Jehova i Promes Blong Mekem Wol Ya i Kam Paradaes

1. ?Wanem mesej we profet Aesea i talemaot long ol man Isrel?

PROFET Aesea i tokbaot Jehova olsem “God blong trutok.” Tok we oli transletem i kam “trutok” prapa mining blong hemia “amen.” (Aes. 65:​16, fut.) “Amen” i min se “hemia nao,” o “i tru.” Long Baebol taem oli yusum tok ya “amen” blong tokbaot Jehova mo Jisas, hemia i soemaot se samting we tufala i talem i tru. Taswe mesej we Aesea i talemaot long ol man Isrel i klia nomo. Hem i se oltaem man i save trastem samting we Jehova i talem. Mo Jehova i pruvum samting ya taem hem i mekem evri promes blong hem oli kamtru.

2. ?From wanem yumi save trastem promes blong Jehova long saed blong fiuja, mo wanem ol kwestin we bambae yumi tokbaot?

² ?Yumi tu, yumi save trastem ol promes we Jehova i mekem long saed blong fiuja? Klosap 800 yia afta long taem blong Aesea, aposol Pol i eksplenem from wanem yumi save trastem se oltaem ol promes blong God bambae oli kamtru. Pol i talem se: “God i neva save giaman.” (Hib. 6:18) Wan springwota i no save givim freswota mo solwota long semtaem. Long sem fasin, Jehova we i Stamba blong trutok i no save giaman. Taswe, yumi save trastem fulwan evri samting we Jehova i talem, inkludum ol promes blong hem long saed blong fiuja. Long stadi ya, bambae yumi tokbaot ol kwestin ya: ?Jehova i mekem wanem promes long yumi long saed blong fiuja? ?Mo wanem ol tok we Jehova i talem, we i pruvum se ol promes ya bambae oli kamtru?

?JEHOVA I PROMES BLONG MEKEM WANEM?

3. (1) ?Wanem promes we ol man blong God oli laekem tumas? (Revelesen 21:​3, 4) (2) ?Wanem tingting blong sam man taem oli harem promes ya?

³ Promes we bambae yumi tokbaot, ol man blong God long fulwol oli laekem tumas. (Ridim Revelesen 21:​3, 4.) Jehova i promes se i gat wan taem we “bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem.” Plante long yumi i yusum naesfala vas ya blong tokbaot laef long paradaes, taem yumi prij long ol narafala. ?Be wanem tingting blong sam man taem yumi tokbaot promes ya long olgeta? Maet oli se: “Samting ya i gud tumas, be mi no bilivim se bambae i kamtru.”

4. (1) ?Taem Jehova i mekem promes ya, hem i save wanem? (2) ?Jehova i mekem wanem moa taem hem i mekem promes ya?

⁴ Taem Jehova i pulum Jon blong raetemdaon promes ya blong laef long paradaes, Hem i save se tede taem yumi talemaot mesej blong Kingdom bambae yumi tokbaot hop ya tu long ol narafala. Mo tu, Jehova i save se bambae i had long plante blong oli bilivim promes ya blong “ol niufala samting”. (Aes. 42:9; 60:2; 2 Kor. 4:​3, 4) ?So olsem wanem yumi save halpem ol narafala mo yumi wan, blong trastem se ol blesing we Revelesen 21:​3, 4 i tokbaot bambae oli kamtru? Jehova i no mekem nambawan promes ya nomo, be hem i givim sam nambawan risen tu blong yumi trastem promes ya. ?Wanem ol risen ya?

JEHOVA I MEKEM YUMI SUA SE PROMES BLONG HEM BAMBAE I KAMTRU

5. ?Wanem ol risen we i mekem yumi trastem promes blong God long saed blong paradaes, mo weples yumi save faenem olgeta?

⁵ Long ol vas we i kam biaen, bambae yumi luk ol risen from wanem yumi save trastem promes blong Jehova long saed blong paradaes. Ol vas ya oli se: “Man ya we i sidaon long tron, i talem se: ‘!Yu luk! Mi mi stap mekem olgeta samting oli kam niuwan.’ Mo hem i talem bakegen se: ‘Yu raetemdaon ol tok ya from we oli tru mo ol man oli save trastem.’ Mo hem i talem long mi se: ‘!Ol tok ya oli kamtru finis! Mi mi Alfa mo mi mi Omega, mi mi stat mo mi mi en.’”—Rev. 21:​5, 6a.

6. ?From wanem ol tok we i stap long Revelesen 21:​5, 6 i mekem yumi trastem moa promes blong God?

