Kam Gud Moa Long Ol Prea Blong Yumi

1. ?Jehova i wantem se ol man blong hem oli mekem wanem? (Yu luk pija tu.)

?YUMI save askem hu blong i halpem mo lidim yumi? Yumi save finis ansa blong kwestin ya. Yumi save prea long Jehova God, mo hemia nao samting we Jehova i wantem. Baebol i talem se: “Yufala i mas prea oltaem.” (1 Tes. 5:17) Yumi save prea long hem mo askem hem blong i halpem yumi long laef blong yumi. (Prov. 3:5, 6) From we Jehova i wan God we i glad nomo blong givim samting, hem i no putum wan limit blong talem hamas taem yumi save prea long hem long wan dei.

2. ?Bambae yumi tokbaot wanem long stadi ya?

² Yumi glad tumas we Jehova i letem yumi blong prea long hem. Be from we yumi gat plante samting blong mekem, samtaem i had blong yumi faenem taem blong prea. Mo tu, maet samtaem yumi harem se yumi nidim blong kam gud moa long ol prea blong yumi. Be yumi glad we Baebol i save leftemap tingting mo halpem yumi long saed ya. Long stadi ya, bambae yumi tokbaot eksampol blong Jisas, mo luk samting we yumi save mekem blong makemaot taem blong prea. Mo tu, bambae yumi tokbaot faef impoten samting we yumi save tokbaot long ol prea blong yumi, blong mekem ol prea blong yumi oli kam gud moa.

JISAS I MAKEMAOT TAEM BLONG PREA

3. ?Jisas i kasemsave wanem long saed blong prea?

³ Jisas i kasemsave se Jehova i tinghae long ol prea. Bifo we Jisas i kam long wol, hem i luk we Papa blong hem i stap ansarem prea blong ol gudfala man mo woman we oli wosipim hem. Eksampol, Jisas i bin stap long saed blong Papa blong hem, taem hem i ansarem prea blong Hana, Deved, Elaejah, mo blong plante moa gudfala man blong hem. (1 Saml. 1:10, 11, 20; 1 King 19:4-6; Sam 32:5) !Hemia nao from wanem Jisas i tijim ol disaepol blong hem blong oli prea oltaem, mo wetem strong tingting!—Mat. 7:7-11.

4. ?Yumi lanem wanem long ol prea blong Jisas?

⁴ Ol prea we Jisas i mekem i go long Jehova, oli wan nambawan eksampol blong ol disaepol oli folem. Taem Jisas i stap long wol ya, oltaem hem i prea. Jisas i makemaot taem blong hem i save prea, from we plante taem hem bisi mo plante man oli stap biaenem hem. (Mak 6:31, 45, 46) Hem i girap long eli moning blong hem save stap hem wan blong prea. (Mak 1:35) Wan taem, hem i prea fulnaet bifo we hem i mekem wan impoten desisen. (Luk 6:12, 13) Mo long naet bifo we Jisas i ded, hem i gohed nomo blong prea blong hem i save finisim fulwan impoten wok ya we hem i kam long wol blong mekem.—Mat. 26:39, 42, 44.

5. ?Olsem wanem yumi save folem eksampol blong Jisas taem yumi prea?

⁵ Eksampol blong Jisas i tijim yumi se nomata we yumi bisi olsem wanem, be yumi mas makemaot taem blong prea. Olsem Jisas, yumi save makemaot taem blong prea long eli moning o let long naet. Taem yumi mekem olsem, yumi stap soem long Jehova se yumi tinghae long nambawan presen ya. Wan sista nem blong hem Lynne i glad tumas taem hem i kasemsave long nambawan presen ya blong prea. Hem i talem se: “Taem mi lanem se mi save toktok long Jehova enitaem nomo, hemia i halpem mi blong luk hem olsem wan gudfala Fren, mo blong mi kam gud moa long ol prea blong mi.” I sua se plante long yumi tu i gat sem filing olsem. Taswe, naoia bambae yumi tokbaot faef impoten samting we yumi save tokbaot long ol prea blong yumi.

