ples blong slip.

Bambae yu tingbaot bakegen sam long ol trabol olsem taem yu ridim ol haf we oli kam biaen. Bambae yu luk tu se Baebol i talemaot ol trabol ya finis se bambae oli hapen long taem ya we hem i kolem ol “Lasdei.”a

Ol haf ya oli no blong mekem yu yu bilif se yumi laef long wan wol we i trabol. Nogat. Yu stap luk ol trabol ya finis. Defren olgeta, ol haf ya oli blong mekem yu yu gat gudfala tingting long saed blong fiuja. Bambae oli soemaot se taem ol sikis profet tok ya oli kamtru, hemia i min se ol “Lasdei” bambae oli finis i no longtaem. Mo ol haf ya bambae oli tokbaot tingting blong plante man we oli no wantem luksave se ol profet tok ya oli stap kamtru. Mo bambae ol haf ya oli givim gudfala risen blong bilif se wan gudfala taem i stap kam.

[Futnot]

Profet Tok 1. Graon i Seksek

“Bambae graon i save seksek bigfala.”—LUK 21:11, Nyutesteman wetem Ol Sam long Bislama.

● Long Haiti, ol man oli pulumaot Winnie aninit long wan haos we i foldaon taem graon i seksek. Winnie i gat 16 manis blong hem nomo. Wan man we i stap mekem ripot blong televisin long taem ya we graon i seksek, i harem hem i krae. Papa mama blong hem, tufala i ded taem graon i seksek, be hem i laef.

?WANEM I STAP HAPEN? Paoa blong graon we i seksek long Haiti long Jenuware 2010 i kasem 7.0. Long taem ya, bitim 300,000 man oli ded. Bitim 1.3 milian man oli lusum haos blong olgeta wantaem nomo. I tru se graon i seksek bigwan long Haiti, be i no long taem ya nomo we graon i seksek bigwan olsem. Long Eprel 2009 kasem Eprel 2010 i gat 18 taem we graon i seksek bigwan olbaot long wol.

?WANEM TINGTING BLONG PLANTE MAN? Graon i no stap seksek moa naoia i bitim bifo. Yumi luksave se graon i seksek moa from we yumi gat teknoloji.

?TINGTING YA I STRET? Yu traem tingbaot samting ya: Baebol i no talem hamas taem we graon bambae i seksek long ol lasdei. Be hem i talem nomo se “olbaot long wol” bambae “graon i save seksek bigfala.” Yes, graon i seksek i wan long ol samting we oli makemgud taem ya we yumi laef long hem.—Mak 13:8; Luk 21:11.

?WANEM TINGTING BLONG YU? ?Yu luk se graon i stap seksek bigfala olsem we Baebol i talem?

I no profet tok ya nomo long saed blong graon i seksek we i stap kamtru. Bambae yumi tokbaot namba tu profet tok.

[Tok blong makem poen long pej 4]

“Mifala [ol man we i stadi long ston blong graon] i kolem olgeta ol bigfala etkwek. Ol narafala man oli kolem olgeta ol bigfala trabol.”—KEN HUDNUT, WAN MAN LONG AMERIKA WE I STADI LONG OL STON BLONG GRAON (GEOLOGICAL SURVEY).

[Foto Credit Line long pej 4]

© William Daniels/Panos Pictures

Profet Tok 2. Kakae i Sot

“Ol man bambae oli gat hadtaem blong kasem kakae.”—MAK 13:8.

● Wan man i ronwe i go long vilej ya Quaratadji long Naeja, from we i no gat kakae long vilej blong hem. Ol kasen brata mo sista blong hem mo ol narafala famle blong hem tu oli kam long vilej ya, from we i no moa gat kakae long vilej blong olgeta. Be nating, man ya i slip hem wan long wan mat long graon. ?From wanem hem i stap hem wan? Jif blong vilej ya, we nem blong Sidi i eksplenem se: “Hem i no save fidim [famle blong hem], ale hem i no wantem stap wetem olgeta blong luk we oli safa.”