⁶ ?From wanem ol tok ya i mekem yumi trastem moa promes blong God? Revelesen buk i tokbaot ol vas ya se: “I olsem we Jehova hem wan i saenem wan promes, no wan pepa blong givim raet long ol man we oli obei long hem blong kasem ol blesing ya long fiuja.”b Promes blong God i stap long Revelesen 21:​3, 4. Be long vas 5 mo 6, i olsem we Jehova i saenem promes ya blong mekem yumi sua se bambae i kamtru. Naoia, bambae yumi luk olsem wanem Jehova i mekem yumi sua se yumi save trastem hem.

7. Long stat blong vas 5, ?hu nao i toktok mo from wanem i spesel?

⁷ Vas 5 i stat wetem ol tok ya se: “Man ya we i sidaon long tron, i talem se.” (Rev. 21:5a) Ol tok ya oli spesel from we long buk blong Revelesen, i gat tri taem we Jehova hem wan i toktok, mo hemia i wan long olgeta. !Yes, ol tok ya oli no kamaot long wan enjel o Jisas, be oli kamaot long Jehova hem wan! Ol samting ya oli pruvum se yumi save trastem fulwan ol tok we hem i talem biaen. ?From wanem yumi talem olsem? From we Jehova i “no save giaman.” (Taet. 1:2) Taswe, yumi sua se ol tok we yumi ridim long Revelesen 21:​5, 6 bambae oli kamtru.

“!YU LUK! MI MI STAP MEKEM OLGETA SAMTING OLI KAM NIUWAN”

8. ?Jehova i talem wanem blong makem gud se promes blong hem bambae i kamtru? (Aesea 46:10)

⁸ Biaen Jehova i talem se: “!Yu luk!” (Rev. 21:5) Grik tok we oli transletem i kam “!yu luk!” oli yusum plante taem long buk blong Revelesen. Wan buk i talem se esklamesen mak we oli yusum, i olsem “wan rod blong talem long man we i stap rid blong i makem gud tok we i kam biaen.” ?Wanem ol tok ya? God i talem se: “Mi mi stap mekem olgeta samting oli kam niuwan.” I tru, Jehova i stap tokbaot ol samting we bambae oli hapen long fiuja. Be from we hem i sua fulwan se bambae hem i mekem promes ya i kamtru, hem i tokbaot ol samting ya olsem we oli kamtru finis.—Ridim Aesea 46:10.

9. (1) ?Tok ya “mekem olgeta samting oli kam niuwan,” i minim wanem? (2) ?Wanem bambae i hapen long “heven” mo “wol” we i stap naoia?

⁹ I gud yumi luk ol nekiswan tok we i stap long Revelesen 21:​5, we i se: “Mekem olgeta samting oli kam niuwan.” Long Baebol, japta ya i tokbaot tu samting we bambae Jehova i mekem. Faswan, Jehova bambae i distroem olfala sistem blong wol ya. Mo nambatu, bambae hem i putumap wan niuwan. Long Revelesen 21:​1, yumi ridim se: “Heven mo wol we tufala i stap fastaem, tufala i lus finis.” ‘Heven we i stap fastaem,’ i minim ol gavman blong man we Setan mo ol dimon blong hem oli gat paoa long olgeta. (Mat. 4:​8, 9; 1 Jon 5:19) Long Baebol, tok ya “wol” oli yusum plante taem blong tokbaot ol man long wol. (Jen. 11:1; Sam 96:1) Taswe, ‘wol we i stap fastaem’ i minim ol rabis man long wol tede. Jehova bambae i no traem mekem se “heven” mo “wol” we i stap naoia, i kam gud moa. Be bambae hem i distroem olgeta fulwan. Biaen, bambae hem i putumap “wan niufala heven mo wan niufala wol,” we i minim wan niufala gavman we bambae i rul long ol gudfala man.

10. ?Jehova bambae i mekem wanem i kam niuwan?

¹⁰ Long Revelesen 21:​5, Jehova i tokbaot ol nekiswan samting we bambae hem i mekem oli kam niuwan. Makem se Jehova i no talem se: “Mi mi stap mekem ol niufala samting.” Be hem i talem se: “Mi mi stap mekem olgeta samting oli kam niuwan.” Yes, Jehova bambae i mekem wol ya mo ol man oli kam niuwan, taem i mekem oli kam stretgud olgeta. Olsem we Aesea i talemaot, fulwol bambae i kam wan naesfala garen, olsem garen blong Iden. Mo tu, bambae yumi kam niuwan taem Jehova i mekem se yumi kam stretgud olgeta. Olgeta we leg blong olgeta i nogud, ol blaenman, mo olgeta we sora blong olgeta i fas bambae oli kam gud. Antap moa ol dedman bambae oli laef bakegen.—Aes. 25:8; 35:​1-7.