FAEF IMPOTEN SAMTING BLONG PREA FROM

6. Folem Revelesen 4:10, 11, ?i stret nomo we Jehova i kasem wanem?

⁶ Presem Jehova. Long wan nambawan vison, aposol Jon i luk 24 elda long heven oli stap wosipim Jehova. Oli stap presem God, mo oli talem se i stret nomo we hem i “kasem glori, ona, mo paoa.” (Ridim Revelesen 4:10, 11.) Ol enjel tu oli gat plante risen blong presem mo givim ona long Jehova. Olgeta oli stap long heven mo oli save gud Jehova. Oli luk ol nambawan fasin blong hem tru long ol samting we hem i mekem. Mo taem oli luk ol samting we Jehova i mekem, hemia i pulum olgeta blong presem hem.—Job 38:4-7.

7. ?Yumi save presem Jehova from wanem samting?

⁷ Yumi tu yumi save presem Jehova long ol prea blong yumi, taem yumi talem long hem samting we yumi laekem long saed blong hem, mo from wanem yumi respektem hem. Taem yu ridim mo stadi Baebol, traem makem ol fasin blong Jehova we yu yu laekem moa. (Job 37:23; Rom 11:33) Mo talemaot tingting blong yu long Jehova long saed blong ol fasin blong hem. Yumi save presem Jehova tu from we hem i stap halpem yumi, mo ol Kristin brata mo sista blong yumi. Oltaem hem i stap lukaotgud mo i stap protektem yumi.—1 Saml. 1:27; 2:1, 2.

8. ?Wanem sam risen from wanem yumi talem tangkiu long Jehova? (1 Tesalonaeka 5:18)

⁸ Talem Tangkiu Long Jehova. Yumi gat plante risen blong talem tangkiu long Jehova taem yumi prea. (Ridim 1 Tesalonaeka 5:18.) Yumi save talem tangkiu long hem from evri gudfala samting we yumi gat, oli kamaot long hem. (Jem. 1:17) Eksampol, yumi save talem tangkiu long hem from naesfala wol ya, mo from ol naesfala samting we hem i krietem. Yumi save talem tangkiu tu from laef blong yumi, famle blong yumi, ol fren blong yumi, mo hop we yumi gat. Mo yumi wantem talem tangkiu long Jehova from hem i save letem blong yumi fren wetem hem.

9. ?From wanem yumi mas gat fasin ya blong talem tangkiu long Jehova?

⁹ Maet yumi mas traehad blong tingbaot sam risen we yumi wan yumi wantem talem tangkiu long Jehova from. Yumi laef long wan wol we ol man oli no gat fasin ya blong talem tangkiu. Plante taem ol man oli tingbaot nomo samting we oli wantem, i bitim we oli talem tangkiu from samting we oli gat. Sipos yumi stat blong gat fasin ya, ol prea blong yumi bambae oli kam olsem wan lis nomo blong ol samting we yumi askem. Blong blokem fasin ya, yumi mas gohed blong talem tangkiu from evri samting we Jehova i mekem blong yumi.—Luk 6:45.

10. ?Olsem wanem fasin ya blong talem tangkiu i halpem wan sista blong stanap strong? (Yu luk pija tu.)

¹⁰ Fasin blong talem tangkiu i save halpem yumi blong stanap strong, taem yumi kasem sam hadtaem. Tingbaot ekspiriens blong sista Kyung-sook, we i stap long Wajtaoa blong 15 Jenuware 2015. Hem i gat kansa long lang. Mo hem i talem se: “Mi mi sek nogud, mi harem se mi lusum evri samting mo mi fraet we mi fraet.” ?Wanem i halpem hem blong i stanap strong? Hem i talem se evri naet bifo we hem i go slip, hem i go long rum antap long haos blong hem mo i prea. Hem i tingbaot faef blesing we hem i kasem long dei ya, nao long wan smol voes, hem i talem tangkiu long Jehova. Hemia i givhan long hem blong i no wari tumas mo blong i talemaot long Jehova se i lavem hem tumas. Hem i luksave olsem wanem Jehova i stap halpem ol man blong hem we oli kasem ol defren kaen traem, mo i luksave se i gat plante moa blesing long laef blong yumi i bitim ol traem. Olsem Kyung-sook, yumi gat plante risen blong talem tangkiu long Jehova, nating sipos yumi stap gotru long wan trabol. Taem yumi talem tangkiu long Jehova long prea, hemia i halpem yumi blong stanap strong mo gohed blong stap glad.

