‘Nating We Hem i Ded Finis, Be Hem i Stap Toktok Long Yumi Yet’

EBEL i lukluk ol sipsip blong hem we oli stap kakae gras long saed blong hil. Afta, hem i lukluk i go longwe moa, nao i luk wan samting i saen. Hem i save se samting ya we i saen, hemia wan longfala naef blong faet we faea i stap laet long hem, mo hem nomo i stap saksakem hem i go olbaot. Naef ya i blokem rod we i go long garen blong Iden. Fastaem, papa mo mama blong hem tufala i stap long garen ya, be naoia tufala mo ol pikinini blong tufala i no moa save go long ples ya. Yu traem tingbaot se sapa i stap kam, smol win i blu, mo Ebel i lukluk i go antap, i stap tingting long saed blong God mo i askem se, ?ol man oli save fren gud bakegen wetem God? Ebel i wantem tumas se samting ya i hapen.

Ebel i stap toktok long yu tede. ?Yu yu harem hem? Maet yu talem se samting olsem i no save hapen. Mo tu, Ebel i ded klosap 6,000 yia finis mo bodi blong hem i kam graon longtaem finis. Baebol i tijim yumi long saed blong ded se: “Ol man we oli ded finis oli no moa save wan samting.” (Prija 9:5, 10) Antap moa, i no gat wan toktok blong Ebel long Baebol. ?Ale, olsem wanem hem i save toktok long yumi?

Tabu spirit i pulum aposol Pol blong i tokbaot Ebel se: “Nating we man ya i ded finis, be fasin ya blong bilif blong hem i stap toktok long yumi yet.” (Hibrus 11:4) Vas ya i talem se fasin blong bilif blong Ebel nao i stap toktok long yumi. Ebel i faswan man long wol ya we i gat gudfala fasin ya, bilif. Long ful laef blong hem, hem i soemaot se hem i gat strong bilif, taswe i olsem se eksampol blong hem i laef yet tede, mo yumi save folem eksampol ya. Sipos yumi lanem mo folem fasin blong bilif blong hem, i olsem we yumi stap harem hem.

?Yumi save lanem wanem long fasin blong Ebel mo bilif blong hem, nating se Baebol i no tokbaot hem tumas? Naoia bambae yumi tokbaot moa.

HEM I GRUAP LONG TAEM WE I NO GAT FULAP MAN YET

Ebel i bon long taem we i no gat fulap man yet long wol. Jisas i talem se Ebel i laef long “stat blong wol.” (Luk 11:50, 51, King James Version) Taem Jisas i tokbaot “wol,” hem i minim ol man we oli gat janis blong God i fogivim sin blong olgeta. Ebel i namba fo man we i laef long wol ya. I luk olsem se hem i fas man we God i luk se i stret blong pemaot sin blong hem.a I klia se Ebel i gruap long medel blong ol man we oli no gat gudfala fasin.

Nating se famle blong man i jes stat long wol, be olgeta evriwan oli harem nogud tumas. Ating Adam mo Iv tufala i naes tumas mo tufala i gat paoa. Be tufala i save se tufala i mekem bigfala sin. Fastaem tufala i stret gud olgeta, mo tufala i save laef olwe. Be afta, tufala i rebel agensem Jehova. Ale, Jehova i ronemaot tufala long garen blong Iden. Tufala i tingbaot ol samting we tufala nomo i wantem, be tufala i no tingbaot ol nid blong ol pikinini blong tufala. Taswe, tufala i no moa stret gud olgeta mo tufala i lusum laef we i no save finis.​—Jenesis 2:15–3:24.

Adam mo Iv tufala i faenem se laef i had tumas afsaed long garen blong Iden. Taem fasbon boe blong tufala i bon, tufala i putum nem blong hem se Ken, we maet i minim “Kasem.” Mo Iv i talem se: “Hae God i givhan long mi, nao mi mi kasem wan pikinini we i boe.” Toktok ya blong Iv i soemaot se, maet hem i stap tingbaot profet tok we Jehova i talem taem tufala i stap long garen blong Iden. Jehova i talem se wan woman bambae i bonem wan “pikinini.” Wan dei, pikinini ya bambae i smasem hed blong rabis man ya we i lidim Adam mo Iv i go krangke. (Jenesis 3:15; 4:1) Ating Iv i stap tingting se hem nao woman ya we profet tok i tokbaot, mo se Ken i “pikinini” we Jehova i promes blong givim.