?WANEM I STAP HAPEN? Olbaot long wol, klosap 1 long evri 7 man i no gat inaf kakae blong kakae evri dei. Long Saot blong Sahara long Afrika, i moa nogud. Plante man oli go slip we oli no kakae gud. Yu traem tingbaot wan famle we i gat papa, mama, mo wan pikinini. Sipos i gat inaf kakae blong tu man nomo, bambae papa mama i letem pikinini i kakae fastaem gogo hem i fulap gud, ?afta, hu bambae i kakae haf kakae we i stap mo hu bambae i no kakae? ?Papa? ?Mama? Hemia nao desisen we ol famle olsem oli mas mekem evri dei.

?WANEM TINGTING BLONG PLANTE MAN? Graon blong yumi i stap givim plante plante kakae we inaf blong evriwan. Yumi nomo yumi mas lukaot gud mo seremaot gud ol kakae ya long olgeta man.

?TINGTING YA I STRET? I tru se ol fama oli save mekem se garen i karem plante kakae. Mo i gat ol trak, sip mo plen we i save karem kakae i go olbaot long evri ples i bitim bifo. I gud sipos ol gavman oli save lukaot gud long ol kakae ya, olsem nao ol man bambae oli no moa sot long kakae. Be afta we plante yia i pas, oli no naf yet blong winim problem ya.

?WANEM TINGTING BLONG YU? ?Mak 13:8 i stap kamtru? ?Nating se man i wokem plante moa masin, yu yu luk se kakae i sot yet long plante ples long wol?

Plante taem, graon i seksek mo kakae i sot i mekem wan narafala trabol i kamaot. Trabol ya tu i wan haf blong saen ya blong ol lasdei.

[Tok blong makem poen long pej 5]

“Bitim 33 pesen blong ol pikinini oli ded from sik ya numonia, sitsit wota mo ol narafala sik. Sipos oli bin kakae gud, bambae oli laef yet.”—ANN M. VENEMAN, WE BIFO HEM I DAEREKTA BLONG UN CHILDREN’S FUND.

[Foto Credit Line blong pija long pej 5]

© Paul Lowe/Panos Pictures

Profet Tok 3. Sik

“Bambae i gat ol strong sik.”—LUK 21:11.

● Bonzali i wok long wan ofis blong helt long wan kantri blong Afrika we ol laen blong kantri ya oli stap mekem faet long olgeta bakegen. Ol man we oli wok long maen, long taon blong hem, oli stap ded from wan sik we oli kolem Marburg.a Bonzali i traem bes blong hem blong givhan long olgeta. Hem i sanem toktok i go long ol man blong gavman long bigfala taon blong oli kam givhan long hem, be oli no kam. Fo manis biaen, taem oli kamtru, Bonzali i ded finis. Hem i kasem sik ya Mabeg long ol man ya we hem i stap traem blong sevem laef blong olgeta.

?WANEM I STAP HAPEN? Ol sik we oli mekem man i hadwok blong pulum win (olsem numonia), ol sik olsem sitsit wota, HIV/AIDS, tibi, mo malaria, oli rabis olgeta mo oli spolem laef blong man. Long ol yia we oli pas i no longtaem, ol faef stamba sik ya oli kilim i ded bitim 10 milian man. I olsem we long wan yia nomo, long evri 3 seken, wan man i ded from ol sik ya.

?WANEM TINGTING BLONG PLANTE MAN? Namba blong ol man long wol i stap kam antap oltaem. From samting ya, bambae i save gat plante sik mo bambae plante moa man oli save kasem ol sik ya.

?TINGTING YA I STRET? I tru se namba blong ol man long wol i kam antap bigwan. Be fasin blong man blong faenem, kontrolem, mo yusum meresin blong winim sik i kam antap tu. Taswe i stret nomo blong gat tingting ya se sik i mas godaon. Be defren olgeta, sik i stap kam antap.