11. ?From wanem ol disaepol blong Jisas oli nidim blong gat strong tingting, afta we Jisas i gobak long heven?

¹¹ Askem Jehova blong i mekem yu gat strong tingting taem yu prij. Bifo we Jisas i gobak antap long heven, hem i rimaenem ol disaepol blong hem blong oli talemaot hem “long Jerusalem, mo long olgeta ples long Judia mo Sameria, gogo oli kasem olgeta ples long wol.” (Wok 1:8; Luk 24:46-48) Smoltaem biaen, ol lida blong ol man Jiu oli arestem aposol Pita mo Jon, mo oli tekem tufala i go long Sanhedrin, oli talem se tufala i mas stop blong prij, mo oli tok strong blong mekem tufala i fraet. (Wok 4:18, 21) ?Be Pita mo Jon i mekem wanem?

12. Folem Ol Wok 4:29, 31, ?ol disaepol oli mekem wanem?

¹² Nating se ol lida blong ol man Jiu oli traem blong stopem Pita mo Jon, be tufala i talem se: “?Olsem wanem? ?Yufala i ting se i stret long fes blong God blong mitufala i lesin long yufala, o mitufala i lesin long hem? Hemia i stap long yufala blong yufala i skelem. Be mitufala, mitufala i no save stop blong tokbaot samting we mitufala i luk mo mitufala i harem.” (Wok 4:19, 20) Taem oli letem Pita mo Jon i go fri, ol disaepol oli prea long Jehova blong i givhan long olgeta blong oli mekem wil blong hem, oli se: “Yu givim strong tingting long mifala ol slef blong yu, blong mifala i gohed blong talemaot tok blong yu.” Mo Jehova i ansa long prea blong olgeta.—Ridim Ol Wok 4:29, 31.

13. ?Yumi save lanem wanem long eksampol blong Jin-hyuk?

¹³ Yumi save folem eksampol blong ol disaepol taem yumi gohed nomo blong prij nating se gavman i stopem yumi. Traem tingbaot eksampol blong brata Jin-hyuk, we i stap long kalabus, from hem i no wantem joen long ami. Taem hem i stap long kalabus, oli givim wok ya long hem blong lukaot long sam prisena we oli putum olgeta i stap olgeta wan nomo long wan rum. Hem i save toktok long olgeta nomo blong askem samting we oli nidim, be hem i no gat raet blong tokbaot Baebol long olgeta. Hem i prea long Jehova blong i gat strong tingting, mo blong i toktok long fasin we i waes taem hem i tekem janis blong prij. (Wok 5:29) Hem i talem se: “Jehova i ansarem ol prea blong mi, taem i givim strong tingting mo waes blong mi statem plante Baebol stadi blong faef minit nomo long fored blong ol doa blong kalabus. Mo long naet, mi raetem ol leta blong mi save givim long ol prisena ya long nekis dei.” Yumi tu yumi save trastem se Jehova bambae i halpem yumi blong finisim minista wok blong yumi. Olsem Jin-hyuk, yumi save prea blong gat strong tingting mo waes.

14. ?Wanem i save halpem yumi, taem yumi strap gotru long ol problem? (Ol Sam 37:3, 5)

¹⁴ Askem Jehova blong i halpem yu blong dil wetem ol problem. Plante long yumi oli stap fesem problem long saed blong bodi mo filing, oli lusum wan we oli lavem long ded, oli gat problem long famle, ol man oli agensem olgeta, o sam narafala problem bakegen. Mo ol samting olsem pandemik mo ol faet, oli mekem se i had moa blong stanap strong long ol problem ya. Talemaot stret long Jehova olgeta filing blong yu. Yu talemaot long hem ol samting we yu stap fesem, sem mak olsem we yu talem long wan gudfala fren blong yu. Mo yu trastem se Jehova “bambae i mekem samting long bihaf blong yu.”—Ridim Ol Sam 37:3, 5.

15. ?Olsem wanem prea i save halpem yumi blong “stanap strong long taem blong trabol”? Talem wan eksampol.