Sipos Iv i tingting olsem, hem i rong olgeta. Antap moa, sipos hem mo Adam tufala i tijim Ken blong i tingting olsem, taem Ken i stap gruap, hem i save kam flas. Taem ol yia oli pas, Iv i bonem wan moa boe, be Iv i no talem wan tok blong leftemap pikinini ya. Tufala i putum nem blong hem se Ebel, we maet i minim “Win we i blu blong smoltaem nomo,” no “Hem i blong nating nomo.” (Jenesis 4:2) ?Olsem wanem? ?Taem tufala i jusum nem ya, tufala i soemaot se tufala i ting nating long Ebel, be tufala i tinghae moa long Ken? Maet i olsem, be yumi no save.

Ol papa mo mama tede oli save lanem plante samting long fas papa mo mama blong yumi. Ol papa mo mama, ?ol tok mo ol wok blong yufala oli pusum pikinini blong mekem wanem? ?Blong hem i kam praod, blong hem i wantem winim ol narafala, mo blong i tingbaot hem wan nomo? ?Yufala i save tijim olgeta blong oli lavem Jehova God mo oli kam fren blong hem? Sore tumas be fas papa mo mama blong yumi, tufala i no mekem gud wok blong tufala. Nating se i olsem, ol pikinini blong tufala oli save putum tingting blong olgeta long promes blong God.

?WANEM I GIVHAN LONG EBEL BLONG I BILIF LONG GOD?

Taem tufala boe i stap gruap, ating Adam i trenem tufala blong tufala i mekem sam wok blong givhan long famle. Ken i mekem garen mo Ebel i lukaot long ol sipsip.

Be Ebel i mekem wan samting we i impoten tumas. Taem ol yia oli stap pas, hem i bilif long God. Hemia nao nambawan fasin we biaen Pol i tokbaot long leta blong hem. Traem tingbaot samting ya. Ebel i no folem fasin blong bilif blong wan man we i laef bifo long hem. ?Be wanem i givhan long hem blong i bilif long Jehova? Yumi save tingbaot tri stamba samting we oli givhan long hem blong i gat wan strong bilif.

Ol samting we Jehova i mekem.

I tru se Jehova i talem wan tok panis long graon ya, blong ol ropnil wetem ol narafala rabis gras oli gru olbaot long hem, nao i no isi blong mekem garen. Nating se i olsem, graon ya i gohed blong givim kakae blong fidim Ebel mo famle blong hem. Be Jehova i no talem wan tok panis long ol anamol wetem ol pijin mo ol fis, mo long ol hil, ol lek, ol reva, mo solwota. Mo tu, Jehova i no talem wan tok panis long ol samting long skae, olsem klaod, san, mun, mo ol sta. Taem Ebel i luk ol samting ya we Jehova i mekem, hem i luk bigfala lav, waes, mo gudfala fasin blong Jehova. (Rom 1:20) Bilif blong hem i kam strong moa taem hem i stap tingting dip long ol samting ya.

I luk olsem se Ebel i tekem taem blong tingbaot ol fasin blong Jehova. Yu traem tingbaot taem we hem i stap lukaot long ol sipsip. Wan man blong lukaot long sipsip i mas wokbaot plante. Hem i mas lidim ol sipsip i gokros long ol hil, long ol krik, mo long ol reva blong traem faenem ol gudfala gras we oli grin gud. Hem i mas faenem ol gudfala ples we i gat wota long hem, mo ol ples we ol sipsip oli save spel mo haed gud long hem. Long olgeta anamol we God i mekem, ol sipsip oli no save lukaot long olgeta bakegen. Oli nidim oltaem blong man i lidim mo i protektem olgeta. Ol samting ya oli mekem Ebel i luksave se hem i nidim blong wan man we i waes moa i lidim hem mo i protektem hem. Hem i talemaot samting ya long ol prea blong hem, mo bilif blong hem i kam strong moa.

Ol promes blong Jehova.

Maet Adam mo Iv tufala i stori long ol boe blong tufala long samting we i hapen long garen blong Iden, we i mekem se God ronemaot tufala long ples ya. Hemia i mekem se Ebel i gat plante samting blong tingting dip long hem.