?WANEM TINGTING BLONG YU? ?Yu yu luk ol man oli stap safa from ol strong sik ya we Baebol i talem?

Graon i seksek, kakae i sot, mo sik oli spolem laef blong plante milian man. Be i gat plante milian man moa we oli stap safa from ol samting we narafala man i mekem long olgeta. Ol man we oli blong givhan long olgeta ya, oli girap oli spolem olgeta bakegen. I gud blong luk wanem we profet tok blong Baebol i talem long saed ya.

[Futnot]

[Tok blong makem poen long pej 6]

“I nogud taem wan laeon no wan narafala anamol i kakae yu, be i nogud tu taem wan sik i kam insaed long bodi blong yu mo i stap kakae yu mo yu luk sik ya i stap kakae ol man raonabaot long yu tu.”—MICHAEL OSTERHOLM, WAN MAN WE I STADI LONG OL SIK.

[Foto Credit Line long pej 6]

© William Daniels/Panos Pictures

Profet Tok 4. Ol Man Oli No Moa Gat Lav

“Bambae oli no lavem famle blong olgeta.”—2 TIMOTI 3:1-3, God’s Word Bible.

● Chris i wok long wan ogenaesesen long Not blong kantri ya Wels. Ogenaesesen ya i blong givhan long ol woman we ol man blong olgeta i stap kilim olgeta. Chris i talem se: “Mi tingbaot wan woman we i kam luk mifala, we mi no moa luksave hem from we man blong hem i kilim nogud hem. Sam narafala woman we oli kam luk mifala, oli harem nogud bitim mak, mekem se oli no wantem lukluk mifala, oli stap lukluk floa nomo.”

?WANEM I STAP HAPEN? Long wan kantri blong Afrika, samwe 1 long evri 3 woman, man i mekem trabol long hem taem hem i pikinini. Wan stadi we oli mekem long semfala kantri ya, i soemaot se 35 pesen blong ol man oli harem se i oraet nomo blong kilim woman blong olgeta. Be i no ol woman nomo we oli stap kasem kil insaed long famle. Long Kanada, 3 long evri 10 man oli kasem kil from we woman blong olgeta i kilim olgeta.

?WANEM TINGTING BLONG PLANTE MAN? Oltaem i gat raf fasin insaed long famle. Tede oli stap mekem plante ripot long fasin ya, taswe moa man i save long hem i bitim bifo.

?TINGTING YA I STRET? Ol toksave long saed blong raf fasin insaed long famle i kam antap moa long ol ten yia we oli pas. ?Be ol toksave ya oli mekem se namba blong ol raf fasin i godaon? Nogat. I klia we ol man oli no moa gat lav.

?WANEM TINGTING BLONG YU? ?Seken Timoti 3:1-3 i stap kamtru? ?Yu luk se ol man oli no moa gat lav long famle blong olgeta?

Namba faef profet tok we i stap kamtru naoia, hem i long saed blong hom blong yumi, wol ya. Bambae yumi tokbaot wanem we Baebol i talem long saed ya.

[Tok blong makem poen long pej 7]

“Raf fasin insaed long famle i wan rabis fasin we plante man oli no stap ripotem tumas long polis. Oli kaontem se man i save kilim woman blong hem 35 taem, bifo we woman ya i go luk polis.”—WAN WOMAN LONG KANTRI YA WELS WE I STAP GIVHAN LONG OL WOMAN WE MAN BLONG OLGETA I KILIM OLGETA.

Profet Tok 5. Man i Stap Spolem Wol

“[God bambae i] spolem ol man ya we oli stap spolem wol.”—REVELESEN 11:18.

● Masta Pirri i wok long plantesen blong pamtri long vilej ya Kpor long Naejeria. Wok blong hem i blong karemaot wota blong pamtri blong mekem waen long hem. Taem bigfala oel i kafsaed bigwan long reva ya Naeja Delta, oel ya i spolem gud wok we Pirri i stap mekem. Hem i talem se: “Oel i kilim i ded ol fis, i spolem skin blong mifala, mo i spolem ol reva blong mifala. Mi mi no moa gat wan samting we mi save laef long hem.”