¹⁵ Taem yumi stap gohed blong prea, hemia bambae i halpem yumi blong “stanap strong long taem blong trabol.” (Rom 12:12) Jehova i save ol samting we ol man blong hem oli stap fesem, mo “hem i harem we oli krae from help.” (Sam 145:18, 19) Kristie we i wan paenia mo we i gat 29 yia, i luksave se samting ya i tru. Hem i stat blong kasem sam problem blong helt, we hem i no ekspektem nating. Mo from samting ya, hem i kasem sik ya dipresen. Be biaen, hem i harem se mama blong hem i kasem wan sik we i save ded from. Kristie i se: “Mi prea strong long Jehova blong hem i givim paoa we mi nidim evri dei. Mi traehad blong folem wan gudfala program long saed blong spirit, olsem blong joen oltaem long ol miting mo stadi mi wan oltaem.” Hem i talem tu se: “Prea i givhan long mi blong stanap strong tru long ol hadtaem. Mi save se Jehova i stap klosap long mi oltaem, mo hem i halpem mi blong harem gud bakegen. Nating se ol problem blong helt blong mi oli stap yet, be Jehova i ansarem ol prea blong mi taem i mekem se mi gat pis mo tingting blong mi i kwaet.” Yumi neva mas fogetem se “Jehova i save olsem wanem blong sevem ol man we oli fasgud long hem, i tekemaot olgeta long ol samting we i stap traem olgeta.”—2 Pita 2:9.

16. ?From wanem yumi nidim help blong Jehova blong faet agensem ol samting we oli no stret?

¹⁶ Askem Jehova blong i halpem yu blong stanap strong taem wan samting i traem yu. From we yumi sinman, oltaem yumi mas faet agensem ol samting we oli traem pulum yumi blong mekem samting we i no stret. Setan tu i traem bes blong hem blong mekem i had long yumi blong stanap strong. Wan rod we hem i traem blong spolem tingting blong yumi, hemia tru long ol samting blong spel mo pleplei we oli no klin. Ol samting ya oli save mekem tingting blong yumi i kam doti, nao yumi no moa stap klin long fored blong Jehova. Mo oli save pulum yumi blong mekem wan bigfala sin.—Mak 7:21-23; Jem. 1:14, 15.

17. ?Yumi mas mekem wanem afta we yumi prea blong Jehova i halpem yumi? (Yu luk pija tu.)

¹⁷ Yumi nidim help blong Jehova sipos yumi wantem winim wan samting we i traem pulum yumi blong mekem i no stret. Long prea we Jisas i tijim long ol disaepol blong hem, hem i soemaot olsem wanem yumi save askem samting ya, taem i se: “Yu no letem ol samting oli kam traem mifala, be yu tekemaot mifala long man ya we i rabis.” (Mat. 6:13) Jehova i wantem halpem yumi, be yumi mas askem hem blong i halpem yumi. Be tu, yumi mas wok folem samting we yumi prea from. Yumi mas traehad blong no ridim o lesin nating long ol rong tingting we i fulap long wol blong Setan tede. (Sam 97:10) Yumi save fulumap tingting blong yumi wetem ol gudfala samting, taem yumi ridim mo stadi long Baebol. Taem yumi go long ol miting mo joen long wok blong prij, hemia tu bambae i givhan blong protektem tingting blong yumi. Mo Jehova i promes se bambae hem i no save letem wan samting we i strong tumas i traem yumi.—1 Kor. 10:12, 13.

18. ?Yumi evriwan i mas mekem wanem?

¹⁸ Long ol las dei ya we laef i kam moa had, yumi wanwan i mas prea strong long Jehova blong yumi save gohed blong holemstrong long hem. Putum wan taem evri dei blong yu save prea long hem. Jehova i wantem se yumi prea mo ‘talemaot olgeta samting we i stap long hat blong yumi’ long hem. (Sam 62:8) Presem Jehova mo talem tangkiu long hem from evri samting we hem i mekem. Askem hem blong i halpem yu blong gat strong tingting taem yu prij. Askem hem blong i halpem yu blong dil wetem eni problem mo stanap strong long ol samting we oli traem yu. Yu no mas letem eni samting o eni man i stopem yu blong prea oltaem long Jehova. ?Be olsem wanem Jehova i stap ansarem ol prea blong yumi? Bambae yumi faenemaot ansa blong impoten kwestin ya long nekis stadi.