‘OL TOK YA OLI TRU MO MAN I SAVE TRASTEM, MO OLI KAMTRU FINIS’

11. ?Jehova i talem long Jon blong i mekem wanem, mo from wanem?

¹¹ ?Wanem narafala samting we Jehova i talem, we i mekem se yumi save trastem hem? Jehova i talem long Jon se: “Yu raetemdaon ol tok ya from we oli tru mo ol man oli save trastem.” (Rev. 21:5) Jehova i talem sam moa samting i bitim we hem i talem nomo long Jon se, “yu raetemdaon.” Mo tu, hem i givim risen from wanem hem i talem olsem, i se: “From we [ol tok ya] oli tru mo ol man oli save trastem.” Yumi glad tumas se Jon i obei mo i “raetemdaon” ol tok ya. From samting ya, yumi save ridim promes blong God long saed blong paradaes, mo tingting dip long ol nambawan blesing we i stap long fored blong yumi.

12. ?From wanem i stret nomo we Jehova i talem se: “!Ol tok ya oli kamtru finis!”?

¹² ?Wanem nekiswan samting we Jehova i talem? Hem i se: “!Ol tok ya oli kamtru finis!” (Rev. 21:6) Naoia Jehova i toktok olsem se ol samting we hem i bin tokbaot long saed blong paradaes, oli kamtru finis. Mo i stret nomo we hem i toktok olsem, from we i no gat wan samting i save stopem hem blong mekem stamba tingting blong hem i kamtru. Jehova i talem wan narafala samting tu, we i mekem yumi sua se promes blong hem bambae i kamtru. ?Hem i talem wanem?

“MI MI ALFA MO MI MI OMEGA”

13. ?From wanem Jehova i talem tok ya se: “Mi mi Alfa mo mi mi Omega”?

¹³ Olsem we yumi tokbaot finis, Jehova hem wan i toktok tri taem long ol vison we Jon i luk. (Rev. 1:8; 21:​5, 6; 22:13) Long ol taem ya, Jehova i talem sem toktok ya se: “Mi mi Alfa mo mi mi Omega.” Long Grik alfabet, alfa i faswan leta mo omega i laswan leta. Taem Jehova i talem se hem i “Alfa mo Omega,” hem i wantem soemaot se taem hem i statem wan samting, bambae hem i finisim.

14. (1) Talem wan eksampol wetaem Jehova i talem “Alfa,” mo wetaem bambae hem i talem “Omega.” (2) ?Ol tok we i stap Jenesis 2:​1-3, i mekem yumi sua long wanem?

¹⁴ Afta we Jehova i wokem Adam mo Iv, Hem i talemaot stamba tingting we hem i gat long ol man mo wol. Baebol i talem se: “God i blesem olgeta, mo i talem se: ‘Yufala i mas gat ol pikinini mo yufala i kam plante mo fulumap wol, mo mekem ol samting long wol ya oli stap aninit long han blong yufala’” (Jen. 1:28) Faswan taem we Jehova i talemaot stamba tingting blong hem, i olsem we hem i talem “Alfa.” I gat taem i stap kam we ol pikinini blong Adam mo Iv we oli obei mo oli stretgud, bambae oli fulumap wol ya mo mekem i kam wan paradaes. Long fiuja, taem stamba tingting blong Jehova i kamtru, bambae i olsem we hem i talem “Omega.” Afta we Jehova i finisim blong krietem “heven mo wol mo olgeta samting we oli stap long tufala,” hem i talem wan samting we i soemaot se stamba tingting blong hem bambae i kamtru. Toktok ya i stap long Jenesis 2:​1-3. (Ridim.) Jehova i talem se namba seven dei i tabu. ?Hemia i minim wanem? Jehova i talem se bambae hem i mekem stamba tingting blong hem long saed blong ol man mo wol i kamtru. Mo bambae hem i mekem olsem, long namba seven dei.

15. ?From wanem Setan i ting se hem i naf blong stopem Jehova blong mekem stamba tingting blong hem i kamtru?

¹⁵ Afta we Adam mo Iv i rebel, tufala i kam ol sinman mo tufala i pasem sin mo ded i go long ol pikinini blong tufala. (Rom 5:12) From samting ya, maet i luk olsem se i no posibol blong ol gudfala man we oli obei long Jehova, oli fulumap wol ya. Mo i luk olsem se Setan i mekem se i no posibol blong Jehova i talem “Omega.” Maet Setan i gat tingting se Jehova i no moa save holem promes blong hem. Maet hem i ting se God bambae i kilim Adam mo Iv i ded, mo i wokem wan narafala kapol blong mekem stamba tingting blong hem long saed blong ol man i kamtru. Be sipos God i mekem olsem, bambae devel i talem se God i wan man blong giaman. ?From wanem? From we long Jenesis 1:​28, Jehova i bin talem long Adam mo Iv se olgeta pikinini blong tufala bambae oli fulumap wol ya.