?WANEM I STAP HAPEN? Ol man we oli mekem ol stadi long trabol ya, oli talem se man i stap sakem bitim 6 milian tan blong doti i go long solwota evri yia. Samwe 50 pesen blong ol doti ya oli plastik mo bambae oli stap flot long solwota blong plante handred yia bifo we oli kam nogud. Ol man oli no spolem wol nomo. Oli stap yusum ol gudgudfala samting blong wol ya long wan fasin we i bitim mak. Ol stadi ya oli soemaot se wol i nidim wan yia mo faef manis blong wokem bakegen ol gudfala samting we ol man oli stap karemaot long hem long wan yia. Niuspepa ya blong Ostrelia, Sydney Morning Herald, i talem se: “Sipos namba blong ol man long wol ya i gohed blong kam antap, mo ol man oli gohed blong yusum ol gudgudfala samting blong wol ya olsem we i stap naoia, long yia 2035 bambae yumi nidim tu Wol.”

?WANEM TINGTING BLONG PLANTE MAN? Ol man oli gat gudhed mo oli save faenem rod blong winim ol problem ya. Yumi save blokem samting ya blong i no hapen mo yumi save sevem wol blong yumi.

?TINGTING YA I STRET? Plante man oli wok had blong givimaot plante toksave long saed blong ol samting we oli spolem graon, win mo solwota. Nating se i olsem, ol man oli gohed blong sakem plante moa doti.

?WANEM TINGTING BLONG YU? ?Yu wantem se tok blong Baebol i kamtru? ?Yu luk se i stret blong God i kam stretem ol trabol ya mo sevem wol blong yumi?

Antap long ol faef profet tok we yumi tokbaot finis, Baebol i talem ol gudfala samting tu we bambae oli hapen long ol lasdei ya. Bambae yumi tokbaot wan long ol samting ya long namba sikis profet tok.

[Tok blong makem poen long pej 8]

“Bifo, mi harem se ples blong mi i wan paradaes, be naoia i olsem we mi stap long wan ples blong sakem doti nomo.”—ERIN TAMBER, WAN WOMAN WE I LAEF KLOSAP LONG SOLWOTA LONG SAOT BLONG YUNAETED STET. HEM I STAP TOKBAOT NOGUD SAMTING WE I KAMAOT TAEM OEL I KAFSAED LONG GALF BLONG MEKSIKO LONG YIA 2010.

[Bokis blong pija long pej 8]

?God i Stamba Blong Ol Trabol Ya?

?From we Baebol i talemaot longtaem finis, ol trabol ya we yumi stap luk tede, hemia i min se God i stamba blong olgeta? ?Hem nao i mekem yumi safa? Yu save faenem ansa blong ol kwestin ya long japta 11 blong buk ya ?Wanem Samting we Baebol i Rili Tijim? we ol Witnes blong Jehova oli wokem.

[Foto Credit Line long pej 8]

U.S. Coast Guard photo

Profet Tok 6. Wok Blong Prij Long Olgeta Ples Blong Wol

“Gud nius ya blong kingdom, bambae ol man oli talemaot long olgeta ples long wol.”—MATIU 24:14, NW.

● Vaiatea i stap long wan long ol smol aelan blong Tuamotu long pasifik. I gat klosap 80 smosmol aelan long Tuamotu mo ol smosmol aelan ya oli kavremap wan ples olsem 802,900 skwea kilometa. I gat samwe 16,000 man oli laef long ol aelan ya. Nating se i olsem, ol Witnes blong Jehova oli stap kam luk Vaiatea mo ol man we oli stap raonabaot long hem. ?From wanem? From we ol Witnes oli wantem talemaot gud nius blong Kingdom blong God long olgeta man, nomata wanem ples oli stap long hem.