Jehova i talem se graon bambae i kam nogud. Ebel i luk klia se ol ropnil wetem ol narafala rabis gras oli gru olsem we Jehova i talem. Jehova i talem tu se Iv bambae i harem nogud long bodi blong hem taem hem i gat bel, mo taem hem i bonem pikinini. Ebel i luk klia se ol tok blong Jehova oli kamtru taem ol brata mo sista blong hem oli bon. Jehova i talem bakegen long Iv se bambae hem i stap wantem man blong hem yet, mo man blong hem bambae i bos long hem. Ebel i luk samting ya i kamtru long laef blong papa mo mama blong hem. Mo hem i luk se hem i save trastem evri tok blong Jehova. From samting ya, Ebel i gat wan strong risen blong bilif long promes we God i talem long saed blong “pikinini,” we bambae i stretem trabol we i stat long garen blong Iden.​—Jenesis 3:15-19.

Ol man blong wok blong Jehova.

I no gat wan man long wol we Ebel i save folem fasin blong bilif blong hem. Be hem i save folem fasin blong bilif blong ol enjel we Jehova i putum olgeta long garen blong Iden. Afta we God i sakemaot Adam mo Iv long garen blong Iden, hem i blokem tufala wetem ol pikinini blong tufala, blong oli no gobak long Paradaes ya. Blong mekem olsem, Jehova i putum ol enjel we oli ol jerubim, blong oli gad long ples ya, mo hem i putum wan longfala naef blong faet we faea i laet long hem mo i stap saksakem hem i go olbaot.​—Jenesis 3:24.

Traem tingbaot se Ebel i stap luk ol jerubim ya taem hem i wan smol boe yet. Bodi blong ol jerubim ya i pruvum klia long Ebel se oli gat bigfala paoa. Mo “naef” ya we faea i laet long hem mo we hem nomo i stap saksakem hem i go olbaot, i pulum Ebel blong i respektem olgeta. Taem Ebel i stap gruap, hem i luk se tufala jerubim ya i gohed oltaem long wok blong tufala. Hem i luk se evri yia, long dei mo long naet, tufala enjel ya i no lego ples blong tufala nating. Samting ya i tijim Ebel se Jehova i gat ol man blong wok blong hem we oli gat stret fasin mo oli holemstrong long hem. Taem Ebel i lukluk ol jerubim ya, hem i lanem fasin blong holemstrong long Jehova mo fasin blong obei long hem. Famle blong hem i no gat fasin ya. Eksampol blong ol enjel ya i mekem bilif blong Ebel i kam strong moa.

Ebel i tingting dip long ol samting raonabaot long hem we oli soemaot fasin blong Jehova. Hem i tingting dip tu long olgeta promes blong God, mo long eksampol blong ol jerubim. Ol samting ya oli mekem se bilif blong hem i kam strong moa. Yumi save lanem plante samting long eksampol blong hem. Ol yangfala oli save folem eksampol blong hem, blong oli bilif strong long Jehova God, nating se ol memba blong famle oli no mekem olsem. Yumi gat plante samting blong mekem bilif blong yumi i strong. Yumi gat Baebol, yumi save tingting dip long ol nambawan samting raonabaot long yumi we Jehova i mekem, mo long ol eksampol blong ol man we oli gat strong bilif.

?FROM WANEM SAKREFAES BLONG EBEL I GUD MOA?

Taem Ebel i bilif strong moa long Jehova, hem i wantem mekem wan samting blong soemaot bilif ya. ?Be hem i save givim wanem long God ya we i mekem olgeta samting long heven mo wol? I tru se God i no nidim blong man i givim wan samting long hem no i givhan long hem. Be taem ol yia oli stap pas, Ebel i kasem save wan samting we i tru we i tru. Hemia se sipos gudfala tingting i pusum hem blong i givim beswan samting we hem i gat, bambae Papa blong hem long heven we i lavem hem, i harem gud.

Ebel i rere blong givim sam long ol sipsip blong hem, blong mekem sakrefaes i go long Jehova. Hem i jusum sipsip we i beswan mo i fasbon long ol narafala, mo i tekem ol gudfala mit blong hem we i gat gris, nao i mekem sakrefaes i go long Jehova. Long semtaem, Ken tu i wantem blong God i blesem hem. Nao hem i rerem ol kakae blong garen blong givim i go long God. Be tingting we i pusum hem blong mekem sakrefaes ya i no olsem hemia blong Ebel. Samting ya i kamaot klia taem tufala brata ya tufala i givim ol sakrefaes blong tufala i go long God.