16. ?From wanem maet Setan i ting se Jehova i no save mekem stamba tingting blong hem i kamtru?

¹⁶ ?Wanem narafala desisen we maet Setan i ting se God bambae i mekem? Maet Setan i ting se Jehova bambae i letem Adam mo Iv i gat pikinini, be bambae oli neva kam stretgud olgeta. (Pri. 7:20; Rom 3:23) Sipos ol pikinini blong Adam mo Iv oli neva kam stretgud, bambae devel i talem se Jehova i no naf blong mekem stamba tingting blong hem i kamtru, hemia blong wol ya i fulap long ol man we oli stretgud.

17. ?Olsem wanem Jehova i stretem problem we Setan mo tufala faswan man i mekem, mo wanem bambae i kamaot from? (Mo tu, yu luk pija.)

¹⁷ Jehova i stretem problem we Setan mo tufala faswan man i mekem, long wan rod we Setan i no tingbaot nomo. (Sam 92:5) Jehova i no traem pruvum se hem i no wan man blong giaman, be hem i pruvum se hem i tok tru oltaem, taem hem i letem Adam mo Iv blong oli gat ol pikinini. Mo tu, Jehova i pruvum se taem hem i talem se bambae hem i mekem wan samting, i no gat wan samting i save stopem hem. Jehova i gohed blong mekem stamba tingting blong hem i kamtru, taem i givim wan “pikinini” we bambae i sevem ol pikinini blong Adam mo Iv we oli obei long hem. (Jen. 3:15; 22:18) !Setan i neva ekspektem se Jehova bambae i yusum pikinini ya blong givim laef blong hem olsem wan ransom blong sevem ol man! ?From wanem? From we arenjmen ya blong ransom i stanap long lav. (Mat. 20:28; Jon 3:16) Mo hemia i wan fasin we Setan i no gat. ?So wanem bambae i kamaot from ransom ya? Long en blong Wan Taosen Yia Rul Blong Kraes, ol pikinini blong Adam mo Iv we oli obei mo we oli stretgud, bambae oli stap long paradaes long wol ya, stret olsem we Jehova i bin wantem long stat. Long taem ya nao, Jehova bambae i talem se: “Omega.”

?OLSEM WANEM BLONG TRASTEM MOA PROMES BLONG JEHOVA?

18. ?Wanem trifala risen we i mekem se yumi save trastem promes blong God? (Mo tu yu luk bokis ya “Tri Risen Blong Trastem Promes Blong Jehova.”)

¹⁸ Folem wanem we yumi lanem finis, ?yumi save talem wanem long ol man we oli ting se promes blong God long saed blong paradaes i no save kamtru? Faswan, Jehova hem wan i mekem promes ya. Buk blong Revelesen i talem se: “Man ya we i sidaon long tron, i talem se: ‘!Yu luk! Mi mi stap mekem olgeta samting oli kam niuwan.’” Jehova i waes, i gat paoa, mo i wantem blong mekem promes blong hem i kamtru. Nambatu, Jehova i sua fulwan se ol promes blong hem bambae oli kamtru, taswe hem i talem olsem se oli kamtru finis. Hem i se: ‘Ol tok ya oli tru mo ol man oli save trastem. !Ol tok ya oli kamtru finis!’ Nambatri, taem Jehova i statem wan samting, hem i meksua se hem i finisim. Mo hemia i olsem we hem i talem se: “Mi mi Alfa mo mi mi Omega.” Jehova bambae i pruvum se Setan i wan man blong giaman mo hem i no save stopem Jehova blong mekem stamba tingting blong hem i kamtru.

19. ?Yumi save mekem wanem, taem ol man we yumi prij long olgeta oli no trastem promes blong God?

¹⁹ Tingbaot se taem yu talemaot long ol man ol tok we Jehova i talem blong mekem promes blong hem i kamtru, yu tu yu trastem moa promes ya. So nekis taem we yu ridim naesfala promes ya blong paradaes we i stap long Revelesen 21:4 long wan man, mo hem i talem se: “Hemia i naes tumas, be mi no ting se bambae i kamtru,” ?bambae yu mekem wanem? I gud yu ridim mo eksplenem vas 5 mo 6. Mo soemaot ol tok we Jehova hem wan i talem, we i olsem se hem i saenem promes ya blong i kamtru.—Aes. 65:16.