?WANEM I STAP HAPEN? Mesej blong Kingdom i stap kasem ol man long olgeta ples long wol. Long 2010 nomo, ol Witnes blong Jehova oli spenem bitim 1,600 milian aoa blong talemaot gud nius ya long 236 kantri. Hemia i min se evri Witnes blong Jehova oli spenem 30 minit evri dei blong prij. Long ol 10 yia we oli pas, oli wokem mo givimaot bitim 20,000 milian buk mo magasin we oli stanap long Baebol.

?WANEM TINGTING BLONG PLANTE MAN? Ol man oli stap talemaot ol tok blong Baebol longtaem finis i kam.

?TINGTING YA I STRET? I tru se plante man oli stap talemaot wan samting long saed blong Baebol. Be, oli mekem samting ya blong smoltaem nomo mo long smol ples nomo. Defren olgeta, ol Witnes blong Jehova oli folem wan plan blong talemaot gud nius long ol man long olgeta ples long wol. Long rod ya, plante handred milian man oli stap harem gud nius. Ol Witnes oli gohed nomo blong prij nating se sam gavman we oli rabis, oli agensem olgeta bigwan.a (Mak 13:13) Antap moa, ol Witnes blong Jehova oli no stap kasem pei taem oli prij. Oli glad blong yusum taem blong olgeta, mo blong givimaot buk blong olgeta we oli no askem ol man blong pem. Ol presen mane we oli kasem i mekem se wok blong olgeta i save gohed.

?WANEM TINGTING BLONG YU? ?Yu luk se “gud nius blong kingdom” i stap kasem olgeta ples long wol? ?Sipos profet tok ya i kamtru hemia i min se wan gudfala taem i stap kam?

[Futnot]

[Tok blong makem poen long pej 9]

“Jehova i letem taem naoia, taswe yumi mas gohed blong wok strong blong talemaot gud nius blong Kingdom. Bambae yumi yusum evri rod blong go talemaot gud nius ya long ol man long ol teritori blong yumi.”—2010 YIA BUK BLONG OL WITNES BLONG JEHOVA.

!Wan Gudfala Taem i Stap Kam!

“Bambae i no longtaem, ol man nogud oli lus. . . . Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.”—OL SAM 37:10, 11.

?YU YU wantem luk profet tok ya i kamtru? Yes, yumi evriwan i wantem se i kamtru. I gat gudfala risen blong bilif se samting ya bambae i kamtru i no longtaem.

Ol haf bifo oli tokbaot sam profet tok blong Baebol we oli soemaot klia se yumi stap long ol “Lasdei.” (2 Timoti 3:1-5) God i pulum ol man we oli raetem Baebol blong talemaot ol samting we oli stap hapen, blong bambae yumi save gat gudfala tingting long saed blong fiuja. (Rom 15:4) Ol profet tok ya we oli stap kamtru oli pruvum se ol trabol we yumi stap luk naoia bambae oli finis i no longtaem.

?Wanem bambae i kamaot afta long ol lasdei? Kingdom blong God bambae i rulum olgeta man. (Matiu 6:9) I gud yumi luk olsem wanem Baebol i tokbaot wol long taem ya:

● Bambae man i no moa hanggri. “Bambae i gat plante kakae long ples ya, we bambae ol hil oli fulap gud long hem.”—Ol Sam 72:16.

● Bambae i no moa gat sik. “Long taem ya, bambae i no moa gat man olbaot long kantri ya we i save talem se hem i sik.”—Aesea 33:24.

● Wol bambae i niuwan bakegen. “Draeples bambae i harem gud, i glad. Ples we ol samting i no save gru long hem, ol flaoa bambae oli stap gru long hem.”—Aesea 35:1.

Hemia sam profet tok blong Baebol we oli mekem yumi glad, from we i no longtaem bambae olgeta oli kamtru. ?I gud yu askem ol Witnes blong Jehova blong soemaot long yu from wanem oli bilif strong se i gat wan gudfala taem i stap kam?