Tufala pikinini ya blong Adam, tugeta i yusum olta mo faea blong mekem sakrefaes blong tufala. Maet ol samting ya oli hapen long fored blong ol jerubim we long taem ya, olgeta nomo oli mekem wok blong Jehova long wol. !Mo Jehova i mekem wan samting blong soemaot tingting blong hem long ol sakrefaes ya! Yumi ridim se: “Mo Hae God i glad long fasin ya we Ebel i mekem, mo long presen ya we i givim i go long hem.” (Jenesis 4:4) ?Olsem wanem God i soemaot se hem i agri? Baebol i no talem. ?Be from wanem hem i glad long sakrefaes blong Ebel?

?Jehova i glad long Ebel from sipsip we hem i givim? Ebel i givim wan anamol we i laef, mo hem i mekem blad blong hem i ron. Maet hem i kasem save se sakrefaes blong hem bambae i sas long ae blong God. Plante handred yia afta long taem blong hem, God i talem long ol man blong oli mekem sakrefaes long wan sipsip we i no gat samting i rong long bodi blong hem. Sipsip ya i pija blong sakrefaes blong stret Pikinini blong hem. Pikinini ya i “smol sipsip blong God,” we blad blong hem we i stret gud olgeta bambae i ron. (Jon 1:29; Eksodas 12:5-7) Be long taem blong Ebel, hem i no kasem save long olgeta samting ya.

Wan samting we yumi save gud se: Ebel i givim beswan blong ol anamol we hem i gat. Jehova i glad tumas long Ebel mo long sakrefaes blong hem. Ebel i lavem Jehova mo i bilif strong long hem, taswe hem i mekem sakrefaes ya.

Be long saed blong Ken, i defren. Jehova “i no glad long fasin we Ken i mekem, mo long presen ya blong hem.” (Jenesis 4:5) Hemia i no from we sakrefaes blong Ken i nogud, from we plante yia afta, God i givim loa long ol man blong hem blong oli givim ol kakae blong garen i go long Hem. (Levitikas 6:14, 15) Be Baebol i tokbaot Ken se “fasin blong hem i no stret.” (1 Jon 3:12) Ken i gat sem tingting olsem plante man long taem blong yumi. Hem i ting se Jehova bambae i glad long hem, taem i luk se hem i mekem sakrefaes. Samting we Ken i mekem i soemaot klia se hem i no bilif long Jehova mo i no lavem hem.

?Olsem wanem? ?Taem Ken i luk se Jehova i no glad long sakrefaes blong hem, hem i traem blong folem eksampol blong Ebel? Nogat. Hem i kros tumas long brata blong hem. Jehova i luk samting we i stap long hat blong Ken, nao wetem longfala tingting, hem i traem blong mekem Ken i tingting. Jehova i wonem Ken se sipos hem i gohed blong kros, bambae fasin ya i lidim hem blong mekem wan bigfala sin. Be sipos hem i jenisim tingting blong hem, God bambae i “glad” long hem.​—Jenesis 4:6, 7.

Ken i no lesin long Jehova. Be hem i girap, i singaot smol brata blong hem blong tufala i go long garen, nao hem i kilim brata blong hem i ded. (Jenesis 4:8) From samting ya, Ebel i kam fas man we oli kilim hem from bilif blong hem. Hem i ded, be stori blong hem i no lus yet.

I olsem se blad blong Ebel i stap krae i go long Jehova blong i stretem bisnes ya. Nao Jehova i stretem bisnes ya taem hem i panisim Ken. (Jenesis 4:9-12) Samting we i moa impoten se stori blong Ebel i tijim yumi tede. Maet Ebel i gat klosap wan handred yia. Long tingting blong plante man long taem ya, laef blong hem i sot tumas. Be nating se i olsem, Ebel i traehad blong mekem God i glad long hem. Nomata se hem i ded, be hem i save se Papa blong hem long heven, i glad mo i lavem hem tumas. (Hibrus 11:4) Yumi save se Jehova i tingbaot hem mo bambae hem i mekem hem i laef bakegen long paradaes long wol. (Jon 5:28, 29) ?Olsem wanem? ?Bambae yu tu yu luk hem long taem ya? Yu save luk hem sipos yu gat strong tingting blong folem fasin blong bilif blong hem.